သိုၵ်းမၢၼ်ႈ ပိုတ်ႇၼႃႈသိုၵ်းၸူး သိုၵ်းတဢၢင်း TNLA တၢင်းပွတ်းၸႄႈဝဵင်းၼမ်ႉၶမ်း ၸိုင်ႈတႆး ပွတ်းႁွင်ႇ ႁၢဝ်ႈႁႅင်း ဝႃႈၼႆ။
မိူဝ်ႈၼႆႉ ဝၼ်းတီႈ 25/3/2021 ယၢမ်းၵၢင်ၼႂ် မွၵ်ႈ 9 မူင်းၶိုင်ႈ သိုၵ်းမၢၼ်ႈ ဢၼ်ပၵ်းဝႆႉတီႈတၢင်းၾၢႆႇၸၢၼ်းဝဵင်း ယၢၼ်ၵႆ ဝဵင်း မွၵ်ႈၼိုင်ႈလၵ်း ၼႂ်းၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ ဢဝ်မၢၵ်ႇလူင် ယိုဝ်းၵႂႃႇတၢင်းဝၢၼ်ႈ ပၢင်ၶႃးလႄႈ ဝၢၼ်ႈပၢင်ႇဢွႆႇလေႃး သွင်ၾၢႆႇ ပဵၼ်ပၢင်တိုၵ်းၵၼ် ႁၢဝ်ႈႁႅင်း ။
ၵူၼ်း ၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သိုၵ်းမၢၼ်ႈ ယူႇတီႈၾၢႆႇၸၢၼ်းဝဵင်းသေ ယိုဝ်းမၢၵ်ႇလူင်ၵႂႃႇတၢင်း ပၢင်ၶႃး ပၢင်ႇဢွႆႇလေႃးၼၼ်ႉၶႃႈ။ သၢႆၼၼ်ႉသမ်ႉ သိုၵ်းတဢၢင်းယူႇဝႆႉလႄႈ မိူဝ်ႈၼႆႉ သဵင်ၵွင်ႈ တႅၵ်ႇ ၸဵမ်ၸဝ်ႉၶႃႈ။ ပူၼ်ႉမႃး 10 မိၼိတ်ႉၼႆႉ သိုၵ်းမၢၼ်ႈ ဢဝ်မၢၵ်ႇလူင်ပွႆႇသႂ်ႇထႅင်ႈလုၵ်ႈၼိုင်ႈ”- ဝႃႈၼႆ။
ၼႂ်းၸိုင်ႈတႆး ပွတ်းႁွင်ႇၼႆႉ ဝၢႆးသေ သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး မိူဝ်ႈဝၼ်းတီႈ 1/2/2021 ၼၼ်ႉသေ ယူႇတီႈ သိုၵ်းမၢၼ်ႈ ပိုတ်ႇၼႃႇသိုၵ်းၸူး ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ႁၢဝ်ႈႁႅင်း မိူၼ်ၼင်ႇ သိုၵ်းမၢၼ်ႈတင်း သိုၵ်းၶၢင်၊ တဢၢင်း၊ SSPP၊ RCSS ၸိူဝ်းၼႆႉ ။ၾၢႆႇၼိုင်ႈ ပိုတ်ႇၼႃႇသိုၵ်းၸူးထႅင်ႈ တၢင်းပွတ်းမိူင်းယၢင်းၽိူၵ်ႇ ၸုမ်းသိုၵ်း KNU ၸိူဝ်းၼႆႉထႅင်ႈ လူးၵွၼ်ႇ ဝႃႈၼႆ။
