ၵူၼ်းမိူင်း ၼမ်ႉၶမ်း ႁိမ်ဝႂ်တူဝ်ႇၵိၼ်ႇ/ တိုကင် (ဝႂ်ၶိဝ်း) တႃႇထွၼ်ငိုၼ်း တီႈယေးငိုၼ်းၵမ်ႇပေႃးၸ ၊ တေႃႇဝၼ်းမီး ၼပ်ႉႁူဝ်ပၢၵ်ႇ မၢင်ၵေႃႉ ထိုင်တီႈလႆႈၵႂႃႇ ၼွၼ်းပႂ်ႉ ပဵၼ် 2-3 ၶိုၼ်းၵေႃႈမီး ။
တႄႇဢဝ် ႁူဝ်လိူၼ်မေႊ 2021 ၼႆႉမႃး ၵူၼ်းမိူင်း ႁႄႇၵၼ် ၵႂႃႇႁိမ်ဢဝ် ဝႂ်တူဝ်ႇၵိၼ်ႇ/ တိုကင် တီႈၼႃႈယေးငိုၼ်း ၵမ်ႇပေႃးၸ တီႈၸႄႈဝဵင်းၼမ်ႉၶမ်း တႃႇတေထွၼ်ငိုၼ်း မၢင်ၵေႃႉ ထိုင်တီႈ ပေႃးလႆႈၵႂႃႇ ၼွၼ်းပႂ်ႉ ပဵၼ် 2-3 ၶိုၼ်းၵေႃႈမီး ၼႆယဝ်ႉ။
ၵူၼ်း ၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းမိူင်း ၼမ်ႉၶမ်း ႁဝ်းၶႃႈ ဢွၼ်ၵၼ်ၵႂႃႇႁိမ်ဢဝ် ဝႂ်တူဝ်ႇၵိၼ်ၵၼ်ၼႆႉ ၼိုင်ႈဝၼ်းလႂ် ႁူဝ်ၵူၼ်း ဢမ်ႇယွမ်း 3-4 ပၢၵ်ႇၵေႃႉၶႃႈ။ မၢင်ၵေႃႉ ထိုင်တီႈပေႃးလႆႈမႃးၼွၼ်းပႂ်ႉဢဝ် ဝႂ်တူဝ်ႇၵိၼ်ႇ 2-3 ၶိုၼ်းၵေႃႈမီးဢေႃႈ ပေႃးဢမ်ႇႁဵတ်းၼႆ ဢမ်ႇလႆႈဝႂ်ၶႃႈၼႃႇ”- ဝႃႈၼႆ။
ၼွၵ်ႈလိူဝ်ၼၼ်ႉ ၵူၼ်းမိူင်းပိုၼ်ႉတီႈ မၢင်ၵေႃႉ/ မၢင်ႁိူၼ်း ၵႂႃႇပႂ်ႉဢဝ် ပဵၼ်ဝၼ်း ပဵၼ်ၶိုၼ်း ပၼ်ႇပုတ်ႈၵၼ်ၵႂႃႇပႂ်ႉ ၼိုင်ႈၵေႃႉ လႂ် 3-4 ၸူဝ်ႈမူင်းၵေႃႈမီး ဝႃႈၼႆ။
“မၢင်ႁိူၼ်းၼႆႉပေႃးၵူၼ်းႁိူၼ်းၼမ်ၼႆ ၶဝ်လႅၵ်ႈၵၼ်ၵႂႃႇပႂ်ႉ တီႈၶဝ်ႈထႅဝ်ၼၼ်ႉ ၵူဝ်တီႈယူႇၶဝ်ႁၢႆၼႆ ၼိုင်ႈၵေႃႉလႂ် ၶဝ်ပၼ်ႇ ပူတ်ႈၵၼ်ၵႂႃႇပႂ်ႉ 3-4 ၸူဝ်းမူင်း ႁဵတ်းၼႆ ပႂ်ႉတင်းဝၼ်း တင်းၶိုၼ်း ၸိူင်ႉၼၼ်ၶႃႈဢေႃႈ၊ တေႃႇထိုင် ပေႃးလႆႈဝႂ်တူဝ်ႇၵိၼ်ၶႃႈ ယဝ်ႉ”- ၵူၼ်းပိုၼ်ႉတီႈ ၼမ်ႉၶမ်း သိုပ်ႇလၢတ်ႈ ၼႄၼင်ႇၼႆ။
လွင်ႈၼႆႉ ယွၼ်ႉၵူၼ်းမိူင်းၼႂ်းပိုၼ်ႉတီႈ ၵမ်ႈၼမ် ဢမ်ႇယွမ်းၸႂ်ႉ App E Money ၊ K Pay ၸိူဝ်းၼႆႉ ၵေႃႈပႃး ဝႃႈၼႆ။
“သင်ပဵၼ်လႆႈတႄႉ ႁဝ်းၶႃႈ ၶိုၼ်းၸႂ်ႉၵၼ် E Money K Pay ၵၼ်ၸိူင်ႉၼႆ ပၼ်ၺႃ လွင်ႈၵႂႃႇႁိမ်ဢဝ်ဝႂ်တူဝ်ႇၵိၼ်ႇၼၼ်ႉ တေလူတ်းယွမ်းလူင်းၶႃႈဢေႃႈ။ ယွၼ်ႉဝႃႈ မၢင်ၵေႃႉ ဢမ်ႇယွၼ်းဢဝ် ငိုၼ်းဢၼ်ဢူၼ်းပၼ်ၵၼ် ၼႂ်း E Money K pay ၶဝ် တေဢဝ်တူဝ်ငိုၼ်းၵမ်းသိုဝ်ႈ။ တူဝ်ၶႃႈ ၵေႃႉၺႃးၵမ်းလဵဝ်ၶႃႈယဝ်ႉ ယွၼ်ႉပၼ်ႁႃဢၼ်ၼႆႉသေ ၶႃႈပေႃးလႆႈၵႂႃႇ ဢဝ်တူဝ်ငိုၼ်း တီႈပိူၼ်ႈမႃး 1 သႅၼ်ပျႃး ၶႃႈတေလႆႈဢူၼ်းပၼ် တီႈၶႃႈၵႂႃႇဢဝ်ငိုၼ်းမႃးၼၼ်ႉ 1 သႅၼ် 3 ႁဵင်ပျႃး ဢမ်ႇ ၼၼ် 1 သႅၼ် 4-5 ႁဵင်ပျႃး ႁဵတ်းၼႆၶႃႈဢေႃႈ။ မိူၼ်ပၢၵ်ႇသႅၼ်ၼႆ တေလႆႈဢူၼ်းပၼ် ၼိုင်ႈပၢၵ်ႇသႅၼ်ပၢႆသၢမ်သႅၼ်ပျႃး ၸိူင်ႉၼႆ ယဝ်ႉၵေႃႈ ၸင်ႇဢဝ်ငိုၼ်းၼၼ်ႉသေ ၵႂႃႇပၼ် ၵူၼ်းတီႈဢၼ်ၶဝ်ဢဝ်တူဝ်ငိုၼ်းၼၼ်ႉၶႃႈဢေႃႈ။ ယဝ်ႉၵေႃႈ ႁဝ်းၶႃႈ လႆႈဢူၼ်းငိုၼ်းလိူဝ်ပၼ် ၵူၼ်းတီႈမီးတူဝ်ငိုၼ်းၼၼ်ႉထႅင်ႈ လၢႆ % ၸိူဝ်းၼႆႉၶႃႈဢေႃႈ ဢၼ်ၼႆႉ ပဵၼ်ပၼ်ႁႃယႂ်ႇ ၶႃႈဢေႃႈ”- ၸဝ်ႈၵုၼ်ႇ ၼမ်ႉၶမ်း ၵေႃႉၼိုင်ႈ လၢတ်ႈၼႄၼင်ႇၼႆ။
ဝၢႆးသေ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ယိုတ်းဢႃႇၼႃႇ ၸိုင်ႈမိူင်းၼႆႉမႃးသေ ၵူၼ်းမိူင်းတႆး ၵမ်ႈၼမ် ဢွၼ်ၵၼ်ၵူဝ် မႆႈၸႂ်ၵူဝ် မီးလွင်ႈသိမ်းငိုၼ်း ၵူဝ်ငိုၼ်းၶမ်ဝႆႉ ၼႂ်းယေးငိုၼ်း ၸိူဝ်းၼႆသေ ႁိမ်ၵၼ် ၵႂႃႇထွၼ်ငိုၼ်းၵၼ် ၼႆယဝ်ႉ။
ယၢမ်းလဵဝ် တီႈယေးငိုၼ်းၼႂ်းမိူင်းႁူမ်ႈတုမ်သမ်ႉ ထွၼ်ပၼ်ငိုၼ်းၵူၼ်းမိူင်း ၼိုင်ႈၵေႃႉလႂ် ၼိုင်ႈဝၼ်း 2 သႅၼ်ပျႃး ၼိုင်ႈဝူင်ႈ 10 သႅၼ်ၵူၺ်းလႄႈ ၵူၼ်းမိူင်းမႆႈၸႂ် ၵူဝ်ငိုၼ်းၶမ် ၵူဝ်ဢမ်ႇထွၼ်လႆႈငိုၼ်းၸဝ်ႈၵဝ်ႇ မၢင်ၵေႃႉသမ်ႉ လူဝ်ႇငိုၼ်းတႃႇ တေ ႁဵတ်းတိုၼ်းလၢင်း တၢင်းၵႃႉၶၢႆလႄႈ ၵႂႃႇပႂ်ႉထွၼ်ၵေႃႈမီး ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ