ၼၢင်းယိင်း ဢႃယု 51 ပီ ၵူၼ်းၵဵင်းတုင် ၵေႃႉၼိုင်ႈ ထုၵ်ႇၵူၼ်းဢမ်ႇႁူႉၾၢႆႇ ယိုဝ်းတၢႆ ဝႃႈၼႆ။
ဝၼ်းတီႈ 9/5/2021 ယၢမ်းၵၢင်ၼႂ် မွၵ်ႈ 4 မူင်းၶိုင်ႈ ၼၢင်းႁွမ် ဢႃယု 51 ပီ ထုၵ်ႇၵူၼ်း ဢမ်ႇႁူႉၾၢႆႇယိုဝ်းတၢႆ ၼိူဝ်သဵၼ်ႈ တၢင်း ၵဵင်းတုင် – မိူင်းယၢင်း ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ၼႆယဝ်ႉ။
ၵူၼ်း ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ လႆႈငိၼ်းဝႃႈ တိူဝ်ႉၺႃးမၢၵ်ႇၵွင်ႈ 3 ႁွႆးၼႆ ၶႃႈ။ ၵူၼ်းမႃးယိုဝ်းၼၼ်ႉ ပဵၼ်ၽႂ်မႃးယိုဝ်းတႄႉ ဢမ်ႇလႆႈႁူႉၶႃႈ၊ ဢွင်ႈတီႈပဵၼ်တႄႉ ႁိမ်းၵၢတ်ႇၵၢင်ၼႃးၶႃႈဢေႃႈ ၼိူဝ် သဵၼ်ႈတၢင်းၵဵင်းတုင် – မိူင်းယၢင်း” – ဝႃႈၼႆ။
ၼၢင်းႁွမ်ၼႆႉ ပဵၼ်ၵူၼ်းဝၢၼ်ႈၼမ်ႉၶိုၼ်ၼွႆႉ ပွၵ်ႉ 4 ၸႄႈဝဵင်းၵဵင်းတုင် ပဵၼ်ၵူၼ်း ပိုတ်ႇႁၢၼ်ႉၶၢႆၽၵ်းယိူဝ်ႈၼၢင်းၶဵဝ် ၼႂ်း ၵၢတ်ႇၵၢင်ၼႃး၊ ၵူၼ်းၸမ်ၸႂ်မၼ်းၼၢင်းလၢတ်ႈဝႃႈပဵၼ်ၽႂ်ယိုဝ်းလႄႈယိုဝ်းယွၼ်ႉသင် ဢမ်ႇႁူႉ။ မၼ်းၼၢင်းၵေႃႈဢမ်ႇယၢမ်ႈမီးပၼ်ႁႃယႂ်ႇလူင်တၢင်းၽႂ်သေပွၵ်ႈဝႃႈၼႆ။
မၼ်းၼၢင်း ထုၵ်ႇယိုဝ်းသႂ်ႇ တီႈတူဝ် 3 ႁွႆးၼၼ်ႉ တီႈၵွၵ်းႁူဝ် ႁွႆးၼိုင်ႈ၊ ၼႃႈဢူၵ်း ႁွႆးၼိုင်ႈလႄႈ တီႈပုမ် ႁွႆးၼိုင်ႈ ။
ဢိင်ၼိူဝ် လွင်ႈၼႆႉ ပဵၼ်ၼမ်ႉမိုဝ်းၽႂ် ၵေႃႉလႂ်ႁဵတ်းၼႆ ပႆႇႁူႉ ယူႇတီႈပလိၵ်ႈမၢၼ်ႈၶဝ် တိုၵ်ႉၵူတ်ႇထတ်း လွင်ႈပိူင်ပဵၼ် မၼ်းယူႇ ဝႃႈၼႆ။
