ၼႂ်းၶၢဝ်းတၢင်း 70 ဝၼ်းပၢႆၼႆႉ ၵူၼ်းမိူင်း/ ၵူၼ်းၼုမ်ႇ မူႇၸေႊ ထုၵ်ႇပလိၵ်ႈသိုၵ်း မၢၼ်ႈမိူၵ်ႈမႂ်ႈ တီႉၺွပ်းယဵပ်ႈၶွၵ်ႈ  ဢမ်ႇယွမ်း 27 ၵေႃႉ ဝႃႈၼႆ။

ၽူႈတူင်ႉၼိုင် ၼႂ်းတူင်ႇဝူင်းၵူၼ်း တီႈမူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸွမ်းၼင်ႇႁဝ်းၶႃႈ ဝၢၵ်ႉလႆႈသေ မၢတ်ႈမၢႆဝႆႉတႄႉ ၵူၼ်းမိူင်းၵူၼ်းၼုမ်ႇႁဝ်းၶႃႈ ထုၵ်ႇပလိၵ်ႈသိုၵ်းမၢၼ်ႈ တီႉၺွပ်းၵႂႃႇၼႆႉ တေမီး 27 ၵေႃႉယဝ်ႉ။ ဢၼ် ႁဝ်း ၶႃႈ ပႆႇႁူႉၵေႃႈ  မီးထႅင်ႈတင်းၼမ်ယူႇ”- ဝႃႈၼႆ။

ၵူၼ်းမိူင်း/ ၵူၼ်းၼုမ်ႇ ဢၼ်ထုၵ်ႇပလိၵ်ႈသိုၵ်းမၢၼ်ႈ တီႉၺွပ်းဝႆႉၼၼ်ႉ တေပဵၼ် ၵူၼ်းပွၵ်ႉၵၢတ်ႇ၊ ပွၵ်ႉၵွင်းၼွင်၊ ပွၵ်ႉ ၸၢၼ်း၊ 105 လၵ်း၊ ပွၵ်ႉႁူဝ်ၼႃးလႄႈ ပွၵ်ႉၼိူဝ်/ ႁူဝ်မူၼ်ႇ ၸိူဝ်းၼႆႉ ၵမ်ႈၼမ် ပဵၼ်ၵူၼ်းၼုမ်ႇ ဝႃႈၼႆ။

“ၸွမ်းၼင်ႇ ႁဝ်းၶႃႈ ႁူႉတႄႉ မိူဝ်ႈၵမ်းဢွၼ်တၢင်းသုတ်းၼၼ်ႉ သိုၵ်းမၢၼ်ႈတီႉၵႂႃႇ 4 ၵေႃႉ၊ ၵမ်းထူၼ်ႈသွင် 9 ၵေႃႉ၊ ၼႂ်း ဝၼ်းတီႈ 27-28-29 လိူၼ်ထူၼ်ႈသၢမ်ၼၼ်ႉသမ်ႉ 13 ၵေႃႉ ၊ ယဝ်ႉၵေႃႈ ဝၼ်းတီႈ 7 ၼႆႉ ထႅင်ႈၵေႃႉၼိုင်ႈ ႁူမ်ႈၵၼ် 27 ၵေႃႉၶႃႈ၊ လႆႈငိၼ်းဝႃႈ ၸိူဝ်းပဵၼ်ပေႃႈမႄႈလုၵ်ႈဢွၼ်ႇၼၼ်ႉ ၵႂႃႇယွၼ်းႁႂ်ႈပွႆႇပၼ်ယူႇ ဝႃႈၼႆသေတႃႉ  ပလိၵ်ႈသိုၵ်း မၢၼ်ႈ ဢမ်ႇယွမ်း ၼႆၶႃႈ”- ၽူႈတူင်ႉၼိုင် တူင်ႇဝူင်းၵူၼ်း ၼႂ်းမူႇၸေႊ သိုပ်ႇလၢတ်ႈၼႄၼင်ႇၼႆ။

ၵူၼ်းမိူင်း/ ၵူၼ်းၼုမ်ႇ 27 ၵေႃႉ ဢၼ်ထုၵ်ႇပလိၵ်ႈသိုၵ်းမၢၼ်ႈ တီႉယဵပ်ႈၶွၵ်ႈၼႆႉ ယၢမ်းလဵဝ် မီးဝႆႉၼႂ်းၶွၵ်ႈမူႇၸေႊ ၵမ်ႈၼမ်။  ဢၼ်ၺႃးတီႉၺွပ်းၵႂႃႇ  ပဵၼ်ၼႂ်းလိူၼ်မၢတ်ႊၶျ်လႄႈ ႁူဝ်လိူၼ်ဢေႊၿရိူဝ်ႊ။ ၼွၵ်ႈလိူဝ်ၼၼ်ႉ ၵူၼ်းမိူင်း/ ၵူၼ်းၼုမ်ႇ ထုၵ်ႇၶွင်ႇသီႇသိုၵ်းမၢၼ်ႈ ၸႂ်ႉလၢႆးႁုၵ်းႁၢႆႉ ယိုဝ်းတၢႆ 2 ၵေႃႉ။ ၼႂ်း 2 ၵေႃႉၼၼ်ႉ ဢွၼ်ႇၸၢႆး ဢႃယု 15 ပီ ၵေႃႉၼိုင်ႈ ၼႆယဝ်ႉ။

ၶွင်ႇသီႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းၼႆႉ တႄႇဢဝ် ဝၼ်းတီႈ 1/2/2021 မႃး တေႃႇထိုင် ယၢမ်းလဵဝ်မိူဝ်ႈၼႆႉ ဝၼ်း တီႈ 19/4/2021 မီးၶၢဝ်းတၢင်း 78 ဝၼ်းယဝ်ႉ။ ၵူၼ်းမိူင်း/ ၵူၼ်းၼုမ်ႇ လႆႈလူႉတၢႆ ၸွမ်းတၢင်းႁဵတ်းမိူၵ်ႈမႂ်ႈ လၢႆးႁုၵ်းႁၢႆႉ ၶွင် သိုၵ်းမၢၼ်ႈ မီး 737 ၵေႃႉ၊ ထုၵ်ႇၸွႆးတြႃးဝႆႉ 930 ၵေႃႉလႄႈ ထုၵ်ႇတီႉၺွပ်းယဵပ်ႈၶွၵ်ႈဝႆႉ 3,229 ၵေႃႉ ယူႇတီႈၸုမ်းၸွႆႈထႅမ် ၵူၼ်းတူၵ်းၶွၵ်ႈၵၢၼ်မိူင်း ၼႂ်းမိူင်းမၢၼ်ႈ ပိုၼ်ၽၢဝ်ႇဢွၵ်ႇဝႆႉ ၼႂ်းဝၼ်းတီႈ 18/4/2021 ၼႆႉ။