မၢၵ်ႇၵွင်ႈ လုၵ်ႈၼိုင်ႈ ယိုဝ်းၶဝ်ႈမႃး တိူဝ်ႉသႂ်ႇ ၼႂ်းႁွင်ႈလိုဝ်ႈ(ႁွင်ႈၼွၼ်း) ၶွင်ၸဝ်ႈၶူး တီႈဝတ်ႉၸွၼ်ႊၸူဝ်ႇ ဝဵင်းမူႇၸေႊ ပဵၼ် မၢၵ်ႇၽႂ်ယိုဝ်းမႃး ဢမ်ႇႁူႉ။

မိူဝ်ႈဝႃး ဝၼ်းတီႈ 7/6/2023 ယၢမ်းၵၢင်ၶမ်ႈမွၵ်ႈ 7:40 မူင်း မီးမၢၵ်ႇၵွင်ႈ လုၵ်ႈၼိုင်ႈ မႃးတိူဝ်ႉသႂ်ႇ တီႈၽႃဢုတ်ႇ ၼႂ်းႁွင်ႈလိုဝ်ႈ ၸဝ်ႈၶူး ဝတ်ႉၸွၼ်ႊၸူဝ်ႇ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၊ မၢၵ်ႇၵွင်ႈသႅတ်ႈသႂ်ႇသဝ်ၵျွင်းသေ ၶဝ်ႈၶမ်တီႈၽႃဢုတ်ႇၵျွင်း လွင်ႈမၢတ်ႇၸဵပ်းလူႉတၢႆတႄႉဢမ်ႇမီး။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇၵွင်ႈ ၸုမ်းလႂ်ယိုဝ်းမႃးတႄႉ ဢမ်ႇႁူႉ သဵၼ်ၶဝ်ႈမႃး ၼႂ်းႁွင်ႈ လိုဝ်ႈ ၸဝ်ႈၶူး ႁဝ်းၶႃႈသေ မႃးတိူဝ်ႉသႂ်ႇတီႈၽႃဢုတ်ႇဝႆႉ လုၵ်ႈၼိုင်ႈ။ မၢၵ်ႇၵွင်ႈလုၵ်ႈၼႆႉ တေလုၵ်ႉတၢင်းၼႃႈဝၼ်းတူၵ်းဝတ်ႉ သေ ၶဝ်ႈမႃး”- ဝႃႈၼႆ။

မိူဝ်ႈယၢမ်းၼၼ်ႉ တီႈၶူဝ်ပၢင်ႇၶမ်း သိုၵ်းမၢၼ်ႈတင်း ပျီႇတူႉၸိတ်ႉ ဢၼ်ပႂ်ႉဝႆႉတီႈၶူဝ်ၼၼ်ႉ လမ်းလိမ်းယိုဝ်းၵွင်ႈၶဝ် ၵႂႃႇတၢင်း ၼႂ်းတူင်ႈၼႃး တင်းၼမ်။

ၵူၼ်းပၢင်ႇၶမ်း ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈႁူဝ်ၶမ်ႈၼၼ်ႉ ၼႂ်းတူင်ႈၼႃး မီးၵူၼ်းၵေႃႉၼိုင်ႈတႆႈၾႆးသေၵႂႃႇမႃး၊ ၽွင်းၼၼ်ႉသိုၵ်းမၢၼ်ႈ တင်း ပျီႇတူႉၸိတ်ႉ မဵဝ်ႉမ ဢၼ်ပႂ်ႉတီႈၶူဝ်ၼႆႉသမ်ႉ ႁွင်ႉႁႂ်ႈၵိုတ်း၊ ၵူၼ်းၼႂ်းၼႃးဢမ်ႇၵိုတ်းသေပၢႆႈလႄႈ ၶဝ်လၢၵ်ႈၵွင်ႈယိုဝ်း။ ၶူဝ်ပၢင်ႇၶမ်း တင်း ပွၵ်ႉၸွၼ်ႊၸူဝ်ႇၼႆႉ ဢမ်ႇပေႃးၵႆၵၼ်ႁႅင်း။ ၶူဝ်ၼႆႉသမ်ႉ တေမီးၼႂ်းၵႄႈမူႇၸေႊ – ၼမ်ႉၶမ်း”- ဝႃႈၼႆ။

တီႈၶူဝ်ပၢင်ႇၶမ်း (ႁွင်ႉ) ၶူဝ်ၼမ်ႉပေႃႈၼႆႉ တေမီးသိုၵ်းမၢၼ်ႈတင်း ပျီႇတူႉၸိတ်ႉလႄႈ ပလိၵ်ႈမၢၼ်ႈ ပႂ်ႉဝႆႉ။ တီႈႁူဝ်ၶူဝ် တၢင်း ၾၢႆႇပွၵ်ႉၸွၼ်ႊၸူဝ်ႇသမ်ႉ ပဵၼ်သိုၵ်းမၢၼ်ႈတင်း ပျီႇတူႉၸိတ်ႉပႂ်ႉဝႆႉ။ တၢင်းၶူဝ်ၾၢႆႇပၢင်ႇၶမ်းၼၼ်ႉသမ်ႉ ပဵၼ်ပလိၵ်ႈမၢၼ်ႈ ပႂ်ႉဝႆႉ။

ၵူၼ်းၼုမ်ႇ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်လၢမ်းလိမ်းယိုဝ်းၵွင်ႈ ၼႂ်းဝၢၼ်ႈသူၼ်ဢိူင်ႇၸိူင်ႉၼႆၼႆႉ မၼ်းဢမ်ႇထုၵ်ႇလီပဵၼ် ။ ဢွၼ်တၢင်း တႄႉ ပိူၼ်ႈဝႃႈ ယိုဝ်းၵွင်ႈၶိုၼ်ႈၾႃႉၼႆ ဢမ်ႇတိူဝ်ႉၵူၼ်းဝႃႇ။ ယၢမ်းလဵဝ်တႄႉဢမ်ႇၸၢင်ႈဝႃႈယဝ်ႉၶႃႈၼေႃႈ ၵူၼ်းၼမ်ၼႃႇယဝ်ႉလူး။ ၶဝ်လၢမ်းလိမ်းယိုဝ်းလူင်လၢင်ၵႂႃႇၸိူင်ႉၼႆ ပေႃးတူၵ်းမႃးသႂ်ႇၽႂ်ၵေႃႈ မၼ်းဢမ်ႇၸႂ်ႈလွင်ႈလီၶႃႈ”- ဝႃႈၼႆ။

ယၢမ်းလဵဝ် ၼႂ်းၸႄႈဝဵင်းမူႇၸေႊၼႆႉ မီးဝႆႉ ၸုမ်းယိပ်းၵွင်ႈၵၢင်ႇ တူင်ႉၼိုင် ယူႇဝႆႉတင်းၼမ် မိူၼ်ၼင်ႇ သိုၵ်းမၢၼ်ႈ ယိုတ်းမိူင်း၊ ပျီႇတူႉၸိတ်ႉ တႂ်ႈသိုၵ်းမၢၼ်ႈ ၵုမ်းၵမ်၊ ၸုမ်းဢူၺ်းလီ ပွတ်းႁွင်ႇ ၸိူဝ်းၼႆႉ။  

ဝဵင်းမူႇၸေႊၼႆႉ ပဵၼ်ဝဵင်းလႅၼ်လိၼ် ပဵၼ်ဝဵင်းၵႃႉၶၢႆ ပၢႆးမၢၵ်ႈမီး ဝဵင်းၼိုင်ႈ ၸုမ်းယိပ်းၵွင်ႈ တူင်ႉၼိုင်ၵေႃႈၼမ်၊ ၵူၼ်းတၢင်ႇ တီႈသီႇလႅၼ် မႃးယူႇသဝ်း ႁႃႁဵတ်းၵၢၼ် ၵေႃႈၼမ်။ ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ လွင်ႈႁူမ်ႇလူမ်ႈၵူၼ်းမိူင်းဢမ်ႇမီးသင်။ ၵႆႉမီးလွင်ႈၸူၼ်ၵၼ်၊ လၵ်ႉၵၼ်၊ ၶႃႈႁႅမ်ၵၼ်တၢႆ ၸိူဝ်းၼႆမႃး ၶိူဝ်းယႂ်း။

ပူၼ်ႉမႃး မိူဝ်ႈဝၼ်းတီႈ 27/4/2023 ယၢမ်းၵၢင်ၼႂ် 8 မူင်းၶိုင်ႈၼၼ်ႉ မီးၽူႈၸၢႆးဢမ်ႇႁူႉၾၢႆႇ ၵေႃႉၼိုင်ႈ ၶဝ်ႈယိုဝ်း ႁူဝ်ၼႃႈ ပျီႇ တူႉၸိတ်ႉလူင်ထၢင် တၢႆထင်တီႈ ၼႂ်းႁၢၼ်ႉၶၢႆၼမ်ႉၼဵင်ႈၸဵမ်း (မင်းထိပ်ခေါင်) တီႈပွၵ်ႉပၢႆးၸၢၵ်ႈ ဝဵင်းမူႇၸေႊ ၸိုင်ႈတႆးပွတ်း ႁွင်ႇ လႅၼ်လိၼ်တႆး – ၶႄႇ။