သိုၵ်းၶၢင် တင်း ၶွင်ႇသီႇသိုၵ်းမၢၼ်ႈမိူၵ်ႈမႂ်ႈ ပဵၼ်ပၢင်တိုၵ်းၵၼ်ၼႂ်းၸႄႈဝဵင်းမိူင်းမွၵ်ႇ ပီႈၼွင်ႉၸၢဝ်းတႆးၼႂ်းပိုၼ်ႉတီႈ လႆႈပၢႆႈၽေးသိုၵ်း တင်းၼမ်လၢႆ။
တႄႇဢဝ် ႁူဝ်လိူၼ်ဢေႊၿရိူဝ်ႊ 2021 ၼႆႉမႃး သိုၵ်းၶၢင် KIA တင်း ၶွင်ႇသီႇသိုၵ်းမၢၼ်ႈ ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်း ၸႄႈဝဵင်းမိူင်းမွၵ်ႇ ၸႄႈမိူင်းၶၢင် တုမ်ႉတိူဝ်ႉပီႈၼွင်ႉၸၢဝ်းတႆးယူႇသဝ်းၼႂ်းပိုၼ်ႉတီႈ ၺႃးၸၢၵ်ႇၸွမ်း လူႉတၢႆ မၢတ်ႇၸဵပ်း လႄႈ လႆႈပၢႆႈၽေးသိုၵ်း ထႅင်ႈ မွၵ်ႈ 50 ဝၢၼ်ႈ ။
ဢူးသူဝ်းမူဝ်းဢွင်ႇ ၽူႈတႅၼ်းသၽႃး ပႃႇတီႇႁူဝ်သိူဝ် ၼႂ်းၸႄႈမိူင်းၶၢင် လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်း ဢၼ် ပဵၼ် ႁိမ်းႁွမ်းၼၼ်ႉ မီးဝၢၼ်ႈတႆးႁဝ်းၶႃႈ မွၵ်ႈ 50 ဝၢၼ်ႈၼႆႉ လႆႈပၢႆႈၽေးသိုၵ်းၵၼ်သေ ၵႂႃႇသွၼ်ႈဝႆႉတီႈဝတ်ႉ မိူင်းမွၵ်ႇၵၼ်ၶႃႈ ဢေႃႈ”- ဝႃႈၼႆ။
ဢိင်ၼိူဝ် လွင်ႈၼႆႉ ယွၼ်ႉသိုၵ်းၶၢင် KIA ၶိုၼ်ႈယိုဝ်းယိုတ်းလႆႈ တပ်ႉပၢင်သဝ်း ၶွင်သိုၵ်းမၢၼ်ႈ တီႈၼိူဝ်လွႆ ဢၼ်မီးႁိမ်း ဝၢၼ်ႈပီႈၼွင်ႉၸၢဝ်းတႆး ယူႇဝႆႉ ၸိူဝ်းၼၼ်ႉ ဝႃႈၼႆ။
ၵူၼ်းပိုၼ်ႉတီႈ မိူင်းမွၵ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈထၢင်ႇတႄႉ ၼႂ်းၸႄႈမိူင်းၶၢင်ၼႆႉ လႅပ်ႈတေပဵၼ် ပၢင်တိုၵ်းၵၼ်ယႂ်ႇၶိုၼ်ႈမႃးၶႃႈဢေႃႈ။ မိူဝ်ႈဝႃး တိုၵ်ႉလႆႈႁၼ်သိုၵ်းမၢၼ်ႈ ထႅမ်ႁႅင်းသိုၵ်းထႅင်ႈယူႇ။ ယွၼ်ႉဝႃႈ သိုၵ်းၶၢင် ၶိုၼ်ႈ သိမ်း တပ်ႉပၢင်သဝ်းၶဝ်ဝႆႉလႄႈ လႅပ်ႈၶဝ် ၶႂ်ႈလႆႈၶိုၼ်း တီႈၼၼ်ႈ။ ၵမ်းဢွၼ်တၢင်း တႄႉၶဝ်ယိုဝ်း ဢမ်ႇလႆႈသေ ၵမ်းလင် မႃး ၸင်ႇဢဝ်ၶိူင်ႈမိၼ် မႃးယိုဝ်းၸွႆႈၶႃႈ”- ဝႃႈၼႆ။
ထႅင်ႈၾၢႆႇၼိုင်ႈၵေႃႈ ယူႇတီႈ ၶွမ်ႊမတီႊၽူႈတႅၼ်းမိူင်းႁူမ်ႈတုမ် ဢၼ်ယူႇတီႈ CRPH ၶွတ်ႇၽွတ်ႈဝႆႉၼၼ်ႉ ၼႂ်းၼၼ်ႉ ၵႅမ်ၸွမ်ၸိုင်ႈမႂ်ႇသမ်ႉ ပဵၼ်တူႇဝႃႇလသျိၼ်ႊလ ပဵၼ်ၵူၼ်းၼႂ်းၸႄႈမိူင်းၶၢင် ၼႆယဝ်ႉ။
“ႁဝ်းၶႃႈ ထၢင်ႇတႄႉ ၸုမ်း NUG ၶဝ် ၶွတ်ႇၽွတ်ႈလူင်ပွင်ၸိုင်ႈမႂ်ႇလႄႈ ၼႂ်းၼၼ်ႉ ၵႅမ်ၸွမ်ၸိုင်ႈသမ်ႉ ပဵၼ်ၵူၼ်းမိူင်းၶၢင်။ ယွၼ်ႉၼႆလႄႈ သိုၵ်းမၢၼ်ႈ ၶႂ်ႈႁႅၼ်းသိုၵ်းလေႃႇ မိူင်းၶၢင်ၼႆႉ ႁၢဝ်ႈႁႅင်းၵေႃႈ ၸၢင်ႈပဵၼ်လႆႈ” – ၵူၼ်းပိုၼ်ႉတီႈ မိူင်းမွၵ်ႇ သိုပ်ႇလၢတ်ႈၼႄၼင်ႇၼႆ။
ယူႇတီႈၶွင်ႇသီႇသိုၵ်းမၢၼ်ႈ ၸႂ်ႉၶိူင်ႈမိၼ် ယိုဝ်းၸွႆႈသေ ပွႆႇမၢၵ်ႇလူင် တူၵ်းသႂ်ႇ ၸွမ်းႁိမ်းႁွမ်းတပ်ႉပၢင်သဝ်းၸိူဝ်းၼၼ်ႉ ႁၢဝ်ႈႁႅင်း ။
ထႅင်ႈၾၢႆႇၼိုင်ႈၵေႃႈ ၵူၼ်းမိူင်းတင်းၵူၼ်းၼုမ်ႇ ၼႂ်းၸႄႈမိူင်းမွၵ်ႇၵေႃႈ တိုၵ်ႉသိုပ်ႇၼႄၵၢင်ၸႂ် သၢၼ်ၶတ်းတေႃႇ သိုၵ်း မၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး ႁၢၼ်ႉတေႃႇထိုင်ယၢမ်းလဵဝ် ။
ဢိင်ၼိူဝ် လွင်ႈပဵၼ်ပၢင်တိုၵ်းၵၼ်ၼႆႉသေ ၵူၼ်းမိူင်းပိုၼ်ႉတီႈ ၺႃးၸၢၵ်ႇၸွမ်း လႆႈလူႉတၢႆ 4 ၵေႃႉ။ ၼႂ်း 4 ၵေႃႉ တႃႇ 3 ၵေႃႉ ပဵၼ်တႆး။ ႁိူၼ်းယေး ၵူၼ်းဝၢၼ်ႈ လႆႈလူႉၵွႆ ၸွမ်းထႅင်ႈတင်းၼမ် ။ ယဝ်ႉၵေႃႈ ဝူဝ်းၵႂၢႆး ၶွင်ၵူၼ်းမိူင်း ယဵပ်ႇၺႃးမၢၵ်ႇမႅင်း ဢၼ်သိုၵ်းတင်းသွင်ၾၢႆႇႁၢင်ႈၵၢင်ဝႆႉၼၼ်ႉ လႆႈလူႉတၢႆၸွမ်းၵၼ် မီးတင်းၼမ် ၼႆယဝ်ႉ။
