ဝၼ်းတီႈ 2 လိူၼ်ၾႅပ်ႉပိဝ်ႊရီႊ ယၢမ်းၵၢင်ၼႂ် 9 မူင်းပၢႆ မၢၵ်ႇၵွင်ႈလူင် တူၵ်းသႂ်ႇတီႈႁွင်ႈသွၼ်လိၵ်ႈ လုၵ်ႈႁဵၼ်းၸၼ်ႉဢွၼ်ႇ KG ၼႂ်းဝၢင်းႁူင်းႁဵၼ်းၸၼ်ႉသုင် မၢႆ 1 (အထက) ပွၵ်ႉ မဵဝ်ႉမ ဝဵင်းၽႃၵၢၼ်ႉ ၸႄႈမိူင်းၶၢင်။လုၵ်ႈဢွၼ်ႇယိင်း ၵေႃႉၼိုင်ႈလႄႈ လုၵ်ႈဢွၼ်ႇၸၢႆးၵေႃႉၼိုင်ႈ မၢတ်ႇၸဵပ်းၵႂႃႇၸွမ်း ဝႃႈၼႆ။

ႁူင်းႁဵၼ်းၸၼ်ႉသုင်လင်ၼႆႉ မီးၸမ်တပ်ႉမ 33 ၊ ယူႇတႂ်ႈၵွင်းပိဝ်ႇႁႃႇသိုၵ်းမၢၼ်ႈ။ မၢၵ်ႇဢၼ်မႃးတူၵ်းတႅၵ်ႇ သႂ်ႇတီႈႁူင်းႁဵၼ်းၼၼ်ႉၵေႃႈႁႅင်းတၢၼ်ႇတၢၼ်ႇမၼ်းယူႇလႄႈ ပဵၼ်မၢၵ်ႇလူင်ၶွင် သိုၵ်းၸုမ်းလႂ်ၼႆ ပႆႇယိုၼ်ယၼ်လႆႈၼႆ ၵူၼ်းမိူင်းပိုၼ်ႉတီႈဝဵင်းၽႃၵၢၼ်ႉ လၢတ်ႈၼင်ႇၼႆ။

ၸဝ်ႈသိုၵ်းလူင် ၼေႃႇပူႇ ၽူႈၶၢၼ်ပၢၵ်ႇၸုမ်းသိုၵ်းၶၢင် KIA ၵေႃႈ တွပ်ႇလၢတ်ႈတီႈသိုဝ်ႇၶၢဝ်ႇဝႆႉဝႃႈ “မိူဝ်ႈလဵဝ် ပဵၼ်ပၢင်တိုၵ်းၵၼ်ဝႆႉလႄႈ တေပဵၼ်မၢၵ်ႇၵွင်ႈၸုမ်းလႂ်ၼႆတႄႉ ပႆႇၸၢင်ႈယိုၼ်ယၼ်လႆႈ။ မၢၵ်ႇၵွင်ႈၾၢႆႇၸုမ်းသိုၵ်း KIA ႁဝ်းၵေႃႈၸၢင်ႈပဵၼ်လႆႈ။ ၾၢႆႇသိုၵ်းမၢၼ်ႈၵေႃႈ ၸၢင်ႈပဵၼ်လႆႈယူႇ” ဝႃႈၼႆ။

တႄႇဝၼ်းတီႈ 31 လိူၼ်ၵျႅၼ်ႊၼိဝ်ႊရီႊမႃး တေႃႇထိုင်ႁူဝ်လိူၼ်ၾႅပ်ႉပိဝ်ႊရီႊၼႆႉ သိုၵ်းမၢၼ်ႈ တင်း သိုၵ်းၶၢင် KIA ပဵၼ်ပၢင်တိုၵ်းၵၼ်ယူႇသၢမ်တီႈ ၸွမ်းႁိမ်းႁွမ်းဝၢၼ်ႈသၢႆးတွင် (ဆိုင်းတောင်ရွာ) ၸႄႈဝဵင်းၽႃၵၢၼ်ႉ။ ယွၼ်ႉသိုၵ်းမၢၼ်ႈဢဝ်ႁႅင်းၵူၼ်းသိုၵ်း ၽိုတ်ႉၶဝ်ႈၵႂႃႇၸွမ်းဝၢၼ်ႈသၢႆးတွင်လႄႈ လႆႈပဵၼ်ပၢင်တိုၵ်းၵၼ်ႁၢဝ်ႈ ႁႅင်းဝႆႉ ၼႆယဝ်ႉ။

ၵဵဝ်ႇလူၺ်ႈလွင်ႈမၢၵ်ႇၶိူင်ႈၵွင်ႈလူင် တူၵ်းသႂ်ႇတီႈႁူင်းႁဵၼ်းယဝ်ႉ လုၵ်ႈဢွၼ်ႇတိူဝ်ႉၺႃးၸၢၵ်ႇမၢၵ်ႇၵႂႃႇၼၼ်ႉ တႄႉ ၾၢႆႇသိုၵ်းမၢၼ်ႈယိုတ်းမိူင်း ယင်းပႆႇပိုၼ်ၽၢဝ်ႇဢွၵ်ႇသင်ဝႆႉ ပဵၼ် တၢင်းၵၢၼ်။