ၼေႃႇၽူႈတႅၼ်းသၽႃး ပႃႇတီႇႁူဝ်သိူဝ် SNLD ၸႄႈဝဵင်းတႃႈၶီႈလဵၵ်း ၵေႃႉၼိုင်ႈ ထုၵ်ႇၶွင်ႇသီႇသိုၵ်းမၢၼ်ႈ ၸွႆးတြႃးလူၺ်ႈ မတ်ႉတႃ 505 (က) ။
မိူဝ်ႈဝၼ်းတီႈ 12/4/2021 ယၢမ်းၵၢင်ၶမ်ႈ ယူႇတီႈၶွင်ႇသီႇသိုၵ်းမၢၼ်ႈမိူၵ်ႈမႂ်ႈ ပိုၼ်ၽၢဝ်ႇ သဵၼ်ႈၸိုဝ်ႈ ၵူၼ်းမိူင်းႁူမ်ႈတုမ် ၸိူဝ်းထုၵ်ႇၸွႆးတြႃးလူၺ်ႈ မတ်ႉတႃ 505 (က) ။ ၼႂ်းၼၼ်ႉ ပႃးသဵၼ်ႈၸိုဝ်ႈၼၢင်းပိၼ်းတိပ်ႉ ၼေႃႇၽူႈတႅၼ်းသၽႃး ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းတႃႈၶီႈလဵၵ်း ပၢင်လိူၵ်ႈတင်ႈ 2020 ပူၼ်ႉမႃးၼႆႉ ။
ၼၢင်းပိၼ်းတိပ်ႉ ၼေႃႇၽူႈတႅၼ်းသၽႃး ႁူဝ်သိူဝ် လၢတ်ႈတီႈၽူႈတွႆႇႁွၵ်ႈဝႃႈ – “တီႈတႄႉမၼ်း ပေႃးၶဝ် ဢမ်ႇပိုၼ်ၽၢဝ်ႇ ဢွၵ်ႇမႃးၼႆႉ ႁဝ်းယင်းပႆႇႁူႉဝႃႈ ႁဝ်းၺႃးၸွႆး တြႃးလူၺ်ႈပူၵ်ႉမ (ပုဒ်မ) သင်။ ႁဝ်းႁူႉဝႃႈ ႁဝ်းတေၺႃးၺွပ်ႉၵႃႈၼၼ်ႉၵူၺ်း။ ၽိူဝ်ႇၶဝ် ပိုၼ်ၽၢဝ်ႇဢွၵ်ႇမႃး ၼႂ်း TV ၶဝ်ၼၼ်ႉ ၸင်ႇႁူႉဝႃႈ ႁဝ်းၺႃးၸွႆးတြႃး ပူၵ်ႉမ 505 (က)။ ၵူၺ်းၵႃႈ ပဵၼ်လွင်ႈတၢင်း သင်သေ ၺႃးၸွႆးတြႃးၼႆၼၼ်ႉ ႁဝ်းယင်းပႆႇႁူႉ လွင်ႈတၢင်းမၼ်းလီလီ”- ဝႃႈၼႆ။
မိူဝ်ႈႁူဝ်လိူၼ်မၢတ်ႊၶျ်ပူၼ်ႉမႃးၼၼ်ႉ ၼၢင်းပိၼ်းတိပ်ႉၼႆႉ လႆႈတူင်ႉၼိုင် ၶဝ်ႈႁူမ်ႈၼႄၵၢင်ၸႂ် သၢၼ် ၶတ်းသိုၵ်းမၢၼ်ႈယိုတ်းဢႃႇၼႃႇမႃးၸွမ်းၵူၼ်းမိူင်းတႃႈၶီႈလဵၵ်း သွင်ပွၵ်ႈ၊ လႆႈတူင်ႉၼိုင် ႁဵတ်းၶဝ်ႈၽၵ်း လဵင်ႉလူ ၸႅၵ်ႇပၼ်ၵူၼ်းၼႄၵၢင်ၸႂ် ။
“ၵွၼ်ႇၶႃႈတေၺႃးၺွပ်းၼႆႉ ၶႃႈသမ်ႉတူင်ႉၼိုင်ႁႅင်းဝႆႉဢိတ်းၼိုင်ႈ။ ယဝ်ႉၵေႃႈ တေမီး Post ဝႆႉဢၼ်ၼိုင်ႈ တီႈၶႃႈလႆႈ Post ၵႂႃႇ ၼႂ်းၶၢဝ်းတၢင်း 6 ၸူဝ်ႈမူင်းၵူၺ်း ၵူၼ်း Like, Share မၼ်း မီးဢၢၼ်ႇႁူဝ်မိုၼ်ႇမၼ်းၶႃႈဢေႃႈ။ ယဝ်ႉၵေႃႈ ၶႃႈႁဝ်းသမ်ႉ ၵႆႉႁဵတ်း ၶဝ်ႈၼမ်ႉတၢင်းၵိၼ် ၵႂႃႇလဵင်ႉၵူၼ်းၼႄၵၢင်ၸႂ် 3 ဝၼ်းလႂ် 1 ပွၵ်ႈ တီႈတႄႉမၼ်း ၶႃႈၵႂႃႇၶဝ်ႈႁူမ်ႈၼႄၵၢင်ၸႂ်ၼႆႉ တေမီး 2 ပွၵ်ႈၵူၺ်း”– ၼၢင်းပိၼ်းတိပ်ႉ သိုပ်ႇလၢတ်ႈၼႄၼင်ႇၼႆ။
ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 14/3/2021 ယူႇတီႈပလိၵ်ႈသိုၵ်းမၢၼ်ႈ ၶဝ်ႈၵႂႃႇတီႉၺွပ်း ၼၢင်းပိၼ်ႉတိပ်ႉ ထိုင်တီႈႁိူၼ်း ။ ၵူၺ်းၵႃႈ မၼ်းၼၢင်း တၼ်းငိူင်ႉလွတ်ႈဝႆႉ ထိုင်မႃး ဝၼ်းတီႈ 12/4/2021 ယူႇတီႈၶွင်ႇသီႇသိုၵ်းမၢၼ်ႈ ပိုၼ်ၽၢဝ်ႇ မၼ်းၼၢင်း ထုၵ်ႇၸွႆးတြႃးလူၺ်ႈ မတ်ႉတႃ 505 (က) ဝႃႈၼႆ။
“ၶႃႈထၢင်ႇတႄႉ လွင်ႈၶႃႈ ၺႃး 505 (က) ၸိူင်ႉၼႆ တီႈၼႂ်းပႃႇတီႇႁဝ်းၶႃႈ တေလႅပ်ႈပဵၼ်ၵေႃႉဢွၼ်တၢင်းသုတ်းပိူၼ်ႈႁိုဝ် ဢမ်ႇႁူႉ”- ၼၢင်းပိၼ်းတိပ်ႉ သိုပ်ႇ လၢတ်ႈထႅင်ႈၼင်ႇၼႆ။
ၼၢင်းပိၼ်းတိပ်ႉၼႆႉ ပဵၼ်ၼေႃႇၽူႈတႅၼ်းသၽႃး ပႃႇတီႇ ႁူဝ်သိူဝ် ၶဝ်ႈလိူၵ်ႈတင်ႈ ၼႂ်းၸႄႈဝဵင်းတႃႈၶီႈလဵၵ်း ၶဵတ်ႇလိူၵ်ႈ တင်ႈမၢႆ 1 မႃး မိူဝ်ႈပီ 2020 ပူၼ်ႉမႃးၼႆႉ ။ ၵူၺ်းၵႃႈဢမ်ႇဢွင်ႇပေႉ။
ယၢမ်းလဵဝ် ၼႂ်းၸႄႈဝဵင်းတႃႈၶီႈလဵၵ်းၼႆႉ ဢၼ်ၶွင်ႇသီႇသိုၵ်းမၢၼ်ႈ ပိုၼ်ၽၢဝ်ႇ ဢွၵ်ႇ မႃး ၵူၼ်းမိူင်းၺႃးၸွႆးတြႃးလူၺ်ႈ မတ်ႉတႃ 505 (က) ၼႆႉ တေမီး 3 ၵေႃႉ။ ဢၼ်ပႆႇ ပိုၼ်ၽၢဝ်ႇ ဢွၵ်ႇပဵၼ်တၢင်းၵၢၼ်သေ ၵဵပ်းသဵၼ်ႈၸိုဝ်ႈဝႆႉတႄႉ တေမီး မွၵ်ႈ 300 ပၢႆ ၵူၼ်းတူင်ႉၼိုင် ၵၢၼ်မိူင်း ၼႂ်းတူင်ႇဝူင်းတႃႈၶီႈလဵၵ်း လၢတ်ႈၼႄ လွင်ႈလႆႈႁပ်ႉႁူႉ ၶၢဝ်ႇၼႂ်းပိုၼ်ႉတီႈၼင်ႇၼႆ။
မတ်ႉတႃ 505 က ၼႆႉ မၢႆထိုင် ၽူႈမီးၸိုဝ်ႈသဵင်လိုဝ်းလင်ၼၼ်ႉ ဢၢင်ႈၸိုဝ်ႈသဵင်ၸဝ်ႈၵဝ်ႇသေ ဢမ်ႇၼပ်ႉယမ်ၼႃႈတီႈပုၼ်ႈၽွၼ်း တပ်ႉသိုၵ်း လိၼ်၊ၼမ်ႉ၊လူမ်း ၶွင်လူင်ပွင်ၸိုင်ႈမိူင်းႁူမ်ႈတုမ်၊ ယႃႉၸိုဝ်ႈသဵင် ဢမ်ႇၼၼ်ႁဵတ်းႁၢႆႉပၢႆႉသီတေႃႇ တပ်ႉသိုၵ်း လိၼ်၊ၼမ်ႉ၊လူမ်း ၶွင်လူင်ပွင်ၸိုင်ႈမိူင်းႁူမ်ႈတုမ်၊ ႁဵတ်းႁႂ်ႈၼႃႈတီႈၵၢၼ်ငၢၼ်း တပ်ႉသိုၵ်း လိၼ်၊ၼမ်ႉ၊လူမ်း ၶွင်လူင်ပွင်ၸိုင်ႈမိူင်းႁူမ်ႈတုမ်ၼၼ်ႉၸိူင်ႉၵၢတ်ႈၵိုတ်းလူႉၵႂႃႇ ၸဵမ်ၸိူဝ်းၼႆႉ။တူတ်ႈတၢမ်ႇမၼ်းသမ်ႉမီးဝႆႉဝႃႈ ၽူႈၵေႃႉဢၼ်ပူၼ်ႉပႅၼ်မႃးၼၼ်ႉ တေၸၢင်ႈလႆႈတူၵ်းၶွၵ်ႈထိုင် 2 ပီ၊ ဢမ်ႇၼၼ်လႆႈပၼ်တူတ်ႈတၢမ်ႇလူၺ်ႈငိုၼ်းတွင်း၊ ဢမ်ႇၼၼ် ၺႃးတူတ်ႈတၢမ်ႇတင်းသွင်ဢၼ် – ဝႃႈၼႆဝႆႉ။
