သိုၵ်းမၢၼ်ႈ ယိုဝ်းၵွင်ႈ လွၵ်ႇၵူၼ်းဝၢၼ်ႈ ၼႂ်းၸႄႈမိူင်းၶၢင် ႁဵတ်းႁႂ်ႈၵူၼ်းဝၢၼ်ႈ ဢမ်ႇၸၢင်ႈႁဵတ်းၵၢၼ် ႁဵတ်းငၢၼ်း ဢမ်ႇ ႁတ်းၵႂႃႇဢဝ် ၶူဝ်းၼႂ်းသူၼ်ၼႂ်းၼႃး ဝႃႈၼႆ။

ၶွင်ႇသီႇသိုၵ်းမၢၼ်ႈ  ယိုဝ်းၵွင်ႈ  ၵူႈႁူးၵူႈတၢင်း  ၵူၼ်းဝၢၼ်ႈၵူၼ်းသူၼ် ၼႂ်းၸႄႈဝဵင်းမိူင်းမွၵ်ႇ ၸႄႈမိူင်း ၶၢင် တူၵ်းၸႂ်ၵူဝ်ယၢၼ်ႈ၊ ယၢမ်းလဵဝ်သမ်ႉ ပဵၼ်ၶၢဝ်း ဢဝ်ထူဝ်ႇလိၼ် ၶဝ်ႈၵၢပ်ႇ ၶူဝ်းသူၼ်ၶူဝ်းႁႆႈယဝ်ႉလႄႈႁဵတ်းႁႂ်ႈၵူၼ်းဝၢၼ်ႈ  ယၢပ်ႇ ၽိုတ်ႇ  တႃႇၵဵပ်းမၢၵ်ႇၶဝ်ႈတဝ်ႈၼမ်ႉ ၼႆယဝ်ႉ။

ၵူၼ်းမိူင်းမွၵ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ် တီႈဝၢၼ်ႈၸႄႈႁၵ်ႉ၊ ၵုင်းလေႃး၊ ႁဵဝ်းႁၢႆ ၸိူဝ်းၼႆႉ ၶဝ်ၽုၵ်ႇဝႆႉထူဝ်ႇလိၼ်၊ ၶဝ်ႈၵၢပ်ႇ၊ တႅင်ၸၢမ်ႇပူႇ/ တႅင်ၾၢင်၊ ထူဝ်ႇၶူၼ် ၸိူဝ်းၼႆႉ မီးဢေႊၶိူဝ်ႊမွၵ်ႈႁဵင် ယွၼ်ႉဝႃႈ ယၢမ်းလဵဝ်ၼႆႉ လူဝ်ႇၵႂႃႇဢဝ်ယဝ်ႉလႄႈ ၶဝ်ဢမ်ႇၸၢင်ႈၵႂႃႇဢဝ်။ ပေႃးတေၵႂႃႇသူၼ်ၼႆ သိုၵ်းမၢၼ်ႈ ဢဝ်ၵွင်ႈယိုဝ်းလွၵ်ႈ ငိုတ်ႈႁဵတ်းၼႆတိၵ်းတိၵ်းလႄႈ ၵူၼ်းဝၢၼ်ႈ ဢမ်ႇႁတ်းၵႂႃႇၵၼ် ပဵၼ်ဢၼ်ယၢပ်ႇၽိုတ်ႇတႄႉတႄႉၶႃႈ”- ဝႃႈၼႆ။

 ၵွပ်ႈၼႆလႄႈ ၵူၼ်းဝၢၼ်ႈၸၢဝ်းတႆး မွၵ်ႈ 8 -9 ဝၢၼ်ႈၼႆႉ ဢွၼ်ၵၼ်ထူပ်းတၢင်းယၢပ်ႇၽိုတ်ႇ ဢမ်ႇၸၢင်ႈၵႂႃႇဢဝ်ၶူဝ်း ၼႂ်းသူၼ်/ ၼႃး ။ ၾၢႆႇၼိုင်ႈၵေႃႈ ၸမ်ထိုင်ၶၢဝ်းၼႃး ယဝ်ႉလႄႈ ဢမ်ႇၸၢင်ႈၵႂႃႇ ႁၢင်ႈႁႅၼ်းၶိုင်ပွင်တႃႇၽုၵ်ႇၶဝ်ႈ ၼႆယဝ်ႉ။  

“ပီၼႆႉ ၼႃးႁဝ်းၶႃႈတႄႉ လူဝ်ႇပွႆႇ ႁၢမ်းၵူၺ်းၶႃႈယူဝ်ႉ  ။ ဢမ်ႇလႆႈၵႂႃႇလုမ်းလႃးသင်လႄႈ တေဢမ်ႇၸၢင်ႈၽုၵ်ႈ သွမ်ႈႁဵတ်းယဝ်ႉ ပဵၼ်ဢၼ်ယၢပ်ႇတႄႉၶႃႈ။ ထိုင်ၶၢဝ်းယၢမ်း ဢၼ်တေလႆႈပၢတ်ႇ မီးပဵၼ်လၢႆဢေႊၶိူဝ်ႊၶႃႈဢေႃႈ။ ၵမ်ႈၼမ် ၵူၼ်းတင်းၼႆႉ ပဵၼ်ၵူၼ်းႁဵတ်းသူၼ်ၼႃးလႄႈ သင်ဝႃး ယၢမ်းလဵဝ် ဢမ်ႇဢဝ်ဝႆႉ ႁဵတ်းဝႆႉၸိုင် မိူဝ်းၼႃႈမႃး တေႁူပ်တၢင်း ယၢပ်ႇၶႃႈဢေႃႈ”-  ဝႃႈၼႆ။

ၸုမ်းသိုၵ်းမၢၼ်ႈလႄႈ သိုင်းၶၢင် KIA ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸႄႈဝဵင်းမိူင်းမွၵ်ႇ ၸႄႈမိူင်းၶၢင်ၼႆႉ တႄႇပဵၼ်မႃး မိူဝ်ႈႁၢင်ႈလိူၼ်ဢေႊၿရိူဝ်ႊၼၼ်ႉသေ ၵူၼ်းမိူင်း ၼပ်ႉႁူဝ်ႁဵင်လႆႈပၢႆႈယၢၼ်ႁိူၼ်းယေး တီႈယူႇၵၼ် တေႃႇထိုင်ယၢမ်းလဵဝ် ပႆႇၸၢင်ႈပွၵ်ႈႁိူၼ်းယေးၵၼ် ၼႆယဝ်ႉ။