ၵူၼ်းပၢႆႈၽေးသိုၵ်း တီႈသီႇပေႃႉ ႁူဝ်ၵူၼ်း 1,352 ၵေႃႉ ပႆႇၸၢင်ႈပွၵ်ႈႁိူၼ်းယေး ယွၼ်ႉၼႂ်းပိုၼ်ႉတီႈ ပႆႇၼိမ်ယဵၼ် တိုၵ်ႉမီးလွင်ႈၶဵင်ႈၶႅင်ၵၢၼ်သိုၵ်းတေႃႇၵၼ်ယူႇ ဝႃႈၼႆ။
တႄႇဢဝ်ႁၢင်လိူၼ်မၢတ်ႊၶျ်မႃး တေႃႇထိုင်ယၢမ်းလဵဝ် ၵူၼ်းမိူင်း သီႇပေႃႉ – ၼမ်ႉတူႈ ဢွၼ်ၵၼ်ပၢႆႈၽေးသိုၵ်း ႁွတ်ႈၽႅဝ် သီႇပေႃႉ ၸိုင်ႈတႆး ပွတ်းႁွင်ႇ ႁူဝ်ၵူၼ်း 1,352 ၵေႃႉ ဢွၼ်ၵၼ်မႃးသွၼ်ႈ ဝႆႉတီႈ ဝတ်ႉမၢၼ်ႈလီႈသီႇပေႃႉ၊ ဝတ်ႉယေႇႁေႃႇ၊ ဝတ်ႉ 2500 ၊ ဝတ်ႉၽူဝ်းတေႃႇလႄႈ ႁွင်ႈၵဵပ်းၶွင် သႃးတူင်းတူႇ (ၵူဝ်ႇတွင်ႇ) ၸိူဝ်းၼႆႉ။
ၼၢင်းမွၼ်းပဝ်း ၽူႈတႅၼ်းသၽႃး သီႇပေႃႉ ဢၼ်ဢွင်ႇပေႉ ပၢင်လိူၵ်ႈတင်ႈ ပီ 2020 လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်း လဵဝ်ၵူၼ်းပၢႆႈၽေးသိုၵ်း ႁဵင်ပၢႆၼႆႉ ဢၼ်လူဝ်ႇတၢင်း ၸွႆႈထႅမ် ႁႅင်းတႄႉ ယႃႈယႃ။ ယၢမ်းလဵဝ် လုၵ်ႈဢွၼ်ႇၼႆႉ ပဵၼ်ဝတ်း ပဵၼ်ဢၢၼ် ပဵၼ်ၼၢဝ် လွင်ႈၵိၼ်ယႅမ်ႉတႄႉ ၵုမ်ႇထူၼ်ႈယူႇ”- ဝႃႈၼႆ။
ၵူၼ်းပၢႆႈၽေးသိုၵ်း 1,352 ၵေႃႉၼၼ်ႉ သွၼ်ႈဝႆႉ တီႈဝတ်ႉမၢၼ်ႈလီႈသီႇပေႃႉ ႁူဝ်ၵူၼ်း 430 ၵေႃႉ ပဵၼ်ၵူၼ်း ဝၢၼ်ႈၶၢႆးမွၼ် တင်း မၢၼ်ႈၵျွင်း၊ တီႈဝတ်ႉယေႇႁေႃႇသမ်ႉ ႁူဝ်ၵူၼ်းတေမီး 510 ၵေႃႉ ပဵၼ်ၵူၼ်း မၢၼ်ႈလီႈ – ပၢင်လူင် ၸႄႈ ဝဵင်းၼမ်ႉတူႈ တင်း မၢၼ်ႈမႂ်ႇ – တႃႈၽႃလၢႆး ၸႄႈဝဵင်းသီႇပေႃႉ၊ ဝတ်ႉ 2500 သမ်ႉ မီး 25 ၵေႃႉ ပဵၼ်ၵူၼ်းမၢၼ်ႈလီႈ ၸႄႈ ဝဵင်းၼမ်ႉတူႈ၊ တီႈႁွင်ႈၵဵပ်းၶွင် သႃးတူင်းတူႇ (ၵူဝ်ႇတွင်ႇ) မီး 230 ၵေႃႉ ပဵၼ်ၵူၼ်းမၢၼ်ႈလီႈ ၸႄႈဝဵင်းၼမ်ႉတူႈလႄႈ ဝတ်ႉ ၽူဝ်းတေႃႇ 156 ၵေႃႉ ပဵၼ်ၵူၼ်းဝၢၼ်ႈၵုင်းၸၢင်ႈလဵၵ်း တင်း တႃႈတေႈ ၸိူဝ်းၼႆႉ။ မုင်ႉႁေႃႁိူၼ်း တင်းမူတ်း 327 လင်ၶႃႈႁိူၼ်း၊ ၽူႈၸၢႆး 649 ၵေႃႉ၊ ၽူႈယိင်း 703 ၵေႃႉ ။
ၵူၼ်းပၢႆႈၽေးသိုၵ်း ဢၼ်ႁွတ်ႈဝႆႉတီႈသီႇပေႃႉၵေႃႉၼိုင်ႈ လၢတ်ႈဝႃႈ – “မိူဝ်ႈဝႃး တၢင်းမၢၼ်ႈလီႈၼမ်ႉလၼ်ႈၼႆႉ မၢၵ်ႇတိုၵ်ႉ တႅၵ်ႇယူႇ။ ၶဝ်ယူႇယူႇ ပွႆႇမၢၵ်ႇၸူးၵၼ် ၶဵင်ႈၶႅင်တေႃႇၵၼ်။ ၵူၼ်းသိုၵ်းၵေႃႈ သမ်ႉမီးယူႇၼႂ်းဝၢၼ်ႈ ။ ႁဝ်းၶႃႈ ပႆႇႁတ်းပွၵ်ႈမိူဝ်း ၶႃႈ။ ပဵၼ်သိုၵ်းႁဝ်း တေႃႇႁဝ်း ၵူၺ်းၶႃႈဢေႃႈ သိုၵ်းယွင်ႇဢႃႇၼႃႇၼင်ႇၵၼ်ၶႃႈ လူင်”- ဝႃႈၼႆ။
ဢိင်ၼိူဝ်လွင်ႈၼႆႉ ယွၼ်ႉသိုၵ်း RCSS ၊ သိုၵ်း SSPP လႄႈ ၸုမ်းဢူၺ်းလီ ပွတ်းႁွင်ႇ ၸိူဝ်းၼႆႉ ပဵၼ်ပၢင်တိုၵ်းၵၼ် ႁၢဝ်ႈ ႁႅင်းမႃး တင်ႈတႄႇ မိူဝ်ႈဝၼ်းတီႈ 23/3/2021 ၼၼ်ႉမႃး တေႃႇထိုင်ယၢမ်းလဵဝ် ပႆႇယဵၼ် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ