ၵူၼ်းမိူင်းပိုၼ်ႉတီႈ ပူႇၵႄႇဝၢၼ်ႈပၢင်ၶႃး တင်း ၽူႈမၢႆဢိူင်ႇဝၢၼ်ႈလီႈ ထုၵ်ႇၸုမ်းယိပ်းၵွင်ႈၵၢင်ႇၸၢဝ်းၶိူဝ်း တီႉၺွပ်းႁွင်ႉၵႂႃႇ ထိုင်ယၢမ်းလဵဝ် ပႆႇပွႆႇတူဝ် ပေႃႈမႄႈပီႈၼွင်ႉလုၵ်ႈလၢင်းၼၢင်းမေးတၢင်းၼွင်ႈတၢင်းလင် မႆႈၸႂ် တုၵ်းယွၼ်းႁႂ်ႈပွႆႇတူဝ်ပၼ်ၶိုၼ်းၽႂ်းၽႂ်း ဝႃႈၼႆ။

ၼႂ်းလိူၼ်မၢတ်ႊၶျ် တင်း လိူၼ်ဢေႊၿရိူဝ်ႊ 2021 ၼႆႉ လုင်းဝိ ဢႃယု မွၵ်ႈ 48 ပီ ပူႇၵႄႇဝၢၼ်ႈပၢင်ၶႃး တင်း ၸၢႆးလႃႉဢွင်ႇ ဢႃယု မွၵ်ႈ 30 ပီ ၽူႈမၢႆဢိူင်ႇဝၢၼ်ႈလီႈ ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ထုၵ်ႇၸုမ်းယိပ်းၵွင်ႈၵၢင်ႇၸၢဝ်းၶိူဝ်း တီႉ ၺွပ်းႁွင်ႉၵႂႃႇ ထိုင်ယၢမ်းလဵဝ် ပႆႇပွႆႇတူဝ်ပွၵ်ႈမႃးၶိုၼ်း ၼႆယဝ်ႉ။

ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၵေႃႉၼိုင်ႈ တီႈသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “လုင်းဝိ တင်း ၸၢႆးလႃႉဢွင်ႇၼႆႉ ထုၵ်ႇၸုမ်းယိပ်းၵွင်ႈၵၢင်ႇ ၸုမ်းလႂ် တီႉၺွပ်းၵႂႃႇၼၼ်ႉ ပႆႇႁူႉ။ ၵူၺ်းၵႃႈ ယူႇတီႈၸိူဝ်ႉၶိူဝ်းပီႈၼွင်ႉလုၵ်ႈလၢင်းၼၢင်းမေးၶဝ်  ပဵၼ်ဢၼ် မႆႈၸႂ် တၢႆႁိုဝ် လိပ်းႁိုဝ် ဢမ်ႇလႆႈႁူႉၶၢဝ်ႇငၢဝ်း ။ တုၵ်းယွၼ်းႁႂ်ႈပွႆႇပၼ်ၽႂ်းၽႂ်းသေၵမ်း”- ဝႃႈၼႆ။

လုင်းဝိၼႆႉ ပဵၼ်ပူႇၵႄႇဝၢၼ်ႈပၢင်ၶႃး ၼႂ်းဢိူင်ႇသူၼ်လူင် ထုၵ်ႇၸုမ်းယိပ်းၵွင်ႈၵၢင်ႇ တီႉၺွပ်းၵႂႃႇ မိူဝ်ႈဝၼ်းတီႈ 18/3/2021 ၼၼ်ႉ တေႃႇထိုင်ယၢမ်းလဵဝ် ပႆႇပွႆႇတူဝ်မႃး ၶိုၼ်းၼႆယဝ်ႉ။

“လုင်းဝိၼႆႉ ထုၵ်ႇၸုမ်းယိပ်းၵွင်ႈၵၢင်ႇတီႉၵႂႃႇ မိူဝ်ႈပဵၼ်ပၢင်တိုၵ်းၵၼ် ပူၼ်ႉမႃး တီႈဢိူင်ႇၽႃလၢႆးၼၼ်ႉ။ ၸၢႆးလႃႉဢွင်ႇ တႄႉ ထုၵ်ႇတီႉၵႂႃႇ မိူဝ်ႈႁူဝ်လိူၼ်ၼႆႉ တေမီးမွၵ်ႈၼိုင်ႈဝူင်ႈယဝ်ႉ”- ၽူႈတူင်ႉၼိုင် ၼႂ်းတူင်ႇဝူင်းၵူၼ်း သီႇပေႃႉ လၢတ်ႈၼႄၼင်ႇၼႆ။

ၸၢႆးလႃႉဢွင်ႇသမ်ႉ ပဵၼ်ၽူႈမၢႆဢိူင်ႇဝၢၼ်ႈလီႈ ထုၵ်ႇၸုမ်းယိပ်းၵွင်ႈၵၢင်ႇတီႉၺွပ်းၵႂႃႇ မိူဝ်ႈႁူဝ်လိူၼ်ဢေႊၿရိူဝ်ႊၼႆႉၵေႃႈ တေႃႇထိုင်ယၢမ်းလဵဝ် ပႆႇပွႆႇတူဝ် ၼႆယဝ်ႉ။