ၵူၼ်းမိူင်း သီႇပေႃႉၵႆႉၵႆႉၺႃးယိုဝ်းတၢႆ ဢမ်ႇမီးလွင်ႈႁူမ်ႇလူမ်ႈ

ၼႂ်းႁၢင်လိူၼ် ဢေႊပရိူဝ်ႊမႃးတေႃႇထိုင်ယၢမ်းလဵဝ် ၼႂ်းၸႄႈဝဵင်းသီႇပေႃႉၵႆႉမီးလွင်ႈမၢၵ်ႇတႅၵ်ႇ ၊ ၵူၼ်းယိပ်းၵွင်ႈ ၶဝ်ႈယိုဝ်းထိုင်ၼႂ်းႁိူၼ်း ၼႂ်းသူၼ်ၸိူဝ်းၼႆႉ ႁဵတ်းႁႂ်ႈမီးလွင်ႈလူႉတၢႆဢမ်ႇထၢတ်ႇ။  

ဝၼ်းသဝ်ပူၼ်ႉမႃး ဝၼ်းတီႈ 8/5/2021 ယၢမ်းၵၢင်ဝၼ်း ၽူႈၸၢႆး ဢႃယု မွၵ်ႈ 35 ပီ ထုၵ်ႇယိုဝ်းတၢႆ ႁိမ်းၶၢင်ႈတၢင်းလူင် ၼိူဝ်သဵၼ်ႈတၢင်း မိူင်းႁူမ်ႈတုမ် ႁိမ်းဝၢၼ်ႈၸၢမ်လဝ်း ဢိူင်ႇမိူင်းလင်း တၢင်းၾၢႆႇဢွၵ်ႇဝဵင်း ယၢၼ်ဝဵင်း မွၵ်ႈ 14 လၵ်း ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ။

ၽူႈတူင်ႉၼိုင်တူင်ႇဝူင်းၵူၼ်း သီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ၽူႈၸၢႆး ထုၵ်ႇယိုဝ်းတၢႆ ထႅင်ႈၵေႃႉၼိုင်ႈ တီႈႁိမ်းဝၢၼ်ႈၸၢမ်လဝ်း။ ၸွမ်းတူဝ်မၼ်းၸၢႆး တိူဝ်ႉၺႃးမၢၵ်ႇၵွင်ႈပဵၼ်လၢႆတီႈၶႃႈဢေႃႈ။ တီႈၼၼ်ႈပိူၼ်ႈၵႆႉၺႃးယိုဝ်းၵျႃႉ  ယွၼ်ႉသင်တႄႉ ဢမ်ႇႁူႉၶႃႈ”-  ဝႃႈၼႆ။

ၵေႃႉၺႃးယိုဝ်းတၢႆၼႆႉ မၢၵ်ႇၵွင်ႈၶဝ်ႈၸွမ်းတူဝ်မၼ်းၸၢႆး ပဵၼ် လၢႆႁွႆးဝႆႉ။  မၢၵ်ႇၵွင်ႈၶဝ်ႈတီႈ ၵွင်းလင်၊ ၼႃႈဢူၵ်း၊ တီႈပုမ် ၸိူဝ်းၼႆႉ။

မိူဝ်ႈဝၼ်းတီႈ 28/4/2021 ၼၼ်ႉၵေႃႈ   ၸၢႆးလႃႉဝိၼ်း ၺႃးယိုဝ်းတၢႆ ပွႆႇဝႆႉ ၶၢင်ႈတၢင်း တီႈႁိမ်းဝၢၼ်ႈၸၢမ်လဝ်း ၼႆႉ ၼင်ႇၵဝ်ႇ၊ မၢၵ်ႇၵွင်ႈၶဝ်ႈတူဝ်မၼ်းၸၢႆး 3 ႁွႆး ။ ၼၼ်ႉၵေႃႈပဵၼ်ၼမ်ႉမိုဝ်း ၽႂ် ၸုမ်းလႂ်  ယွၼ်ႉ သင် မႃးယိုဝ်းတၢႆ ၽႂ်ဢမ်ႇႁူႉလွင်ႈတၢင်းမၼ်း ။

မိူဝ်ႈဝၼ်းတီႈ 16/4/2021 ယၢမ်းၵၢင်ၶမ်ႈ မွၵ်ႈ 7:45 မူင်းသမ်ႉ လုင်းၸၢႆးလႅင် ဢႃယု 54 ပီ ထုၵ်ႇၵူၼ်းႁၢႆႉၶဝ်ႈ ယိုဝ်း တၢႆ ထင် တီႈၵိုၵ်းႁိူၼ်းယေးမၼ်းၸၢႆး တီႈဝၢၼ်ႈၵုင်းသႃႇ ဢိူင်ႇၵုင်းသႃႇ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ။

ၼႂ်းလိူၼ်ဢေႊၿရိူဝ်ႊတင်း ႁူဝ်လိူၼ်မေႊမႃးၼႆႉ ၵူၼ်းမိူင်းသီႇပေႃႉ ထုၵ်ႇယိုဝ်းတၢႆ 3 ၵေႃႉယဝ်ႉ ၵူၺ်းၵႃႈ တူဝ်ၵူၼ်းႁၢႆႉ ၼၼ်ႉတႄႉ ယူႇတီႈပလိၵ်ႈ ဢမ်ႇတွၼ်ႉတီႉလႆႈသေပွၵ်ႈ ၼႆယဝ်ႉ။