ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ပိုၼ်ၽၢဝ်ႇ ႁၢမ်ႈၶူဝ်းၵုၼ်ႇ မိူင်းထႆး 5 ဢၼ် တေႃႉသူင်ႇၶဝ်ႈ တၢင်းလႅၼ်လိၼ် မႄႈသၢႆ – တႃႈၶီႈလဵၵ်း ႁဵတ်းႁႂ်ႈၶူဝ်းၵုၼ်ႇ ၼႂ်းပိုၼ်ႉတီႈ ပွတ်းတႃႈၶီႈလဵၵ်း ပုင်ႈၶိုၼ်ႈႁႅင်း ဝႃႈၼႆ။
ဝၢႆးသေ သိုၵ်းမၢၼ်ႈ ပိုၼ်ၽၢဝ်ႇဢွၵ်ႇ မိူဝ်ႈဝၼ်းတီႈ 19/4/2021 ၼၼ်ႉ ႁၢမ်ႈၶူဝ်းၵုၼ်ႇ ၶွင်မိူင်းထႆး 5 ဢၼ် မိူၼ်ၼင်ႇ ၼမ်ႉသူမ်ႈၼမ်ႉဝၢၼ်၊ ၵေႃႊၾီႊၽွင်၊ Instant Coffee ၵေႃႊၾီႊၵိၼ်လႆၵမ်းလဵဝ် ၊ ၼူမ်းၽွင်၊ ၼမ်ႉၼူမ်း ၸိူဝ်း ၼႆႉ သူင်ႇၶဝ်ႈတၢင်းလႅၼ်လိၼ် မႄႈသၢႆ – တႃႈၶီႈလဵၵ်း တၢင်းၸိုင်ႈတႆး ပွတ်းဢွၵ်ႇၶူင်း ႁဵတ်းႁႂ်ႈ ၶၼ်ၶူဝ်းၵုၼ်ႇၼႂ်းပိုၼ်ႉတီႈပုင်ႈၶိုၼ်ႈႁႅင်း ၼႆယဝ်ႉ။
ၽူႈႁပ်ႉတေႃႉသူင်ႇၶူဝ်းၵုၼ်ႇ တႃႈၶီႈလဵၵ်း – မႄႈသၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶၼ်ၶူဝ်းၵုၼ်ႇ ၶိုၼ်ႈႁႅင်းၼႆႉ ၸႂ်ႈၶႃႈဢေႃႈ။ ဢၼ်ၶဝ်ပိၵ်ႉဢိုတ်းပႅတ်ႈၼႆႉ မၼ်းပဵၼ်ၶွင်ၸႂ်ႉတိုဝ်း တႃႇၵူၼ်းတင်းၼမ်ၸႂ်ႉ။ ယွၼ်ႉၼၼ် ၵူၼ်းမိူင်း ဢွၼ်ၵၼ်ထူပ်းတၢင်းယၢပ်ႇၽိုတ်ႇလိူဝ်ႁႅင်း။ ယိင်ႈၶႅၼ်း ႁဵတ်းႁႂ်ႈၵူၼ်းမိူင်း ၸႂ်ၸႃႉ ၸႂ်မိူဝ်ႇတေႃႇၶဝ်ထႅင်ႈၵူၺ်းၶႃႈဢေႃႈ”- ဝႃႈၼႆ။
ယၢမ်းလဵဝ်ဢၼ် သိုၵ်းမၢၼ်ႈ မိူၵ်ႈမႂ်ႈ ပိုၼ်ၽၢဝ်ႇႁၢမ်ႈၶူဝ်းၵုၼ်ႇ မိူင်းထႆး တေႃႉသူင်ႇၶဝ်ႈ ၼႂ်းမိူင်းမၢၼ်ႈၸူဝ်ႈ ၶၢဝ်းၼႆႉ ပဵၼ်တီႈလၢၼ်ႇလႅၼ်လိၼ် မႄႈသၢႆ – တႃႈၶီႈလဵၵ်း၊ မႄႈသွတ်ႇ – မျႃႉဝတီႇ ၸိူဝ်းၼႆႉ။
“လွင်ႈၶဝ် သင်ႇပိၵ်ႉဢိုတ်းၶူဝ်းၵုၼ်ႇၸိူင်ႉၼႆ ၸွမ်းၼင်ႇႁဝ်းၶႃႈ ပွင်ပဵၼ်လႆႈ တိုၼ်းတေဢမ်ႇဢဝ် ၶူဝ်းၵုၼ်ႇၶွင်သိုၵ်း မၢၼ်ႈႁဵတ်းဢွၵ်ႇၸိူဝ်းၼၼ်ႉမႃးၶၢႆလႃးလႃး ၶႃႈ။ ဢဝ်ဝႆႉၵေႃႈ ၶၢႆၵေႃႈဢမ်ႇလႆႈ။ မိူဝ်ႈၵူႈပွၵ်ႈ မျၢၼ်ႇမႃႇပီႇယႃႇ 100 တိူၵ်ႈၼႆ ၶၢႆၼႂ်းဝူင်ႈလဵဝ်ၵေႃႈ မူတ်းယဝ်ႉ။ မိူဝ်ႈလဵဝ်ၼႆႉ မီးဝႆႉ 50 တိူၵ်ႈ ၶၢႆ 3 လိူၼ်ၵေႃႈ ပႆႇမူတ်း”- ၵူၼ်းၶၢႆၶူဝ်းၵုၼ်ႇ ၼႂ်းတႃႈၶီႈ လဵၵ်း ၵေႃႉၼိုင်ႈ လၢတ်ႈၼႄၼင်ႇၼႆ။
ဝၢႆးသေ သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ တဵၵ်းၸႂ်ႉ ႁႂ်ႈၵူၼ်းမိူင်း ပၼ်ႁႅင်းသိုဝ်ႉၶၢႆ ၶူဝ်းၵုၼ်ႇဢၼ်သိုၵ်းမၢၼ်ႈ ၵုမ်းၵမ်ႁဵတ်းဢွၵ်ႇ။ ၾၢႆႇၼိုင်ႈ ၶူဝ်းၵုၼ်ႇဢၼ်ထႆး၊ ၶႄႇႁဵတ်းဢွၵ်ႇမႃး တႄႉ ႁၢမ်ႈသိုဝ်ႉၸႂ်ႉၵၼ် ဝႃႈၼႆ။
ၶူဝ်းၵုၼ်ႇၸိူဝ်းၼႆႉ တင်ႈဢဝ်ဝၼ်းတီႈ 1/5/2021 တေဢမ်ႇပၼ်ၶၢမ်ႈ လႅၼ်လိၼ်တီႈမျႃႉဝတီႇ မိူင်းထႆးလႄႈ မိူင်းယၢင်း ၸၢပ်ႈၵၼ်ယဝ်ႉလႄႈ သင်ဝႃႈ ၶႂ်ႈတေႃႉသူင်ႇၵႃႉၶၢႆၸိုင် တၵ်းလႆႈသူင်ႇတၢင်းၼမ်ႉပၢင်ႇလၢႆႇ လူၺ်ႈလၢႆးပဵၼ်တၢင်းၵၢၼ် ဝႃႈၼႆဝႆႉ။
