ၶွင်ႇသီႇသိုၵ်းမၢၼ်ႈ လၵ်ႉၽဝ်ၶၢပ်ႈတူဝ်တၢႆ ၵူၼ်းမိူင်း ယၢမ်းၵၢင်ၶိုၼ်း တီႈဝဵင်းဢွင်ႇပၢၼ်း ဢမ်ႇယွမ်း 7 ၵေႃႉ ၵူၼ်းမိူင်းပိုၼ်ႉတီႈ ဢွင်ႇပၢၼ်း လၢတ်ႈ။
မိူဝ်ႈဝႃး ဝၼ်းတီႈ 29/3/2021 ယၢမ်းၵၢင်ၶိုၼ်းမွၵ်ႈ 9 မူင်းၶိုင်ႈ ၶွင်ႇသီႇသိုၵ်းမၢၼ်ႈ ဢဝ်ၶၢပ်ႈတူဝ်တၢႆ ၵူၼ်းမိူင်း မႃးၽဝ် တီႈ ပႃႇႁဵဝ်ႈ ဝဵင်းဢွင်ႇပၢၼ်း ၸိုင်ႈတႆး ပွတ်းၸၢၼ်း ။
ၵူၼ်းမိူင်း ဢွင်ႇပၢၼ်း ၵေႃႉၼိုင်ႈ လၢတ်ႈဝႃႈ – “မိူဝ်ႈဝႃး ၸဵမ်သိုၵ်းမၢၼ်ႈ ပလိၵ်ႈ ဢဵၼ်ႁႅင်းတင်းၼမ် မႃးၽဝ်ၶၢပ်ႈတူဝ် တၢႆ ၵူၼ်းမိူင်း တီႈပႃႇႁဵဝ်ႈ ဢွင်ႇပၢၼ်း။ ၶဝ်ယႃႉၽၵ်းတူပႃႇႁဵဝ်ႈသေ ၶဝ်ႈၵႂႃႇၽဝ်ၵႂႃႇႁင်းၵူၺ်းၶဝ်။ မိူဝ်ႈၼႆႉ ၵၢင်ၼႂ် ႁဝ်းၶႃႈၵႂႃႇတူၺ်း လႆႈ ႁၼ်လုပ်ႇၵူၼ်းဢၼ်ၽဝ်ဝႆႉၼၼ်ႉ ဢမ်ႇယွမ်းတေမီးယူႇမွၵ်ႈ 7 ၵေႃႉ”- ဝႃႈၼႆ။
မိူဝ်ႈဝႃးယၢမ်းၵၢင်ၶိုၼ်း ပလိၵ်ႈသိုၵ်းမၢၼ်ႈ ဢဝ်ရူတ်ႉၵႃး 7-8 လမ်း တၢင်ႇဢဵၼ်ႁႅင်းၵူၼ်းမႃးတင်းၼမ်သေ မႃးယႃႉၽၵ်းတူပႃႇ ႁဵဝ်ႈ ဢွင်ႇပၢၼ်းၵွႆ၊ ဢဝ်တူဝ်တၢႆၵူၼ်းဢၼ်တၢင်ႇမႃးၸွမ်းရူတ်ႉၵႃးၼၼ်ႉ မႃးၽဝ်။ ၵူၺ်းၵႃႈပဵၼ်ၽႂ် ၵူၼ်းမိူင်းလႂ်တႄႉတႄႉၼႆၽႂ်ၵေႃႈပႆႇႁူႉၸွမ်းလႆႈ ။
“ၵူၼ်းဢၼ်ၶဝ်မႃးၽဝ်ၼႆႉ လႅပ်ႈပဵၼ်ၵူၼ်းမိူင်းဢၼ်ၼႄၵၢင်ၸႂ် ဢၼ်ၶဝ်တီႉႁွပ်းလႆႈ တီႈတူၼ်ႈ တီးၸိူဝ်းၼႆႉၶႃႈၼေႈ။ ၵူၼ်းဢွင်ႇပၢၼ်းတႄႉဢမ်ႇလႅပ်ႈၸႂ်ႈၶႃႈ။ ၶဝ်သမ်ႉလၵ်ႉမႃးၽဝ် ယၢမ်းၵၢင်ၶိုၼ်း ၵူဝ်ၵူၼ်းမိူင်းႁၼ်ၸွမ်းၵေႃႈပဵၼ်လႆႈ။ သင်ဝႃႈ ၶဝ်ၽဝ်တီႈတူၼ်ႈတီး ၼႆၸိုင် ၵူၼ်းမိူင်းတေႁၼ်ၵႂၼ်းၾႆး။ ”- ၵူၼ်းပိုၼ်ႉတီႈဢွင်ႇပၢၼ်း သိုပ်ႇလၢတ်ႈၼႄၼင်ႇၼႆ။
ၽွင်းၵူၼ်းမိူင်းႁၼ် ၵႂၼ်းၾႆးပဵဝ်ၾႆးထူမ်ႈမိူင်းၼၼ်ႉ ၵူၼ်းမိူင်းၼႅတ်ႈဢွၵ်ႇၵႂႃႇတူၺ်း၊ သမ်ႉၵႂႃႇႁိုၵ်ႉၺႃးၾုင်သိုၵ်းမၢၼ်ႈလႄႈ ၺႃးသိုၵ်းမၢၼ်ႈႁိုတ်းႁၢတ်ႇထၢတ်ႇသႂ်ႇလွၵ်ႇငိုတ်ႈလိုပ်ႈလမ်းႁႂ်ႈပွၵ်ႈႁိူၼ်းၶိုၼ်း တိုၼ်းဢမ်ႇပၼ်မႃးတူၺ်း ဝႃႈၼႆ။
“မိူဝ်ႈဝႃးၵၢင်ၶိုၼ်းၼၼ်ႉ ႁဝ်းၶႃႈ ႁၼ်ၵႂၼ်းၾႆး ပိဝ်ၶိုၼ်ႈထူမ်ႈမိူင်းသေ ႁဝ်းၶႃႈ ဢွၼ်ၵၼ်တူၵ်းၸႂ်ၶႃႈဢေႃႈ။ၶဝ်လိုပ်ႈႁဝ်းၶႃႈဢေႃႈ။ ပေႃးဢမ်ႇပွၵ်ႈမိူဝ်းၶိုၼ်းတႄႉ ၶဝ်တေႁဵတ်းႁၢႆႉတေႃႇ၊ ယႃႇၼႄးတၢင်းၽိတ်းၶဝ် – ၶဝ်ဝႃႈၼႆဢေႃႈ။ ၽိူဝ်ႇႁဝ်းၶႃႈၵႂႃႇတူၺ်းၼႂ်ၼႆႉလႆႈႁၼ် ၶဝ်ဢဝ်မၢၵ်ႇ ယၢင်ၵႃး မႃးသႂ်ႇသေၽဝ်ၵူၺ်း။ ၵွၼ်းၾႆးၽဝ်ၵူၼ်းတၢႆၵေႃႈ တေႃႇထိုင်ၼႂ်ၼႆႉ မိူင်းပေႃးမိုတ်ႉမူဝ်းလူင်ဝႆႉၶႃႈဢေႃႈတီႈဢွင်ႇပၢၼ်းၼႆႉ ”- ၵူၼ်းမိူင်း ဢွင်ႇပၢၼ်း ဢႃယု 30 ပီ ၵေႃႉၼိုင်ႈ လၢတ်ႈၼႄၼင်ႇၼႆ။
ယၢမ်းလဵဝ် ၼႂ်းၸႄႈဝဵင်းဢွင်ႇပၢၼ်းၼႆႉ ၵၢင်ဝၼ်းၵၢင်ၶိုၼ်ႈ ၸွမ်းပွၵ်ႉ ၸွမ်းယွမ်ႇ ၸွမ်းသဵၼ်ႈတၢင်း ၸိူဝ်းၼႆႉ ပဵၼ် ပလိၵ်ႈသိုၵ်းမၢၼ်ႈ ပႂ်ႉတူၺ်း ယူႇတႃႇသေႇ တွၼ်ႈတႃႇ ၵူၼ်းမိူင်းၵူၼ်းၼုမ်ႇ တေဢွၵ်ႇၼႄၵၢင်ၸႂ်ၼႆႉ ပဵၼ်ဢၼ်ယၢပ်ႇ ၽိုတ်ႇဝႆႉ ဝႃႈၼႆ။
ဝူင်ႈပူၼ်ႉမႃးၼႆႉ ၵူၼ်းမိူင်းဢွင်ႇပၢၼ်းၵေႃႈၼႄၵၢင်ၸႂ်၊ သိုၵ်းမၢၼ်ႈၽဵဝ်ႈမူၺ်ႉႁၢဝ်ႈႁႅင်းထိုင်တီႈလူႉတၢႆၼပ်ႉႁူဝ်သိပ်း၊ ၺႃးသိုၵ်းမၢၼ်ႈတီႉၺွပ်းၵႂႃႇၸွမ်းၵေႃႈမီးတင်းၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ