ဝၼ်းသိုၵ်းမၢၼ်ႈၸတ်းပၢင်လိူၵ်ႈတင်ႈ ပွၵ်ႈၵမ်း (3) ဝၼ်းမိူဝ်ႈၼႆႉ တင်ႈတႄႇယၢမ်းၵၢင်ၼႂ်ၸဝ်ႉမႃး သဵင်ၵွင်ႈသဵင်မၢၵ်ႇပၼ်းၼႂ်းဝဵင်းၽႃၵၢၼ်ႉ ၸႄႈမိူင်းၶၢင်။

သိုၵ်းမၢၼ်ႈ တင်း သိုၵ်းၶၢင် KIA ပဵၼ်ပၢင်တိုၵ်းၵၼ်ႁၢဝ်ႈႁႅင်း တၢင်း ႁူင်းပလိၵ်ႈ ဝဵင်း ၽႃၵၢၼ်ႉ သဵင်ၵွင်ႈ သဵင်မၢၵ်ႇပၼ်းဢမ်ႇထၢတ်ႇတၢင်းၼႂ်ၼႆ ၵူၼ်းမိူင်းပိုၼ်ႉတီႈ လၢတ်ႈၼင်ႇ ၼႆ။

“ၼႂ်ၼႆႉ သဵင်ၵွင်ႈသဵင်မၢၵ်ႇပၼ်းယူႇတၢင်းၼႂ် ဢမ်ႇပႆႇထၢတ်ႇ။ ၸဵမ်မိူဝ်ႈၵၢင်ၼႂ်ၸဝ်ႉၼၼ်ႉယဝ်ႉ။ မိူဝ်ႈၼႆႉသမ်ႉပဵၼ် ဝၼ်းဢၼ်တေလႆႈၵႂႃႇၶိုၼ်ႈၵျွင်းၽြႃးၶၢင် (Church) သဵင်ယိုဝ်း ၵၼ် ပၼ်းႁႅင်းၼႃႇလႄႈ ဢွၼ်ၵၼ်ၵူဝ်ႁႄ ဢမ်ႇလႆႈၵႂႃႇပႅတ်ႈ” ဝႃႈၼႆ။

လႆႈႁူႉဝႃႈ ၸဵမ်မိူဝ်ႈပႆႇထိုင်ဝၼ်းၸတ်းပၢင်လိူၵ်ႈတင်ႈ သိုၵ်းမၢၼ်ႈ ဢဝ်ႁႅင်းသိုၵ်းၶဵင်ႈၶႅင် လွင်ႈႁူမ်ႇလူမ်ႈဝဵင်းဝႆႉ ၼႅၼ်ႈၼႃၸွမ်းတၢင်းၶဝ်ႈတၢင်းဢွၵ်ႇဝဵင်းၽႃၵၢၼ်ႉဝႆႉ ဝႃႈၼႆ။

လိူဝ်ၼၼ်ႉ သိုၵ်းမၢၼ်ႈ တင်း ၸုမ်းသိုၵ်းလုၵ်ႉၽိုၼ်ႉ ၶႅင်ႇၵၼ်ယိုဝ်းၵွင်ႈလူင်သႂ်ႇၵၼ်လႄႈ မၢၵ်ႇလူင်ၵႂႃႇတူၵ်းသႂ်ႇၸွမ်းႁိမ်းႁွမ်းႁူင်းပၼ်သဵင် ဢၼ်သိုၵ်းမၢၼ်ႈယိုတ်းမိူင်း ၶပ်းၶိုင် ၸတ်းဝႆႉၼႂ်းဝဵင်းၽႃၵၢၼ်ႉၼၼ်ႉ ၼႆယဝ်ႉ။

ယွၼ်ႉပဵၼ်ပၢင်တိုၵ်းၵၼ်ၼႂ်းဝဵင်းၽႃၵၢၼ်ႉလႄႈ ၵူၼ်းမိူင်းမွၵ်ႈ 5 ၵေႃႉတိူဝ်ႉမၢတ်ႇၸဵပ်းဝႆႉသေ ယၢမ်းလဵဝ် ၼႂ်းပွၵ်ႉၼႂ်းယွမ်ႇဝဵင်းၽႃၵၢၼ်ႉ ဢမ်ႇမီးၵူၼ်းၵႂႃႇမႃး သဵင်​​​​​ပေႃးယဵၼ်သီႇသီႇ ဝႃႈၼႆ ။

မိူဝ်ႈတႄႇ သိုၵ်းမၢၼ်ႈယိုတ်းမိူင်း ၶပ်းၶိုင်ဢၢၼ်းၸတ်းႁဵတ်း ပၢင်လိူၵ်ႈတင်ႈ တီႈဝဵင်းၽႃၵၢၼ်ႉ၊ မၢၼ်ႈၸေႈ (မံစီ) ၊ မိူင်းမွၵ်ႇ (မိုးမောက်)ယူႇသေတႃႉ ယွၼ်ႉငဝ်းလၢႆးၼႂ်းပိုၼ်ႉတီႈ ဢမ်ႇၼိမ်သဝ်းလႄႈ ၸမ်ဝၼ်းပၢင်လိူၵ်ႈတင်ႈမႃး ၾၢႆႇၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈမိူင်းႁူမ်ႈတုမ် ၸင်ႇလႆႈပိုၼ်ၽၢဝ်ႇဢွၵ်ႇဝႃႈ ယွၼ်ႉလွင်ႈႁူမ်ႇလူမ်ႈသေ ဢမ်ႇပဵၼ်ၸတ်း ႁဵတ်းတီႈ မၢၼ်ႈၸေႈ တင်း မိူင်းမွၵ်ႇယဝ်ႉ ဝႃႈၼႆ။

ယၢမ်းလဵဝ်ၼႂ်းမိူင်းၶၢင်ၼႆႉ သိုၵ်းမၢၼ်ႈၸတ်းႁဵတ်းလႆႈ ပၢင်လိူၵ်ႈတင်ႈပွၵ်ႈၵမ်း 3 ၸွမ်းၼႂ်းၸႄႈဝဵင်းၽႃၵၢၼ်ႉ လႄႈ ၸႄႈဝဵင်းသူၺ်ႇၵူႇသေတႃႉ ၼႂ်းဝဵင်းၽႃၵၢၼ်ႉတႄႉ သိုၵ်းတင်းသွင်ၾၢႆႇယိုဝ်းၵၼ်ဝႆႉယူႇ ၼႆယဝ်ႉ။