SHRF တိုၵ်းသူၼ်းထိုင် ၶွမ်ႊပၼီႊ Razel – Bec ၾရင်ႊသဵတ်ႊႁႂ်ႈၵိုတ်းယင်ႉၶူင်းၵၢၼ်သၢင်ႈၾၢႆ ၼႂ်းမိူင်းတႆး မိူၼ်ၼင်ႇၶွမ်ႊပၼီႊ EDF ဢၼ်ၵိုတ်းယင်ႉၶူင်းၵၢၼ်ၵႂႃႇ။
မိူဝ်ႈၼႆႉ ဝၼ်းတီႈ 12/4/2021 ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF ဢွၵ်ႇၽိုၼ် တၢမ်းငဝ်းလၢႆး လူၺ်ႈလွင်ႈယိၼ်း ႁၼ်လီၸွမ်း ဢၼ်ၶွမ်ႊပၼီႊ Electricite de France (EDF) တႅတ်းတပ်းၵိုတ်းယင်ႉၶူင်းၵၢၼ်ၼၼ်ႉ သၢင်ႈၾၢႆ ၼႂ်းမိူင်း တႆးသေ တိုၵ်းသူၼ်းႁႂ်ႈၶွမ်ႊပၼီႊ Razel – Bec ၾရင်ႊသဵတ်ႊ ယိူင်ႈၸွမ်းလႄႈ ထွၼ်ၵၢၼ် လူင်းတိုၼ်းဢွၵ်ႇတီႈၾၢႆ ယႄးယႂႃႇတွၼ်ႈၼိူဝ် ၼႂ်းမႄႈၼမ်ႉတူႈ ၸိုင်ႈတႆးပွတ်းႁွင်ႇ ၵမ်းလဵဝ် ၼႆယဝ်ႉ။
ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈတီႈၽူႈတွႆႇႁွၵ်ႈဝႃႈ – “ဢိင်ၼိူဝ်လွင်ႈ တၢင်းငဝ်းလၢႆး ဢၼ်သိုၵ်းမၢၼ်ႈလႄႈ ၸဝ်ႈၼႃႈတီႈၶဝ် ႁဵတ်းႁၢႆႉမိူၵ်ႈလိူင်းတေႃႇ ၵူၼ်းမိူင်း ပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်းလူၼ်ႉလိူဝ်ႁၢဝ်ႉႁႅင်း ယူႇၵူႈမိုဝ်ႉ ၵူႈဝၼ်းလႄႈ ႁဝ်းၶႃႈ တိုၵ်းသူၼ်း တုၵ်းယွၼ်းထိုင်ၶွမ်ႊပၼီႊၼွၵ်ႈမိူင်း ၸိူဝ်းမႃးလူင်းတိုၼ်းၶူင်းၵၢၼ်ယႂ်ႇလူင် တင်း သဵင်ႈထွၼ်ဢွၵ်ႇ ၼႂ်းမိူင်းတႆးႁဝ်းၶႃႈဢေႃႈ။ သင်ၶဝ် သိုပ်ႇယူႇလူင်းတိုၼ်းလၢင်းၸိုင် မၼ်းမိူၼ်တင်းၶဝ်ဢဝ်ငိုၼ်းပၼ် သိုၵ်း မၢၼ်ႈသိုဝ်ႉ ၵွင်ႈၶိုၼ်းယိုဝ်းၵူၼ်းမိူင်းၵူၺ်း”- ဝႃႈၼႆ။
မိူဝ်ႈဝၼ်းတီႈ 19/3/2021 ၼၼ်ႉ ၶွမ်ႊပၼီႊလူင်ပွင်ၸိုင်ႈမိူင်းၾရင်ႊသဵတ်ႊ ဢၼ်ပဵၼ် Electricite de France (EDF) ပိုၼ်ၽၢဝ်ႇဝႃႈ လႆႈၵိုတ်းယင်ႉ လွင်ႈၵေႃႇသၢင်ႈ ၾၢႆသူၺ်ႇလီ 3 ၼႂ်းၸိုင်ႈတႆးပွတ်းႁွင်ႇ ၵွပ်ႈမႆႈၸႂ်ၸွမ်းငဝ်းလၢႆးသုၼ်ႇလႆႈ ၵူၼ်းဝၢႆးသိုၵ်းမၢၼ်ႈယိုတ်းဢႃႇၼႃႇ/ ဢၢမ်းၼၢတ်ႈၸိုင်ႈမိူင်း မိူဝ်ႈဝၼ်းတီႈ 1/2/2021 ဝႃႈၼႆ။
ၶူင်းၵၢၼ်ၽၢႆယႄးယႂႃႇတွၼ်ႈၼိူဝ်ဢၼ်တႄႇမႃး ၸဵမ်မိူဝ်ႈပၢၼ် လူင်ပွင်ၸိုင်ႈသိုၵ်းမၢၼ်ႈ ၼႂ်းပီ 2008 ၼၼ်ႉ ၸုမ်းတူင်ႇ ဝူင်းၵူၼ်းတႆးလႆႈသၢၼ်ၶတ်းမႃး ႁၢဝ်ႈႁႅင်း ၵွပ်ႈဝႃႈၵူၼ်းမိူင်း တိုၼ်းဢမ်ႇလႆႈႁပ်ႉႁူႉသင်လႄႈ ဢမ်ႇလႆႈၸႂ် ။ ဢၢင်ႇၵဵပ်းၼမ်ႉ ၾၢႆႁႅင်းၾႆးၾႃႉ 280 မေႊၵႃႊဝတ်ႊၼၼ်ႉ တေယိုင်ႈၶိုၼ်ႈ တႃႇ 60 ၵီႊလူဝ်ႊမေႊတိူဝ်ႊလႄႈ တေထိုင် ဝဵင်းသီႇပေႃႉ။ၼမ်ႉတေထူမ်ႈမူႇဝၢၼ်ႈတႆး ဢၼ်မီးမႃးၸဵမ် ႁူဝ်ပၢၵ်ႇပီ ပႃးတင်းႁႆႈၼႃးလိၼ်ငႂ်ႈလီ ။ ဢွင်ႈတီႈ တေသၢင်ႈၾၢႆ ၼႆႉယူႇဝႆႉ ၼႂ်းပိုၼ်ႉတီႈသိုၵ်းသိူဝ်လႄႈသိုၵ်းမၢၼ်ႈ ဢဝ်ႁူမ်ႇလူမ်ႈပၼ်သေ သိုၵ်းမၢၼ်ႈၸိူဝ်းၼၼ်ႉ ၵႆႉပူၼ်ႉပႅၼ်သုၼ်ႇ လႆႈ သုၼ်ႇပဵၼ်ၵူၼ်းဝၢၼ်ႈ၊ ပႃးၸဵမ်လွင်ႈၶႃႈႁႅမ်တၢႆ ၵူၼ်းမိူင်း၊ တဵၵ်းဢဝ်ၵူၼ်းဝၢၼ်ႈႁဵတ်းႁူဝ်ႉၶႄတူဝ် ၽွင်းဢွၵ်ႇၼႃႈသိုၵ်း ၸိူဝ်းၼႆႉ။ ၾၢႆယႄးယႂႃႇတွၼ်ႈၼိူဝ်ၼႆႉ ၸႂ်ႉတိုဝ်းငိုၼ်းတိုၼ်းတီႈယႄးငိုၼ်းမိူင်းၶႄႇသေၶိုင် ၵေႃႇ သၢင်ႈ။
ဢၼ်လႆႈႁပ်ႉႁူႉတႄႉၶွမ်ႊပၼီႊၼွၵ်ႈမိူင်းၸိူဝ်းထွၼ်ဢွၵ်ႇ ဢမ်ႇၼၼ်ၵိုတ်းယင်ႉပႅတ်ႈဝႆႉၼၼ်ႉ တေမီးမွၵ်ႈ 2-3 ၼႆႉ ၵူၺ်း။ ၵမ်ႈၼမ်ပဵၼ်ၶွမ်ႊပၼီႊ မိူင်းဝၼ်းတူၵ်း။ ၶွမ်ႊပၼီႊ ၾရင်ႊသဵတ်ႊ Engie 2019 ၶူင်းၵၢၼ်ၽၢႆယႄးယႂႃႇတွၼ်ႈ ၼိူဝ်၊ ၶွမ်ႊပၼီႊ Stucky သဝိတ်ႊၸိူဝ်ႊလႅၼ်ႊ 2020 ၶူင်းၵၢၼ်ၽၢႆယႄးယႂႃႇတွၼ်ႈၼိူဝ်၊ ၶွမ်ႊပၼီႊ Electricite de France (EDF) ၶူင်းၵၢၼ်ၽၢႆသူၺ်ႇလီႇ 3 ၸိုင်ႈတႆးပွတ်းႁွင်ႇ ၵိုတ်းယင်ႉၼႂ်းလိူၼ်မၢတ်ႉၶျ် 2021။ မိူဝ်ႈလဵဝ် ႁဝ်းၶႃႈတိုၵ်း သူၼ်း တုၵ်းယွၼ်းၶွမ်ႊပၼီႊ Razel-Bec ၶွင်ၾရင်ႊသဵတ်ႊ ႁႂ်ႈထွၼ်ဢွၵ်ႇၼႂ်းၶူင်းၵၢၼ်ၽၢႆယႄးယႂႃႇတွၼ်ႈၼိူဝ်ထႅင်ႈ။ ၶွမ်ႊပၼီႊၸိူဝ်းပဵၼ်မိူင်းႁွိမ်းႁွမ်းႁဝ်း မိူၼ်ၶႄႇတႄႉယင်းပႆႇတူင်ႉၼိုင်ထွၼ်ဢွၵ်ႇ ဢမ်ႇၼၼ် ၵိုတ်းယင်ႉသင် ၸၢႆးႁေႃ သႅင် သိုပ်ႇလၢတ်ႈၼႄၼင်ႇၼႆ။
