ၼင်ႇႁိုဝ် ၾိင်ႈထုင်းတေဢမ်ႇႁၢႆၼၼ်ႉ ၸၢဝ်းၶိူဝ်းလႂ်ၵေႃႈ ဢွၼ်ၵၼ်ၶတ်းသၢင်ႈမႃးပၢၼ်သိုပ်ႇပၢၼ်။ တႃႇၸဝ်ႈၵဝ်ႇ တႃႇၼႃႈႁိူၼ်းၸဝ်ႈၵဝ်ႇ ပေႃးတေယူႇလွတ်ႈၵႂႃႇၵူႈဝၼ်းဝၼ်းၼၼ်ႉၵေႃႈ လႆႈၶတ်းႁႅင်း။ တႃႇၸိူဝ်ႉၶိူဝ်းတူဝ်ၵဝ်ႇ ပေႃးတေယူႇၵိုၵ်းလုမ်ႈၾႃႉၵႂႃႇလႆႈၶၢဝ်းႁိုင်ၼၼ်ႉၵေႃႈ ၶတ်းၸႂ်ႁႃလွၵ်းႁႃလၢႆးမၼ်းယူႇတႃႇသေႇ။

မိူၼ်ၼင်ႇ ပီႈၼွင်ႉၸၢဝ်းၶိူဝ်းလႃးႁူႇ ဢၼ်မီးၼႂ်းၸိုင်ႈတႆး ၼႆႉၵေႃႈ ၼင်ႇႁိုဝ် ၾိင်ႈထုင်းၸဝ်ႈၵဝ်ႇ တေဢမ်ႇႁၢႆသေ ၽႄႈလၢမ်းယိုၼ်းယၢဝ်းၵႂႃႇၵႂၢင်ႈၶႂၢင်ၼႆႉ ဢွၼ်ၵၼ်ၶတ်းၸႂ် ၸတ်းပၢင်ႁူမ်ၸူမ်းပီမႂ်ႇ မႃးၵူႈပီပီ။ ပီၼႆႉသမ်ႉ ယွၼ်ႉငဝ်းလၢႆးလၢႆလွင်ႈသေ ဢမ်ႇၸၢင်ႈၸတ်းၶိုၵ်ႉယႂ်ႇ ဝႃႈၼႆ။

ၶၢဝ်းပီၶရိတ်ႉ ၶၢႆႉလၢႆႈၸူးပီမႂ်ႇၵူႈပီပီၼႆႉ ၸၢဝ်းလႃးႁူႇၸိူဝ်းမီးၼႂ်းၸိုင်ႈတႆး ဢွၼ်ၵၼ်ၸတ်းပၢင် ႁူမ်ၸူမ်းပီမႂ်ႇလႃးႁူႇမႃးတႃႇသေႇ။ ယိူင်းဢၢၼ်းသုင်သုတ်းၵေႃႈ တႃႇၸၢဝ်းလႃးႁူႇ တီႈၸမ်တီႈၵႆ လႆႈႁူပ်းထူပ်းၵၼ် လႆႈသူႇၸႂ်းၵၼ် ၵႃႇရဝၼပ်ႉယမ် ပၼ်ႁႅင်းၵၼ်။ ၼင်ႇႁိုဝ် ၾိင်ႈတေဢမ်ႇႁၢႆၼၼ်ႉၵေႃႈ ဢွၼ်ၵၼ်ၶတ်းၸႂ်ႁၵ်ႉသႃမႃးတေႃႇထိုင်ဝၼ်းမိူဝ်ႈၼႆႉ။

ၼင်ႇႁိုဝ် ပီမႂ်ႇလႃးႁူႇ ပေႃးတေမႅၼ်ႈၸွမ်း ငဝ်းလၢႆးၾိင်ႈၾႃႉရႃႇသီႇလႄႈ ငဝ်းလၢႆးၵၢပ်ႈဝၢၼ်ႈပၢၼ် မိူင်းၸိူဝ်းၼႆႉၵေႃႈ ၽူႈႁၵ်ႉသႃၾိင်ႈထုင်းၶဝ် လႆႈသွၼ်ႇလႆႈၼပ်ႉသေ ၾိင်ႈပၢၼ်ၵဝ်ႇလႄႈပၢၼ်မႂ်ႇ မီးလွင်ႈလႅၵ်ႈလၢႆႈ ပႅၵ်ႇပိူင်ႈၵၼ်မႃး ယူႇဢိတ်းဢီႈၼႆ ၸၢဝ်းလႃးႁူႇ ၵေႃႉၼိုင်ႈလၢတ်ႈ။

ၽွင်းပီ 2024 လၢႆႈၸူး 2025 ပီၼႆႉ ၸၢဝ်းလႃးႁူႇ ၼႂ်းၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇ ဢွၼ် ၵၼ်ၸတ်းပၢင်ႁူမ်ၸူမ်းပီမႂ်ႇမိူၼ်ၵၼ်။ ၵူၺ်းၵႃႈ ဢမ်ႇၸတ်းၶိုၵ်ႉယႂ်ႇ မိူၼ်မိူဝ်ႈဢွၼ်တၢင်း ယွၼ်ႉၵၢၼ်ႁႃၵိၼ်လဵင်ႉတွင်ႉ ၵူၼ်းပိုၼ်ႉတီႈ ယၢပ်ႇၵိၼ်းႁႅင်းဝႆႉ ၼႆယဝ်ႉ။

ပၢင်ႁူမ်ၸူမ်းပီမႂ်ႇလႃးႁူႇတီႈမိူင်းသၢတ်ႇၼႆႉ ၸတ်းႁဵတ်းတီႈဝၢၼ်ႈၸတႄႈသေ မီးၸၢဝ်းလႃးႁူႇ ၸိူဝ်းယူႇၸွမ်းၶႅပ်ႇဝဵင်းလႄႈ ဝၢၼ်ႈတီႈၸမ်တီႈၵႆ ၸိူဝ်းၼႆႉ မႃးၶဝ်ႈႁူမ်ႈ။ ၵူႈပီတႄႉ ဝၢၼ်ႈလႃးႁူႇ တီႈၸမ် တီႈၵႆ မႃးၶဝ်ႁူမ်ႈၸမ် 80 ဝၢၼ်ႈ ၼႆႉ။ ပီမႂ်ႇ ပီ2025 ၼႆႉတႄႉ မႃးၶဝ်ႈႁူမ်ႈမွၵ်ႈ 60 ဝၢၼ်ႈလူင်းတႂ်ႈ ၼိုင်ႈ ဝၢၼ်ႈလႂ်မႃးမွၵ်ႈ 20 ၵေႃႉ ၼႆႉၵူၺ်းၼႆ – ၼၢင်းယိင်း ၸၢဝ်းလႃးႁူႇ မိူင်းသၢတ်ႇၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“လွင်ႈယၢပ်ႇၽိုတ်ႇၼမ်ဢေႃႈ ပီၼႆႉ။ ယွၼ်ႉဝႃႈ မၢၵ်ႇၶဝ်ႈတဝ်ႈၼမ်ႉ ဢမ်ႇလႆႈၶၼ်လီမိူၼ်ၵူႈပီ။ ယွၼ်ႉၼူလိူင်ႇၵေႃႈ ပိူင်ၼိုင်ႈ။ ယွၼ်ႉၽေးသၽႃႇဝၵေႃႈ ပိူင်ၼိုင်ႈလႄႈ ဢၼ်ၽုၵ်ႇဝႆႉၸိူဝ်းၼႆႉၵေႃႈ ဢမ်ႇလႆႈၼမ်။ ပိူင်လူင်ၵေႃႈ ပဵၼ်ၶဝ်ႈၵၢပ်ႇလႄႈ ၶဝ်ႈႁႆႈ။ တူၼ်ႈမၢၵ်ႇ တူၼ်ႈၽၵ်းၵူႈသႅၼ်းသႅၼ်းၵေႃႈ ဢမ်ႇလႆႈသင်။ သဵၼ်ႈတႃႈသၢႆတၢင်းၵေႃႈ ယွၼ်ႉလိၼ်ႇၵူၼ်ႇလွႆပင်းသေ ၵႂႃႇမႃးႁႃၵၼ်ၵေႃႈယၢပ်ႇ ။ ၶၢဝ်းၼမ်ႉၼွင်းၼၼ်ႉၵေႃႈ ဝၢၼ်ႈလႃးႁူႇ ၵမ်ႈၼမ် လႆႈလူႉသုမ်းၼမ်ၼႃႇ။ ယွၼ်ႉငဝ်းလၢႆးလၢႆလွင်ႈ လႄႈ ပွႆးၵေႃႈ ဢမ်ႇပေႃးၵိုၼ်းပဵင်းၵူႈပီ”- ဝႃႈၼႆ။

ပၢင်ႁူမ်ၸူမ်းပီမႂ်ႇလႃးႁူႇၼႆႉ ဢမ်ႇၸႂ်ႈဝႃႈ ၸတ်းတီႈလဵဝ်သေ ယဝ်ႉၵႂႃႇၵူၺ်း ဝၢၼ်ႈၽႂ်ဝၢၼ်ႈမၼ်း မိူၼ်ၼင်ႇ ၸိူဝ်းယူႇၼိူဝ်လွႆလႄႈသင် ၸိူဝ်းယူႇၵႆဝၢၼ်ႈၵႆဝဵင်း ၸိူဝ်းၼႆႉလႄႈသင် ဢွၼ်ၵၼ် ၸတ်းပၢင်ႁူမ်ၸူမ်းပီမႂ်ႇၽႂ်မၼ်းယူႇ။ ႁိူၼ်းတႂ်ႈႁိူၼ်းၼိူဝ် ႁူမ်ႈၵၼ် ႁုင်မိုဝ်ႉၶဝ်ႈမႂ်ႇၼမ်ႉမႂ်ႇသေ လဵင်ႉလူၵၼ် ၵိၼ်ၶဝ်ႈၵုမ်းၵၼ် မူၼ်ႈမူၼ်ႈသိူဝ်းသိူဝ်း။

ၼႂ်းမိူင်းသၢတ်ႇၼႆႉ ဝၢၼ်ႈဢၼ်မီးၸၢဝ်းလႃးႁူႇယူႇသဝ်းဝႆႉၼမ် ပဵၼ်ဝၢၼ်ႈၼႃးၵေႃး (ၼႃးၶေႃ) ၊ ဝၢၼ်ႈဝဵင်းဝၢႆ ၊ ဝၢၼ်ႈ ၸတႄႈ ၊ ဝၢၼ်ႈၼွင်ၽႃ ၊ ဝၢၼ်ႈၸတီႇ ၊ ဝၢၼ်ႈမႄႈၼိမ် ၊ ဝၢၼ်ႈၼႃးမၢၵ်ႇ ၊ ဝၢၼ်ႈ လွႆသဝ်ႇ ၊ ဝၢၼ်ႈပုင်ႇၵလၢင်း ၊ ဝၢၼ်ႈတၢင်ႉသႅင် ၊ ဝၢၼ်ႈပူဝ်ႇၼႃးၵူဝ်ႇ ၊ ဝၢၼ်ႈမႄႈၸူၵ်ႉ ၊ ဝၢၼ်ႈသၢမ်လၵ်းလႄႈ ဝၢၼ်ႈႁူၵ်းလၵ်း ၸဵမ်ၸိူဝ်းၼႆႉ။

မိူဝ်ႈငဝ်းလၢႆးဝၢၼ်ႈမိူင်းၼိမ်တႄႉ ယူႇတီႈၵူၼ်းလူင်လႃးႁူႇဝၢၼ်ႈလႂ်ဝၢၼ်ႈၼၼ်ႉ တေမွၵ်ႇႁွင်ႉဢဝ် ၽူႈၸမ်ၸႂ်ၶဝ်လႄႈ ၽူႈႁူမ်ႈၽၢၵ်ႈၼႃႈၵၢၼ်ၶဝ် ၸိူဝ်းၼႆႉ မိူဝ်းၵိၼ်မိူဝ်းၵျေႃႇၸွမ်း ထိုင်တီႈႁိူၼ်းတီႈယေး ပီၼႆႉတႄႉ ၵမ်ႈၼမ် ဢမ်ႇႁၼ်ၽိတ်ႈမွၵ်ႇႁွင်ႉၽႂ်တႄႉတႄႉၼႆ ၼၢင်းယိင်း ၵူၼ်းမိူင်းသၢတ်ႇ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ပီၼႆႉ ၶဝ်ၵေႃႈဢမ်ႇပေႃးႁဵတ်းယႂ်ႇယႂ်ႇလူင်လူင်သင်။ ဢၼ်ၸတ်းယႂ်ႇၼႆႉတႄႉ တေပဵၼ်တၢင်း တႃႈၶီႈလဵၵ်း ၵဵင်းတုင်ပုၼ်ႉၼႆဢေႃႈ။ မိူင်းသၢတ်ႇတႄႉ လဵင်ႉၵႂႃႇပဵၼ်ဝၢၼ်ႈပဵၼ်ဝၢၼ်ႈသေ ႁဵတ်းၸွမ်းၼင်ႇ ၾိင်ႈၶဝ်မီးၵႃႈၼၼ်ႉၵူၺ်း။ ၸၢဝ်းလႃးႁူႇၸိူဝ်းႁူႉၸၵ်း ၸိူဝ်းၼၼ်ႉၵေႃႈ ပီၼႆႉ ၶဝ်ဢမ်ႇဝႃႈႁိုဝ်မႃး ဢမ်ႇၽိတ်ႈမွၵ်ႇသင်မႃး တေပဵၼ်ယွၼ်ႉငိုၼ်းဢမ်ႇပေႃးလိူင်ႇၶႃႈယူဝ်ႉပီၼႆႉ”- ဝႃႈၼႆ။  

မိူဝ်ႈဝၼ်းတီႈ 6/1/2025 ၼၼ်ႉတႄႉ လႆႈႁၼ်ၽူႈယႂ်ႇၵူၼ်းလူင်လႃးႁူႇၼႂ်းဝၢၼ်ႈပူဝ်ႇၼႃးၵူဝ်ႇ မႄႈၸူၵ်ႉ တၢင်ႉသႅင် ၸိူဝ်းၼႆႉ ၽိတ်ႈမွၵ်ႈႁွင်ႉဢဝ် ၽူႈမီးၸၼ်ႉၼႂ်းတပ်ႉသိုၵ်းမၢၼ်ႈ မႃးၶဝ်ႈႁူမ်ႈၵိၼ် ၶဝ်ႈမႂ်ႇၼမ်ႉမႂ်ႇ ၼႂ်းပၢင်ႁူမ်ၸူမ်းပီမႂ်ႇထိုင် ၼႂ်းဝၢၼ်ႈယူႇ။ ၼႆႉတႄႉ ဢမ်ႇႁဵတ်းဢမ်ႇလႆႈ ယွၼ်ႉပဵၼ် တႃႇယူႇလွတ်ႈ ၽွင်းသိုၵ်းမၢၼ်ႈ တိုၵ်ႉပဵၼ်ယႂ်ႇဝႆႉၼႆ ၵူၼ်းမိူင်းသၢတ်ႇၵေႃႉၼိုင်ႈလၢတ်ႈ။

ဝၼ်းတီႈ 7/1/2025 ၼၼ်ႉၵေႃႈ ၾၢႆႇၵေႃလိၵ်ႈလၢႆးလႄႈ ၾိင်ႈငႄႈ ၸၢဝ်းလႃးႁူႇ ၼႂ်းဝဵင်းတႃႈၶီႈလဵၵ်း ၸိုင်ႈတႆးပွတ်း ဢွၵ်ႇ ၸတ်းပၢင်ႁူမ်ႈၸူမ်းပီမႂ်ႇ ပဵၼ်ပွၵ်ႈၵမ်း 5 ၼႂ်းၼၼ်ႉ မီးၵႅမ်ၸွမ်ႁၢၼ်ၸူဝ်းလၢႆႇ တိူင်းသၢမ်ၸဵင်ႇ (တြိဂံဒေသ တိုင်းစစ်ဌာနချုပ် တိုင်းမှူး ဗိုလ်မှူးချုပ် စိုးလှိုင်) လႄႈ ႁွင်ႈၵၢၼ် တႂ်ႈသိုၵ်းမၢၼ်ႈ လၢႆႁွင်ႈၵၢၼ် ၶဝ်ႈႁူမ်ႈၸွမ်းၼႆ ႁွင်ႈၵၢၼ် ၾၢႆႇပိုၼ်ၽၢဝ်ႇမၢၼ်ႈ ႁၢႆးငၢႆးငၢၼ်းဝႆႉ။

ပေႃးထိုင်မႃး ဝၼ်းတီႈ 18 တေႃႇထိုင် 20/1/2025 ၼႆႉ ၸၢဝ်းလႃးႁူႇ ၵူႈမိူင်းမိူင်း တေၸတ်းပၢင်ႁူပ်းထူပ်းၵၼ် တီႈဝဵင်းၵဵင်းႁၢႆး ၸိုင်ႈထႆး တႃႇပဵၼ်မၢႆတွင်းပီမႂ်ႇ။ တူဝ်တႅၼ်း ၸုမ်းႁၵ်ႉသႃၾိင်ႈငႄႈ လိၵ်ႈ လၢႆးၸၢဝ်းလႃးႁူႇ ၸိူဝ်းဢၼ်မီးၼႂ်းမိူင်းၶႄႇ၊ မိူင်းထႆး ၸိူဝ်းမီးၼႂ်းမိူင်းႁူမ်ႈတုမ်လႄႈ လၢႆတီႈလၢႆတၢင်းၵေႃႈ တေမႃးၶဝ်ႈႁူမ်ႈဢုပ်ႇဢူဝ်းၵၼ် ဝႃႈၼႆ။

ၸၢဝ်းလႃးႁူႇၼႆႉၵေႃႈ မီးၾိင်ႈၼပ်ႉမႄႈပီ 12 မိူၼ်ၵၼ်  ပီ 2024 ပူၼ်ႉမႃးၼႆႉ ပဵၼ်ပီပၢင်တၢႆးသေ ထိုင်မႃးၼႂ်းပီ 2025 ၼႆႉတႄႉ လႅၵ်ႈလၢႆႈပဵၼ် ပီၸွၼ်ႈ ၼႆယဝ်ႉ။

ၾိင်ႈပီမႂ်ႇလႃးႁူႇၼႆႉ ပီႈၼွင်ႉၸၢဝ်းလႃးႁူႇ တေဢဝ်မၢၵ်ႇၶဝ်ႈတဝ်ႈၼမ်ႉ ၽၵ်းၶဵဝ် ဢၼ်လႆႈမႃးၼႂ်းႁႆႈ ၼႂ်းသူၼ် ၸိူဝ်းၼႆႉသေ မႃးလဵင်ႉလူၸႃႇၵပီႈၼွင်ႉၶႅၵ်ႇ။ ပိူင်လူင် တေလဵင်ႉလူ ၶဝ်ႈပုၵ်းငႃးလေႃ၊ ၼိူဝ်ႉမူ ၸိူဝ်းၼႆႉ။ ဢၼ်လၢၵ်ႇလၢႆးၵေႃႈ မိူဝ်ႈတွၼ်ႈၶဝ်ႈပုၵ်းလႄႈ ၼိူဝ်ႉမူ ပၼ်ပီႈၼွင်ႉၶႅၵ်ႇၼၼ်ႉ ၶဝ်တေသႂ်ႇပႃးယွတ်ႈမႆႉပႅၵ်ႇသေ ႁဵတ်းႁႂ်ႈပဵၼ်ၶွင်ၾၢၵ်ႇတွၼ်ႈႁၢင်ႈလီလိူဝ်ၵဝ်ႇ။

တႃႇတေမူၼ်ႈၸႂ်ပၼ် ပီႈၼွင်ႉမႃးၶဝ်ႈႁူမ်ႈပီမႂ်ႇၼၼ်ႉ တိုင်ႈပီႇၼမ်ႉတဝ်ႈလႄႈ ႁႆႇၵွင်ႁႆႇသႅင်ႇမိူဝ်ႈ မိူဝ်ႈၵၼ်သေ ယုၵ်ႉတိၼ်ၵႃႈပၼ်ႇမူၼ်း ၸွမ်းၵၼ် ႁႂ်ႈၽဵင်ႇၽဵင်ႇ လီလွမ်လီတူၺ်း။ ပဵၼ်ဢၼ်ၸၼ်ၸႂ်ပီႈ ၼွင်ႉၶႅၵ်ႇတႄႉတႄႉ။

ဢွင်ႈတီႈ ဢၼ်ၶဝ်ၵႃႈလဵပ်ႈၼၼ်ႉ ၶဝ်တေဢဝ်မႆႉသၢင်းမႆႉပႅၵ်ႇ မႃးပၵ်းလၵ်းၼႂ်းၶိုင်ႈၵၢင်။ ယဝ်ႉၵေႃႈ ဢဝ်ႁူဝ်မူ (မူပေႃႈ) ႁွႆႈၵိုၵ်းဝႆႉ။ လွင်ႈၼႆႉၼႄဝႃႈ ၸၢဝ်းလႃးႁူႇၼႆႉ မီးၾိင်ႈၵိူဝ်းယမ် ၽီမႃးပီယၢဝ်းၶၢဝ်းႁိုင်။ ၵူၺ်းၵႃႈ ၵၢပ်ႈဝၢၼ်ႈပၢၼ်မိူင်းလႅၵ်ႈလၢႆႈလႄႈ ၸိူဝ်းလႅၵ်ႈလၢႆႈၽႃႇသႃႇၵိူဝ်းယမ်ၵႂႃႇၵေႃႈ မီးတင်းၼမ်တင်းလၢႆ။

လိူဝ်သေမီးလွင်ႈမူၼ်ႈလွင်ႈၵျေႃႇယဝ်ႉ ၽွင်းပီမႂ်ႇၼႆႉ ၸၢဝ်းလႃးႁူႇ မီးၾိင်ႈၼပ်ႉယမ် ၵၼ်ႇတေႃး သုၵ်ႈမိုဝ်းသုၵ်ႈတိၼ်ပၼ် ၵူၼ်းထဝ်ႈၵူၼ်းၵႄႇလႄႈ ၵူၼ်းၸိူဝ်းယၢမ်ႈမီးၵုင်ႇမုၼ် ၸိူဝ်းၼၼ်ႉ။ ယိူင်းဢၢၼ်းႁႂ်ႈပဵၼ်တူဝ်မႂ်ႇၸႂ်မႂ်ႇ ၼႂ်းဝၼ်းပီမႂ်ႇ။ 

သင်ထိုင် မႃးလိူၼ်ၵဝ်ႈ လိူၼ်သိပ်းၸိုင် လႆႈႁၼ်ၸၢဝ်းၶိူဝ်းပီႈၼွင်ႉလႃးႁူႇၶဝ် ၸတ်းႁဵတ်းပၢင်ၵိၼ် ၶဝ်ႈမႂ်ႇၼမ်ႉမႂ်ႇထႅင်ႈ။ ၼႆႉၵေႃႈ ဢိင်ၼိူဝ် လွင်ႈၵိူဝ်းယမ်လႄႈ ၼမ်ႉလိၼ်ႁိၼ်ၽႃ ပိူင်ႈၵၼ်သေ လၢႆးၸတ်းမၼ်းတေပိူင်ႈၵၼ်။ ပေႃးပဵၼ်ၽႃႇသႃႇၶရိတ်ႉယၼ်ႇၸိုင် တေၽိတ်ႈမွၵ်ႇမုၼ်ၸဝ်ႈ (ဓမ္မဆရာ) လႂ် ၊ ပေႃးပဵၼ်ၾၢႆႇၵိူဝ်းယမ်ၽီၵေႃႈ တေၽိတ်ႈမွၵ်ႇႁွင်ႉမႃး ၾၢႆႇမေႃၽီၶဝ်လႂ် ၸိူဝ်းၼႆႉ။

လႃးႁူႇၼႆႉ ပိူင်လူင် ၽႄဢွၵ်ႇပဵၼ် 2 ၶိူဝ်း။  သင်ဝႃႈ တူၺ်းၵႂၢမ်းလၢတ်ႈလႄႈ ၾိင်ႈၵိူဝ်းယမ် ပႅၵ်ႇပိူင်ႈၵၼ်သေ ၸႅၵ်ႇထႅင်ႈၸိုင် တေၽႄဢွၵ်ႇထႅင်ႈမွၵ်ႈ 20 ၶိူဝ်း။ မိူၼ်ၼင်ႇ တီႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၼႆႉ မီးလႃးႁူႇၽႄဢွၵ်ႇပဵၼ် 12 ၸၢဝ်းၶိူဝ်း ။ ၵူၼ်းၸၢႆးတေသႂ်ႇၵူၼ်လမ် ၊ သိူဝ်လမ်လႄႈ မၢၵ်ႇႁူဝ်ဢၼ်ဢဝ်ၽႅၼ် ယဵပ်ႉႁဵတ်းဝႆႉ။

ၼၢင်းယိင်းၵေႃႈ ၼုင်ႈသိၼ်ႈဝဵတ်ႉလႄႈ ၼုင်ႈသိူဝ်ႈ တိုဝ်းမၢၵ်ႇႁူဝ်သီလမ်မိူၼ်ၵၼ်။ ၶိူင်ႈႁွႆႈၶိူင်ႈတိုဝ်းၵေႃႈ ၸွမ်းၼင်ႇပွင်ပဵၼ်လႆႈၼၼ်ႉ တေႁၢင်ႈၶိူင်ႈသႂ်ႇဝႅၼ် ၊ သၢႆၶေႃး ၊ ပေႇႁူ ဢၼ်ဢဝ်ငိုၼ်းသေႁဵတ်းဝႆႉ။

ၸၢဝ်းလႃးႁူႇၼႆႉ ၵိူဝ်းယမ်ၽီ ပုတ်ႉထလႄႈ ၶရိတ်ႉ ၸဵမ်ၸိူဝ်းၼႆႉသေ ၽႄႈၸွတ်ႈတူဝ်ႈဝႆႉ ၸွမ်းသၢပ်ႇၼမ်ႉၶူင်း ၼမ်ႉၶွင် ယူႇသၢင်ႈၵိၼ်သဝ်းၼႂ်းမိူင်းထႆး၊ မိူင်းလၢဝ်း၊ မိူင်းၵမ်ႇပူးသျႃးလႄႈ ဝႅတ်ႉၼၢမ်း ၸိူဝ်းၼႆႉ ၼပ်ႉႁူဝ်မိုၼ်ႇႁူဝ်သႅၼ် ၼႆ ဝီႊၵီႊၽီႊတီႊယိူဝ်ႊ တွင်းမၢႆဝႆႉၼင်ႇၼႆ။