ၼႂ်းႁၢင်လိူၼ်မၢတ်ႉၶျ်ၼႆႉ တပ်ႉသိုၵ်းမၢၼ်ႈ တေၸတ်းႁဵတ်း ပၢင်ၵႅဝ်ႈ ဝၼ်းၶွပ်ႈၶူပ်ႇ တပ်ႉသိုၵ်းၼႆသေ ယူႇတီႈ RCSS တႄႉ တေဢမ်ႇၶဝ်ႈႁူမ်ႈၸွမ်း ၽူႈၸမ်ၸႂ် RCSS ၵေႃႉၼိုင်ႈ လၢတ်ႈၼႄၼင်ႇၼႆ။
ပေႃးထိုင်မႃး ဝၼ်းတီႈ 27/3/2021 ၼႆႉ ယူႇတီႈတပ်ႉသိုၵ်းမၢၼ်ႈ/ ၶွင်ႇသီႇသိုၵ်းမၢၼ်ႈ ဢၼ်ယိုတ်းဢႃႇၼႃႇ ၸိုင်ႈမိူင်းၼႆႉ တေၸတ်းႁဵတ်းပၢင်ၵႅဝ်ႈ ဝၼ်းတပ်ႉသိုၵ်း။ ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/ SSA တႄႉ တေဢမ်ႇၶဝ်ႈႁူမ်ႈၸွမ်း ဝႃႈၼႆ။
ၽူႈၸမ်ၸႂ် RCSS လၢတ်ႈဝႃႈ – “ဝၼ်းပၢင်ၵႅဝ်ႈ ဢၼ်ယူႇတီႈတပ်ႉသိုၵ်းမၢၼ်ႈၶဝ် တေၸတ်းႁဵတ်းၼႂ်းႁၢင်လိူၼ်ၼႆႉတႄႉ ယူႇတီႈ RCSS တႄႉ တေဢမ်ႇၵႂႃႇႁူမ်ႈၸွမ်း”- ဝႃႈၼႆ။
ဢိင်ၼိူဝ် လွင်ႈၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢၼ်ၵိုတ်းတိုၵ်းပတ်ႉပိုၼ်ႉတူဝ်ႈမိူင်း NCA 10 ၸုမ်းၼၼ်ႉ တႃႇ 4 ၸုမ်း တေၶဝ်ႈႁူမ်ႈၸွမ်း ဝႃႈၼႆ။
ၼႂ်း 4 ၸုမ်း ဢၼ်တေၶဝ်ႈႁူမ်ႈၸွမ်းၼၼ်ႉပဵၼ် ၸုမ်းပႃႇတီႇမိူင်းမွၼ်းမႂ်ႇ (NMSP)၊ တပ်ႉသိုၵ်းယၢင်းၵမ်ႉထႅမ်ၻီႊ မူဝ်ႊၶရေႊၸီႊ(DKBA)၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈယၢင်း-ၶွင်ႇသီႇ ငမ်းယဵၼ် (KNLA-PC) လႄႈ ပႃႇတီႇပူတ်းပွႆႇၸိူဝ်ႉ ၸၢတ်ႈရၶႅင်ႇ (ALP) ၸိူဝ်းၼႆႉ တီႈသိုဝ်ႇၶၢဝ်ႇ Myanmar Now ဢွၵ်ႇဝႆႉၼင်ႇၼႆ။
ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း လူင်းလၢႆးမိုဝ်းၵိုတ်းတိုၵ်း ပတ်းပိုၼ်ႉတူဝ်ႈမိူင်း NCA 10 ၸုမ်းၼႆႉ မီးမိူၼ်ၼင်ႇ ၶွင်ႇသီႇ ဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA)၊ ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO)၊ တႅဝ်းႁူမ်ႈၸိူဝ်ႉ ၸၢတ်ႈၶျၢင်း (CNF)၊ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊလုၵ်ႈႁဵၼ်း မိူင်းမၢၼ်ႈပတ်းပိုၼ်ႉ (ABSDF)၊ ႁူမ်ႈတုမ်ၸိူဝ်ႉၸၢတ်ႈ ယၢင်းၽိူၵ်ႇ (KNU)၊ တပ်ႉသိုၵ်းယၢင်း ၵမ်ႉထႅမ်ၻီႊမူဝ်ႊၶရေႊၸီႊ(DKBA)၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈယၢင်း-ၶွင်ႇသီႇ ငမ်းယဵၼ် (KNLA-PC)၊ ပႃႇတီႇပူတ်းပွႆႇၸိူဝ်ႉၸၢတ်ႈရၶႅင်ႇ (ALP)၊ ၸုမ်းလႃးႁူႇတီႇမူဝ်ႊၶရႅတ်ႉတိၵ်ႉ LDU လႄႈ ၸုမ်းပႃႇ တီႇမိူင်း မွၼ်းမႂ်ႇ NMSP ၸဵမ်ၸိူဝ်းၼႆႉ။
