ၵူၼ်းၼုမ်ႇ ဢွၼ်ႇၸၢႆး ဢႃယု 20 ပၢႆ ၽႃႇၺႃးမၢၵ်ႇၾင်လိၼ် တႅၵ်ႇတိူဝ်ႉသႂ်ႇ ၽွင်ႈၶီႇရူတ်ႉၶိူင်ႈ တေၵႂႃႇသူၼ် ဝႃႈၼႆ။
မိူဝ်ႈၼႆႉ ဝၼ်းတီႈ 20/5/2021 ယၢမ်းဝၢႆးဝၼ်း မွၵ်ႈ 2 မူင်းပၢႆ ၸၢႆးလၢဝ်သႂ် ဢႃယု 25 ပီ ၽႃႇၺႃးမၢၵ်ႇၾင်လိၼ် ၼိူဝ် သဵၼ်ႈတၢင်း ဢၼ်မီးတၢင်းၾၢႆႇတူၵ်းဝၢၼ်ႈပၢင်ႁၢတ်ႇ ဢိူင်ႇပၢင်လူင် ၸႄႈဝဵင်းၼမ်ႉတူႈ။ မၢၵ်ႇတႅၵ်ႇတိူဝ်ႉသႂ်ႇၸွမ်းၶႃ မၼ်းၸၢႆး ။
ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်မိူဝ်ႈၵႆႈၼႆႉ မၼ်းၸၢႆးၶီႇရူတ်ႉ ၶိူင်ႈသေ တေၵႂႃႇသူၼ် ၵႂႃႇၽႃႇၺႃး မၢၵ်ႇႁၢင်ႈၵၢင်ဝႆႉ တီႈၸွမ်းတၢင်း တၢင်းၾၢႆႇတူၵ်းဝၢၼ်ႈပၢင်ႁၢတ်ႇၼၼ်ႉၶႃႈ။ မၢၵ်ႇ ၼၼ်ႉ တိူဝ်ႉတႅၵ်ႇသႂ်ႇၸွမ်းၶႃႈမၼ်းၸၢႆး ၶႃႈဢေႃႈ၊ ၵတ်းၵႃႈမၼ်းၶီႇရူတ်ႉၶိူင်ႈလႃႈ”- ဝႃႈၼႆ။
ယၢမ်းလဵဝ် ၸၢႆးလၢဝ်သႂ် ၵူၼ်းၼုမ်ႇ ဢႃယု 25 ပီၼၼ်ႉတႄႉ လႆႈယူတ်းယႃတူဝ်ဝႆႉယူႇ တီႈႁိူၼ်းယေးမၼ်းၸၢႆး ဝၢၼ်ႈပၢင် ႁၢတ်ႇဝႆႉ ဝႃႈၼႆ။
“မၢၵ်ႇၼႆႉၸုမ်းယိပ်းၵွင်ႈၵၢင်ႇၸၢဝ်းၶိူဝ်းဢၼ်တူင်ႉၼိုင်ပွတ်းၼႆႉမႃး ႁၢင်ႈၵၢင်ဝႆႉသေ လႅပ်ႈၶဝ်တေၵူႈ/ၵဵပ်းၶိုၼ်း ဢမ်ႇမူတ်းၼႆႉၶႃႈၼေႈ။ ယၢမ်း လဵဝ် တူဝ်ၸၢႆးလၢဝ်သႂ်တႄႉ လႆႈယူတ်းယႃဝႆႉတီႈ ႁိူၼ်းယေး။ ဢမ်ႇထိုင်တီႈလႆႈမႆႈၸႂ်ၼင်ႇၵဝ်ႇၶႃႈ။ လႆႈငိၼ်းဝႃႈ သိုၵ်းလွႆၶဝ် ၶိုၼ်းမႃးယူတ်း ယႃပၼ်ဝႆႉယူႇၼႆၶႃႈဢေႃႈ”- ၵူၼ်းပိုၼ်ႉတီႈ ၼႂ်းဢိူင်ႇပၢင်လူင် သိုပ်ႇလၢတ်ႈၼႄၼင်ႇၼႆ။
ၼႂ်းလိူၼ်မေႊၼႆႉၵူၺ်း ၵူၼ်းမိူင်းၼမ်ႉတူႈ ယဵပ်ႇၺႃးမၢၵ်ႇၾင်လိၼ် တႅၵ်ႇတိူဝ်ႉသႂ်ႇ ဢမ်ႇယွမ်း 3 ၵေႃႉၼႆႉယဝ်ႉ။
ၵူၼ်းပၢႆႈၽေးသိုၵ်း ပွတ်းၼမ်ႉတူႈတႄႉ ယၢမ်ႈၶၢင်းပွင်ႉတုၵ်းယွၼ်းလၢတ်ႈတီႈၽူႈတွႆႇႁွၵ်ႈဝႃႈ – ႁႂ်ႈသိုၵ်းၶဝ်ၵႂႃႇၾင်မၢၵ်ႇတေႃႇၵၼ်ၼႂ်းထိူၼ်ႇတီႈဢမ်ႇၸႂ်ႈႁိမ်းဝၢၼ်ႈၵူၼ်းပုၼ်ႉ။ ၸိူဝ်းဢၼ်ၶဝ်လႆႈၾင်ဝႆႉၼၼ်ႉႁႂ်ႈမႃးၵဵပ်းဢဝ်ၵႂႃႇၶိုၼ်းမူတ်းမူတ်း။ ယွၼ်ႉဝႃႈ ဢၼ်ယဵပ်ႇၺႃးသေမၢတ်ႇၸဵပ်းလူႉတၢႆ ၵုမ်ႇပဵၼ်ၵူၼ်းဝၢၼ်ႈၵူၺ်း – ဝႃႈၼႆ။
မိူဝ်ႈဝၼ်းတီႈ 16/5/2021 ယၢမ်းၵၢင်ဝၼ်း မွၵ်ႈ 12 မူင်းၼၼ်ႉၵေႃႈ ၸၢႆးသၢၼ်း ဢႃယု 35 ပီ လႄႈမေးၼၢင်းမၼ်း ၵူၼ်း ဝၢၼ်ႈပၢင်လူင် ၵႂႃႇႁဵတ်းသူၼ် တၢင်းဝၢၼ်ႈၼမ်ႉမၢဝ်း ဢၼ်မီးၾၢႆႇတူၵ်းဝၢၼ်ႈပၢင်လူင်၊ ၾၢႆႇႁွင်ႇဝၢၼ်ႈယေႇဢူဝ်း ၼႂ်း ၸႄႈဝဵင်းၼမ်ႉတူႈ ။ ၵႂႃႇယဵပ်ႇၺႃးမၢၵ်ႇ တႅၵ်ႇတိူဝ်ႉသႂ်ႇ ၸၢႆးသၢၼ်းလူႉတၢႆထင်တီႈ ၊ မေးၼၢင်းမၼ်းမၢတ်ႇၸဵပ်း။
မိူဝ်ႈဝၼ်းတီႈ 9/5/2021 ယၢမ်းဝၢႆးႁူဝ်ၶမ်ႈ မွၵ်ႈ 5 မူင်းၼၼ်ႉၵေႃႈ ၸၢႆးဢၢႆႈတႄႉ ဢႃယု 21 ပီ ၵႂႃႇထႆသူၼ် ဢၼ်မီးၾၢႆႇ တူၵ်းဝၢၼ်ႈသၢမ်ၶႃ ယၢၼ်ဝၢၼ်ႈမွၵ်ႈၼိုင်ႈလၵ်းပၢႆ ၼႂ်းဢိူင်ႇမိူင်းမူႉ ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ မၼ်းၸၢႆး ယဵပ်ႇၺႃးမၢၵ်ႇၾင်လိၼ် လုၵ်ႈၼိုင်ႈတႅၵ်ႇတိူဝ်ႉသႂ်ႇသေ လႆႈလူႉတၢႆ ထင်တီႈၼင်ႇၵဝ်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ