ၶွင်ႇသီႇသိုၵ်းမၢၼ်ႈ ယိုဝ်းၵွင်ႈလူင် တီႈၸႄႈဝဵင်းသႅၼ်ဝီ ပဵၼ်လၢႆၵမ်းသေ ႁဵတ်းႁႂ်ႈ ၵူၼ်းမိူင်း ၼႂ်းပိုၼ်ႉတီႈ ဢွၼ်ၵၼ်တူၵ်းၸႂ် တိုၼ်ႇ သၢၼ်ႈ ႁၢဝ်ႈႁႅင်း ဝႃႈၼႆ။
မိူဝ်ႈၼႆႉ ဝၼ်းတီႈ 6/5/2021 ယၢမ်းၵၢင်ၼႂ် မွၵ်ႈ 9-10 မူင်း ၶွင်ႇသီႇသိုၵ်းမၢၼ်ႈ ၸၵၶ 16 ဢၼ်ပၵ်းဝႆႉတီႈ လွႆၼမ်ႉႁူး ယၢၼ်ၵႆဝဵင်း မွၵ်ႈ 3 လၵ်း ၼႂ်းၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ယိုဝ်းၵွင်ႈလူင် ၵႂႃႇတၢင်းၾၢႆႇ တူၵ်းဝဵင်း ဢမ်ႇယွမ်း 5-6 ႁူၺ်ႇ/ လုၵ်ႈ ၼႆယဝ်ႉ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း သႅၼ်ဝီ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ –“ ၸႂ်ႈၶႃႈဢေႃႈ ၶႃႈယူႇတီႈႁိူၼ်းၼႆႉ လႆႈ ငိၼ်းသဵင်မၢၵ်ႇမၼ်းတႅၵ်ႇႁႅင်းၼႃႇၶႃႈ မွၵ်ႈ 5-6 ၵမ်းၼႆႉၶႃႈဢေႃႈ ၶဝ်ယိုဝ်း။ ယိုဝ်းၵႂႃႇတၢင်းၾၢႆႇတူၵ်းဝဵင်းၶႃႈ။ တေပဵၼ် ၸၵၶ 16 ၼၼ်ႉ ယိုဝ်းၵူၺ်း သဵင်မၼ်းမေႃးမႃးတၢင်းၼၼ်ႉၶႃႈၼႃႇ”- ဝႃႈၼႆ။
သိုၵ်းမၢၼ်ႈယိုဝ်းယွၼ်ႉသင်ဢမ်ႇႁူႉ ၵူၼ်းမိူင်းသႅၼ်ဝီ တူၵ်းၸႂ် တိုၼ်ႇသၢၼ်ႈ ၼႆယဝ်ႉ။
“ၵူၼ်းမိူင်းတႄႉ ဢွၼ်ၵၼ် တူၵ်းၸႂ်ၵၼ်သေ တိုၼ်ႇသၢၼ်ႈၵၼ်ၵမ်ႈၼိုင်ႈ ၶႃႈဢေႃႈ။ ယၢမ်းလဵဝ်ၼႆႉ ၵူၼ်းမိူင်းႁဝ်းၶႃႈ ပႂ်ႉထွမ်ႇ တူၺ်းငဝ်းလၢႆးမၼ်းယူႇ ဝႃႈတေပဵၼ်သင်မႃးၼႆ။ သဵင်ၵွင်ႈလူင်တႄႉ လႆႈယိၼ်းၾၢႆႇလဵဝ်ၵူၺ်း ပဵၼ်တၢင်းၾၢႆႇ သိုၵ်းမၢၼ်ႈၼၼ်ႉ ယိုဝ်းၵူၺ်း။ ထႅင်ႈၾၢႆႇၼိုင်ႈၵေႃႈ မိူဝ်ႈၼႆႉ ၵၢင်ၼႂ် ၵႃးသိုၵ်းမၢၼ်ႈ လုၵ်ႉတၢင်းၼိူဝ်သေ လူင်းမႃးၼႆႉ ၼမ်တႄႉၶႃႈ”- ၵူၼ်းမိူင်း သႅၼ်ဝီ ၵေႃႉၼိုင်ႈ လၢတ်ႈၼႄၼင်ႇၼႆ။
ထႅင်ႈၾၢႆႇၼိုင်ႈၵေႃႈ ၼႂ်းၶၢဝ်းတၢင်း 2-3 ဝၼ်းမႃးၼႆႉ ၶွင်ႇသီႇသိုၵ်းမၢၼ်ႈ တင်း ၸုမ်းဢူၺ်းလီ ပွတ်းႁွင်ႇ ပဵၼ်ပၢင်တိုၵ်း ၵၼ် တၢင်းၸႄႈဝဵင်းၵူတ်ႉၶၢႆၼၼ်ႉ ႁၢဝ်ႈႁႅင်း ၵူၼ်းမိူင်းၺႃးၸၢၵ်ႇၸွမ်း ၼႂ်းပၢင်တိုၵ်း 5 ၵေႃႉ။ မိူဝ်ႈၼႆႉ 6/5/2021 ယၢမ်း ၵၢင်ၼႂ် ၸုမ်းဢူၺ်းလီ ၶဝ်ႈယိုတ်းလႆႈ တပ်ႉပၢင်သဝ်းသိုၵ်းမၢၼ်ႈ တီႈၵူတ်ႉၶၢႆ တီႈၼိုင်ႈသေ ဢဝ်ၸုတ်ႇၾႆးၽဝ်ပႅတ်ႈ ၼႆ ယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ