SSPP/ SSA ၸတ်းႁဵတ်း ပၢင်ၵႅဝ်ႈ ႁပ်ႉႁူမ်ၸူမ်းတွၼ်ႈဝၼ်းၵိူတ်ႇလၢႆးလုၵ်ႉၽိုၼ်ႉ ယိပ်းၵွင်ႈၵၢင်ႇ ၸိုင်ႈတႆး ၶွပ်ႈထူၼ်ႈ 63 ပီ တီႈငဝ်ႈငုၼ်းဝၢၼ်ႈႁႆး ဝႃႈၼႆ။
မိူဝ်ႈၼႆႉ ဝၼ်းတီႈ 21/5/2021 ယၢမ်းၵၢင်ၼႂ် 7 မူင်း ပႃႇတီႇမႂ်ႇသုင် ၸိုင်ႈတႆး/ တပ်ႉ သိုၵ်း ၸိုင်ႈတႆး SSPP/SSA ၸတ်းႁဵတ်း ပၢင်ၵႅဝ်ႈ ႁပ်ႉႁူမ်ၸူမ်းတွၼ်ႈဝၼ်း ၵိူတ်ႇလၢႆးလုၵ်ႉၽိုၼ်ႉယိပ်းၵွင်ႈၵၢင်ႇ ၸိုင်ႈတႆး ၶွပ်ႈထူၼ်ႈ 63 ပီ တီႈႁူင်းႁေႃၸဝ်ႈၼၢင်း ႁိူၼ်းၶမ်း ငဝ်ႈငုၼ်းဝၢၼ်ႈႁႆး မီးၽူႈယႂ်ႇၵူၼ်းလူင် ၼႂ်း SSPP လႄႈ ပေႃႈမႄႈၵူၼ်းမိူင်း ၶဝ်ႈႁူမ်ႈ 2 ႁဵင်ပၢႆ ၼႆယဝ်ႉ။
တီႈပၢင်ၵႅဝ်ႈၼၼ်ႉ ဢွၼ်တၢင်းသုတ်း ႁူမ်ႈၵၼ် တၵ်ႉယမ်တုင်းၸိူဝ်ႉၸၢတ်ႈၸိုင်ႈတႆး၊ တၵ်ႉယမ်ၽူႈႁတ်းႁၢၼ်လႄႈ ႁူမ်ႈ ၵၼ် တိူင်ႇၵၢဝ်ႇၵတိသဵတ်ႉၸႃႇ 4 ၶေႃႈ။
လိူဝ်ၼၼ်ႉ ၸွမ်သိုၵ်းလူင် သိူဝ်ထႅၼ်ႈ ၽူႈၼၢမ်းၼႃႈ 1 SSPP/SSA မွၵ်ႇလၢတ်ႈၶေႃႈၵႂၢမ်းပိုတ်ႇပၢင် ၶူၼ်ႉၶႆႈၼႄ ပိုၼ်း လၢႆးလုၵ်ႉၽိုၼ်ႉယိပ်းၵွင်ႈၵၢင်ႇၸိုင်ႈတႆး။
ယဝ်ႉၵေႃႈ ၸွမ်ႁၢၼ် ၶုၼ်သႅင် ၵႅမ်ႁူဝ်ပဝ်ႈ 2 SSPP/SSA သပ်းလႅင်းတၢင်ႇၼႄ လွင်ႈငဝ်းလၢႆး ပိူင်ပဵၼ်ပိူင်မီးၵၢၼ်မိူင်း ဢၼ်ပဵၼ်မီးယူႇယၢမ်းလဵဝ်လႄႈ လွင်ႈၸုၵ်းမၼ်ႈ ပႃႇတီႇမႂ်ႇသုင်ၸိုင်ႈတႆး ဢိၵ်ႇငဝ်းလၢႆး ၵူႈလွင်ႈလွင်ႈ။ လိူဝ်ၼၼ်ႉ ၵိုတ်း လိုဝ်ႈပၢင်ၵႅဝ်ႈၵႂႃႇ ။
တီႈပၢင်ၵႅဝ်ႈဝၼ်းၵိူတ်ႇလုၵ်ႉၽိုၼ်ႉ ယိပ်းၵွင်ႈၵၢင်ႇ တီႈငဝ်ႈငုၼ်းဝၢၼ်ႈႁႆးၼႆႉ မီးၽူႈယႂ်ႇၵူၼ်းလူင် ၼႂ်း SSPP ၶိုၼ်ႈႁွတ်ႈ တင်းမူတ်း 38 ၵေႃႉ၊ ၵူၼ်းမိူင်း ၼႂ်းၼႃႈတီႈ SSPP ၵုမ်းၵမ်ၶိုၼ်ႈႁွတ်ႈ 1,900 ပၢႆ ၼႆယဝ်ႉ။
ၼွၵ်ႈလိူဝ်ၼၼ်ႉ မိူဝ်ႈၼႆႉ ဝၼ်းတီႈ 21 ၵူၺ်းၼင်ႇၵဝ်ႇ တွၼ်ႈယၢမ်းဝၢႆးဝၼ်း 2 မူင်း – 5 မူင်းႁူဝ်ၶမ်ႈ ၵမ်းၼိုင်ႈလႄႈ မိူဝ်ႈၽုၵ်ႈ ဝၼ်းတီႈ 22 ယၢမ်းၵၢင်ၼႂ် 8 မူင်း – 11 မူင်းၵၢင်ဝၼ်း လႄႈ 2 မူင်း – 5 မူင်းႁူဝ်ၶမ်ႈ ယူႇတီႈပႃႇတီႇမႂ်ႇသုင်ၸိုင်ႈတႆး SSPP တေႁူပ်ႉထူပ်းပေႃႈမႄႈၵူၼ်းမိူင်းၵႂႃႇ တီႈႁူင်းႁေႃလူင် ၸဝ်ႈၼၢင်းႁိူၼ်းၶမ်း ငဝ်ႈငုၼ်းဝၢၼ်ႈႁႆးၵႂႃႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ