ၽၵ်းတူ ၶဝ်ႈဢွၵ်ႇ လႅၼ်လိၼ်တႆး – ထႆး ဢၼ်ပဵၼ်တၢင်း ၵၢႆႇၸူး ၶၢမ်ႈၶဝ်ႈဢွၵ်ႇ ၵႂႃႇမႃးႁႃၵၼ် တီႈတႃႈၶီႈလဵၵ်း – မႄႈသၢႆ ၼၼ်ႉ တႃႇႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼႆသေၾၢႆႇထႆးပိၵ်ႉဢိုတ်းမႃး မီးၶၢဝ်းတၢင်း ၼိုင်ႈပီတဵမ် မိူဝ်ႈၼႆႉ ယင်းပႆႇပိုတ်ႇပၼ်ၶိုၼ်း။
တႄႇဢဝ်ဝၼ်းတီႈ 23/3/2020 မႃး တေႃႇထိုင် ဝၼ်းတီႈ 23/3/2021 မိူဝ်ႈၼႆႉ လူင်ပွင်ၸိုင်ႈ မိူင်းထႆး ၸီႉသင်ႇ ပိၵ်ႉ ဢိုတ်း ၶူဝ်မိုတ်ႈၵိုဝ်း မၢႆ 1 လႅၼ်လိၼ် တႆး – ထႆး တႃႈၶီႈလဵၵ်း – မႄႈသၢႆ ၸိုင်ႈတႆး ပွတ်းဢွၵ်ႇၶူင်း မီးၶၢဝ်း တၢင်းၼိုင်ႈပီ တဵမ် ၵၢၼ်ၵႃႉၶၢႆလႆႈၵိုတ်းလိုဝ်ႈတေႃႇထိုင်ဝၼ်းမိူဝ်ႈၼႆႉလႄႈ ၵူၼ်းမိူင်းသွင်ၾင်ႇယၢပ်ႇၽိုတ်ႇၵိၼ်းၸႂ် ၊ ၵႃႈၶၼ်ၶူဝ်းၵုၼ်ႇၶိုၼ်ႈသုင်။
ၵူၼ်းၵႃႉ တၢင်းတႃႈၶီႈလဵၵ်း ၵေႃႉၼိုင်ႈ လၢတ်ႈဝႃႈ – “ၼႂ်းၶၢဝ်းတၢင်း ၼိုင်ႈပီ မႃး ၼႆႉ ၵၢၼ်ပၢႆးမၢၵ်ႈမီး ၸွမ်းလႅၼ်လိၼ် ၼႆႉ ဢမ်ႇပဵၼ်ၵၢၼ်သေဢိတ်းၶႃႈ။ ၶွင်ၵိၼ် ၶွင်ယႅမ်ႉ ၶွင်ၸႂ်ႉ ၸိူဝ်းၼႆႉ ၶိုၼ်ႈၵူႈမဵဝ်း ၼမ်လႄႈဢေႇ။ ၼမ်ႉမၼ်း ၵိၼ်ၼႆႉ မိူဝ်ႈၵူႈပွၵ်ႈ ၼိုင်ႈၶူတ်ႇယႂ်ႇ 85 ဝၢတ်ႇ။ ယၢမ်းလဵဝ် ပဵၼ်ၵႂႃႇ 110 ဝၢတ်ႇ။ ၼမ်ႉ မၼ်း ရူတ်ႉသမ်ႉမိူဝ်ႈၵူႈပွၵ်ႈ 1 လိတ်ႉ 17 ဝၢတ်ႇ 18 ဝၢတ်ႇ။ ယၢမ်းလဵဝ် 20.50 ဝၢတ်ႇယဝ်ႉ”- ဝႃႈၼႆ။
တီႈၶူဝ်မိုတ်ႈၵိုဝ်းမၢႆ 2 ၼၼ်ႉ ၵၢၼ်တေႃႉသူင်ႇ ၶူဝ်းၵုၼ်ႇ ၶဝ်ႈဢွၵ်ႇၵႂႃႇမႃးမီးယူႇၵေႃႈ လႆႈႁဵတ်းၸွမ်းၼင်ႇ တတ်းမၵ်းဝႆႉၵူၺ်းလႄႈ ၵူၼ်းၵႃႉယၢပ်ႇၽိုတ်ႇ ၊ ယွၼ်ႉပိူဝ်ႈဢမ်ႇမိူၼ်ၼင်ႇ တၢမ်တူဝ်လႆႈၶဝ်ႈၵႂႃႇလိူၵ်ႈသိုဝ်ႉမႃးႁင်း ၵူၺ်း ၵူၼ်းပိုၼ်ႉတီႈ တႃႈၶီႈလဵၵ်း လၢတ်ႈၼႄၼင်ႇၼႆ။
“ၵူႈပွၵ်ႈတႄႉ တူဝ်ႁဝ်းၶႃႈ ၶႂ်ႈလႆႈၶူဝ်းၵုၼ်ႇသင်ၼႆၵေႃႈ ဢွၵ်ႇၵႂႃႇသိုဝ်ႉတၢင်း ၾင်ႇမႄႈသၢႆ ၵမ်းၼိုင်ႈၵေႃႈ လႆႈမႃးယဝ်ႉ။ ယၢမ်းလဵဝ် ဢမ်ႇလႆႈသဵင်ႈ ၵႃႈ ၶွၼ်ႇ ၵႃႈတေႃႉသူင်ႇသင်။ မိူဝ်ႈလဵဝ်ၼႆႉ ဢမ်ႇၸႂ်ႈၸိူင်ႉၼႆ လႆႈသႂ်ႇၶွၼ်ႇမူတ်း မူတ်း။ လႆႈပၼ်ၵႃႈတေႃႉသူင်ႇမူတ်းမူတ်းၶႃႈယဝ်ႉ။ ယၢပ်ႇၸႂ်ၶႃႈဢေႃႈ တွၼ်ႈတႃႇ ႁဝ်းၶႃႈ ဢၼ်ယူႇၸွမ်းလႅၼ်လိၼ် ၸိူဝ်း ၼႆႉ ဢမ်ႇႁူႉဝႃႈ ၶူဝ်ၼႆႉ တေပိုတ်ႇမိူဝ်ႈလႂ် ယၢမ်း လဵဝ် ငဝ်းလၢႆး ၵၢၼ်မိူင်းမၢၼ်ႈၵေႃႈ သမ်ႉပဵၼ်ယူႇၸိူင်ႉၼႆ”- ဝႃႈၼႆ။
ထႅင်ႈၾၢႆႇၼိုင်ႈၵေႃႈ ဝၢႆးသေ သိုၵ်းမၢၼ်ႈယိုတ်းဢႃႇၼႃႇ ၸိုင်ႈမိူင်းမႃး မိူဝ်ႈဝၼ်းတီႈ 1/2/2021 ၼၼ်ႉသေ ၸွမ်းလႅၼ် လိၼ်တႆး – ထႆး တၢင်းၶဝ်ႈဢွၵ်ႇပဵၼ်တၢင်းၵၢၼ် ဢမ်ႇပဵၼ်တၢင်းၵၢၼ် ၵူႈႁူးၵူႈတၢင်း တင်းၾၢႆႇထႆးလႄႈၾၢႆႇမၢၼ်ႈထႅမ်ႁႅင်းသိုၵ်း ၶဵင်ႈၶႅင်ဢဝ်ႁူမ်ႇလူမ်ႈ မႃး ႁၢဝ်ႈႁႅင်း ၼႆယဝ်ႉ။
ၼွၵ်ႈလိူဝ်ၼၼ်ႉ တၢင်းၾၢႆႇၸဝ်ႈၼႃႈတီႈမိူင်းထႆး ၾၢႆႇၵူတ်ႇထတ်း ၵူၼ်းၶဝ်ႈ ဢွၵ်ႇ မိူင်းၵေႃႈ လၢတ်ႈဢွၵ်ႇဝႆႉတီႈသိုဝ်ႉၶၢဝ်ႇ ထႆးဝႃႈ ၼႂ်းဝၼ်းလိုဝ်ႈၶၢဝ်းသွၼ်းၼမ်ႉ ပီ 2021 ၼႆႉ ႁၢမ်ႈႁႅင်းၵၢၼ်ယၢၼ်မိူင်း 3 ၸိုင်ႈမိူင်း လၢဝ်း၊ ၵမ်ႇပူးၶျႃး လႄႈ မိူင်းႁူမ်ႈတုမ် ပွၵ်ႈဢႅဝ်ႇယဵမ်ႈႁိူၼ်းယေးၵၼ် ။ ယွၼ်ႉဝႃႈ ယၢမ်းလဵဝ် ၼႂ်းမိူင်းထႆး တိုၵ်ႉပိၵ်ႉ ဢိုတ်း ဝၢၼ်ႈမိူင်းဝႆႉ ပႆႇပၼ်ၵူၼ်း ၶဝ်ႈဢွၵ်ႇၵႂႃႇမႃး။ သင်ဝႃႈ မီးၵၢၼ်လၵ်ႉၶဝ်ႈဢွၵ်ႇ ၵႂႃႇမႃးၸိုင် တေၺႃးတူတ်ႈတၢမ်ႇ ၸွမ်းၼင်ႇမၢႆမီႈဝၢၼ်ႈမိူင်းမီးဝႆႉ ၼၼ်ႉ ဝႃႈၼႆ။