ဢိင်ၼိူဝ် ပၢင်တိုၵ်း ၶွင်ႇသီႇသိုၵ်းမၢၼ်ႈ တင်း သိုၵ်းၶၢင် KIA ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းၸႄႈဝဵင်းမိူင်းမွၵ်ႇသေ ၵူၼ်း မိူင်းၸၢဝ်းတႆး ႁူဝ်ၵူၼ်း ၸမ် 5 ႁဵင်ပၢႆ ပၢႆႈၽေးသိုၵ်း ပႆႇၸၢင်ႈပွၵ်ႈႁိူၼ်းယေး မီးၶၢဝ်းတၢင်း လိူၼ်ပၢႆယဝ်ႉ။
တႄႇဢဝ် ဝၼ်းတီႈ 10/4/2021 ၼၼ်ႉမႃး တေႃႇထိုင်ယၢမ်းလဵဝ် ပီႈၼွင်ႉၸၢဝ်းတႆး ႁူဝ်ၵူၼ်း ၸမ် 5 ႁဵင် တႃႇ 50 ဝၢၼ်ႈပၢႆ ၼႂ်းၸႄႈဝဵင်းမိူင်းမွၵ်ႇ လႆႈပၢႆႈၽေးသိုၵ်း ၵႂႃႇသွၼ်ႈဝႆႉ ၼႂ်းၸႄႈဝဵင်းမၢၼ်ႈမေႃႇ ၸႄႈမိူင်းၶၢင်သေ ပႆႇၸၢင်ႈပွၵ်ႈႁိူၼ်းယေး ။ ယွၼ်ႉငဝ်းလၢႆးၼႂ်းပိုၼ်ႉတီႈ ပႆႇၼိမ်ယဵၼ် ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉၼႂ်း ပိုၼ်ႉတီႈပႆႇၼိမ်လႄႈ ပႆႇၸၢင်ႈပွၵ်ႈ ႁိူၼ်း။ ယၢမ်းလဵဝ်တႄႉ ၵူၼ်းပၢႆႈၽေး လူဝ်ႇတင်းၸွႆႈထႅမ် ပဵၼ်ၽႃႈယၢင် တႃႇႁဵတ်းသုမ်ႉသွင်း၊ ပေႃး ၽူၼ်တူၵ်းမႃး တီႈယူႇတၼ်းသဝ်း တီႈႁဵတ်းၵိၼ်ၶဝ်ႈၽၵ်း ၸိူဝ်းၼႆႉတေယၢပ်ႇ။ ၼွၵ်ႈလိူဝ်ၼၼ်ႉ ဢၼ်လူဝ်ႇထႅင်ႈပဵၼ်ၽႃႈၵၢင်ယုင်း သုတ်းမုင်းလႄႈ ယႃႈယႃ ၸိူဝ်းၼႆႉ ။ လွင်ႈၵိၼ်ယႅမ်ႉတႄႉ မီးပီႈၼွင်ႉႁဝ်းၶႃႈ တီႈၸမ်ၵႆ မႃးၸွႆႈယူႇၶႃႈ”- ဝႃႈၼႆ။
ၵူၼ်းပၢႆႈၽေး မိူင်းမွၵ်ႇ ႁူဝ်ၵူၼ်း 4,800 ပၢႆ ဢၼ်ပၢႆႈမႃးသွၼ်ႈဝႆႉတီႈၸႄႈ ဝဵင်းမၢၼ်ႈမေႃႇၼႆႉ ၵမ်ႈၼမ် ပဵၼ်ပီႈၼွင်ႉ ၸၢဝ်းတႆး။ လႆႈယူႇသဝ်းဝႆႉၸွမ်း ပၢင်သဝ်းၵူၼ်း ပၢႆႈၽေး၊ ဝတ်ႉဝႃး၊ ၸွမ်းႁိူၼ်းပီႈၼွင်ႉ ၸိူဝ်းၼႆႉ။
ထႅင်ႈၾၢႆႇၼိုင်ႈၵေႃႈ ၵူၼ်းပၢႆႈၽေးသိုၵ်းၼႆႉ လုၵ်ႈဢွၼ်ႇၵေႃႈၼမ်လႄႈ တွၼ်ႈတႃႇပိုၼ်ႉႁူႉတၢင်းမေႃ တႃႇၶိုၼ်ႈယႂ်ႇမႂ်ႇသုင် ဢၼ်ပဵၼ်ၵၢၼ်သွၼ် ၵၢၼ်ႁဵၼ်း လႆႈၵိုတ်းလိုဝ်ႈဝႆႉ။
“တႃႇလုၵ်ႈဢွၼ်ႇတႄႉ ႁူႉဝႃႈ လဵၼ်ႈ၊ ၼွၼ်း၊ လုၵ်ႉ ၸိူဝ်းၼႆႉၵူၺ်း တႃႇပၢႆးပၺ်ႇၺႃႇတႄႉ ဢမ်ႇလႆႈႁဵၼ်းႁူႉသင်ၶႃႈ သုမ်းၶၢဝ်းယၢမ်း ၶၢတ်ႇၵၢၼ်ႁဵၼ်းၶႃႈဢေႃႈ။ ၵူၺ်းၵႃႈ သင်မီးၸဝ်ႈၸေႇတၼႃႇၶဝ် မႃးၸွႆႈၶိူင်ႈၵမ်ႉၸွႆႈၵၢၼ် ႁဵၼ်းၼႆ တေလီၶႃႈဢေႃႈ။ ၼင်ႇႁိုဝ်လုၵ်ႈဢွၼ်ႇ တေဢမ်ႇသုမ်းၶၢဝ်းယၢမ်း ႁႂ်ႈၶဝ်ၽိုၵ်းတႅမ်ႈလိၵ်ႈ ၸၼ်ႁၢင်ႈ ၵၼ်ၸိူဝ်းၼႆႉ”- ၽူႈၸွႆႈထႅမ် ၵေႃႇမတီႇၵူၼ်းပၢႆႈၽေး သိုပ်ႇလၢတ်ႈၼႄၼင်ႇၼႆ။
ပၢင်တိုၵ်ႈတၢင်းၸႄႈဝဵင်းမိူင်းမွၵ်ႇၼႆႉ ယွၼ်ႉသိုၵ်းမၢၼ်ႈ ၸႂ်ႉၶိူင်ႈမိၼ်သေ ယိုဝ်းသႂ်ႇ ၼႂ်းဝၢၼ်ႈၼႂ်းသူၼ်လႄႈ ႁိူၼ်းယေး ၵူၼ်းဝၢၼ်ႈလႆႈလူႉၵွႆၼမ် ၼႆယဝ်ႉ။
မိူဝ်ႈဝၼ်းတီႈ 3/5/2021 ၼၼ်ႉၵေႃႈ သိုၵ်းမၢၼ်ႈတင်း သိုၵ်းၶၢင် ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းၸႄႈဝဵင်းမိူင်းမွၵ်ႇ ၸၢၵ်ႇမၢၵ်ႇလူင် တိူဝ်ႉသႂ်ႇမုၼ်ၸဝ်ႈ ဝၢၼ်ႈၵုင်းလေႃး လွၼ်ႇၵႂႃႇတူၼ်ၼိုင်ႈ။ တိူဝ်ႉသႂ်ႇၵူၼ်းမိူင်းလႆႈလူႉတၢႆ 3 ၵေႃႉ။ ႁိူၼ်းယေးၵူၼ်းဝၢၼ်ႈၵွႆၼမ်။ ၶိူင်ႈမိၼ်သိုၵ်းမၢၼ်ႈတူၵ်းၵွႆလမ်းၼိုင်ႈ။ သိုၵ်းမၢၼ်ႈတၢႆ 3 ၵေႃႉ။
