ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝတ်ႉဢွင်ႇမင်ႇၵလႃႇၽူဝ်းတေႃႇၸႄႈဝဵင်း သီႇပေႃႉ ပွၵ်ႈမိူဝ်းႁိူၼ်းယေးၵၼ် ပႆႇတဵမ်ဝၼ်း လႆႈပွၵ်ႈမႃးၶိုၼ်း တီႈဝတ်ႉ ႁူဝ်ၵူၼ်း 80 ပၢႆ ဝႃႈၼႆ။
မိူဝ်ႈဝႃး ဝၼ်းတီႈ 30/3/2021 ယၢမ်းႁူဝ်ၶမ်ႈ ၵူၼ်းဝၢၼ်ႈသူၼ်လူင် တင်း ဝၢၼ်ႈႁၢတ်ႇလႅၼ်ႈ ႁူဝ်ၵူၼ်း 80 ပၢႆ လႆႈဝၢႆႇပွၵ်ႈမႃး ၶိုၼ်းတီႈဝတ်ႉဢွင်ႇမင်ႇၵလႃႇၽူဝ်းတေႃႇ ၼႂ်းဝဵင်းသီႇပေႃႉ ၸိုင်ႈတႆးပွတ်းႁွင်ႇ ယွၼ်ႉငဝ်းလၢႆးၼႂ်းပိုၼ်ႉတီႈ ဢမ်ႇၼိမ် ။
ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈ ဝတ်ႉၽူဝ်းတေႃႇ လၢတ်ႈဝႃႈ – “ႁဝ်းၶႃႈ ဢွၼ်ၵၼ်ပွၵ်ႈမိူဝ်း ယၢမ်းၵၢင်ၼႂ်သေ ထိုင်မႃးဝၢႆးဝၼ်း တမ်းၶမ်ႈ ၶိုၼ်းဢွၼ်ၵၼ် ပၢႆႈဢွၵ်ႇမႃးၶိုၼ်းၶႃႈဢေႃႈ ယွၼ်ႉၼႂ်းပိုၼ်ႉတီႈ သိုၵ်းတႆး ၼင်ႇၵၼ် တိုၵ်ႉၶဵင်ႈ ၶႅင်ၵၼ် ဝႆႉႁၢဝ်ႈႁႅင်းယူႇ”- ဝႃႈၼႆ။
မိူဝ်ႈဝႃး ယၢမ်းၵၢင်ၼႂ် ၵူၼ်းဝၢၼ်ႈသူၼ်လူင်၊ ႁၢတ်ႇလႅၼ်ႈတင်း ဝၢၼ်ႈတႃႈတေႈ၊ ဝၢၼ်ႈၵုင်းၸၢင်ႈလဵၵ်းလႄႈ ဝၢၼ်ႈၶျွင်း သူင်ႇ ၸိူဝ်းၼႆႉ တိုၵ်ႉပွၵ်ႈမိူဝ်းၶိုၼ်းႁိူၼ်း ယေးၽႂ်မၼ်း။ တီႈဝတ်ႉၽူဝ်းတေႃႉတႄႉ ၵိုတ်းဝႆႉ ၵူၼ်းထဝ်ႈလႄႈ လုၵ်ႈဢွၼ်ႇ ႁူဝ်ၵူၼ်း မွၵ်ႈ 20 ပၢႆ။ ထိုင်မႃးယၢမ်းႁူဝ်ၶမ်ႈသမ်ႉ ၵူၼ်းဝၢၼ်ႈသူၼ်လူင် တင်းဝၢၼ်ႈႁၢတ်ႇလႅၼ်ႈ ႁူဝ်ၵူၼ်း 80 ပၢႆ လႆႈဝၢႆႇ ပွၵ်ႈမႃးၶိုၼ်း တီႈဝတ်ႉ ယၢမ်းလဵဝ် တီႈဝတ်ႉၽူဝ်းတေႃႇ ႁူဝ်ၵူၼ်းမီး 100 ပၢႆ ၼႆယဝ်ႉ။
လိူဝ်ၼၼ်ႉ တီႈဝတ်ႉၼမ်ႉဢုမ်ၵေႃႈ ၵူၼ်းဝၢၼ်ႈၽႃလၢႆး တင်း ဝၢၼ်ႈပႃႇၶႃႈ ပၢႆႈမႃးသွၼ်ႈဝႆႉ ႁူဝ်ၵူၼ်း 210 ၵေႃႉ တေႃႇထိုင် ယၢမ်းလဵဝ် ပႆႇပဵၼ်ပွၵ်ႈႁိူၼ်းယေးၵၼ် ၼႆယဝ်ႉ။
တႄႇဢဝ်ဝၼ်းတီႈ 23 လိူၼ်ၼႆႉမႃး ယွၼ်ႉသိုၵ်း SSPP တင်း RCSS ပဵၼ်ပၢင်တိုၵ်း ၵၼ်ႁၢဝ်ႈႁႅင်းသေ ၵူၼ်းဝၢၼ်ႈၼႂ်း ၸႄႈဝဵင်းသီႇပေႃႉ လႆႈဢွၼ်ၵၼ်ပၢႆႈဢွၵ်ႇဝၢၼ်ႈ မွၵ်ႈ ႁူဝ်ၵူၼ်း 400 ပၢႆ ၼႆယဝ်ႉ။
