မိူဝ်ႈဝႃး ဝၼ်းတီႈ 18/5/2021 ယၢမ်းၵၢင်ဝၼ်းတဵင် ၾႃႉၽႃႇသႂ်ႇ ထၢတ်ႈမူၺ်ႇတေႃႇတိုင်ၶမ်း/ ၵဵင်းလိူၼ် ၼႂ်းဢိူင်ႇၵဵင်းလိူၼ် ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မိူဝ်ႈဝႃးၼႆႉၾႃႉငိုပ်းလူင်မႃး ၵမ်ႉၼိုင်ႈသေၵေႃႈၽႃႇလူင်းသႂ်ႇတီႈ ထၢတ်ႈၵဵင်းလိူၼ်ၶႃႈ။ ၽႃႇတိူဝ်ႉ ထၢတ်ႈသူႇလူင်ၶႃႈဢေႃႈ။ ၵူၺ်းၵႃႈ တီႈ ထုင်ႉၼၼ်ႉသမ်ႉ ထၢတ်ႈၵွင်းမူးၵဵင်းလိူၼ်ႁဝ်းၶႃႈၼႆႉ ယူႇသုင်လိူဝ်ပိူၼ်ႈဝႆႉႁဵတ်းၼႆၶႃႈဢေႃႈ”- ဝႃႈၼႆ။
ထၢတ်ႈတိုင်ၶမ်း/ ၵဵင်းလိူၼ်ၼႆႉ မီးယူႇဝႆႉၼႂ်းဢိူင်ႇၵဵင်းလိူၼ် မီးၾၢႆႇဢွၵ်ႇၵေးသီး ယၢၼ်ၵေးသီး မွၵ်ႈ 18 လၵ်း မီးဝႆႉၼႂ်း ၼႃႈတီႈ SSPP ၵုမ်းၵမ် ယၢၼ်ၵႆ ငဝ်ႈငုၼ်း SSPP မွၵ်ႈ 6 လၵ်း။
“လွင်ႈၾႃႉၽႃႇသႂ်ႇ တီႈထၢတ်ႈၵဵင်းလိူၼ်ၼႆႉ ဢမ်ႇၸႂ်ႈဝႃႈ ပွၵ်ႈၼႆႉ ပဵၼ်ပွၵ်ႈ ၵမ်းဢွၼ်တၢင်းသုတ်းၶႃႈ ။ ပေႃးၶႃႈတွင်းဢမ်ႇၽိတ်းတႄႉ ၼႂ်းပီ 2014 ၵေႃႈယၢမ်ႈၽႃႇမႃးပွၵ်ႈၼိုင်ႈယဝ်ႉ။ လႆႈငိၼ်းၵူၼ်းထဝ်ႈၶဝ် လၢတ်ႈတႄႉ ဢမ်ႇၵႃး 2 ပွၵ်ႈၼႆႉၼႆၶႃႈဝႃႇ မိူဝ်ႈၵွၼ်ႇၼႃႇၼၼ်ႉၵေႃႈ ယၢမ်ႈၽႃႇသႂ်ႇယူႇ ၼႆဝႃႇ”- ၽူႈတူင်ႉၼိုင် ၼႂ်းတူင်ႇဝူင်း ၵူၼ်းၵေးသီး သိုပ်ႇလၢတ်ႈၼႄၼင်ႇၼႆ။
ထၢတ်ႈမူၺ်ႇတေႃႇတိုင်ၶမ်း/ ၵဵင်းလိူၼ်ၼႆႉ ပဵၼ်ထၢတ်ႈမဵတ်ႈသူႇၼိုင်ႈ ပေႃးထိုင်မႃး လိူၼ်သီႇမူၼ်းၼႆ မႃးၶိုၼ်ႈထၢတ်ႈ ႁူမ်ႈၵိၼ် ႁူမ်ႈလူႇတၢၼ်း လွင်းသွမ်း ၸိူဝ်းၼႆႉ ၵူၼ်းၵိုၼ်းၶွၼ်ႈၵူႈပီ ၼႆယဝ်ႉ။
