မိူဝ်ႈၼႆႉ ဝၼ်းတီႈ 11/01/2025 တႄႇဢဝ် 6 မူင်းၵၢင်ၼႂ် ႁူင်းပၼ်သဵင် ပိုတ်ႇပၼ်ၵူၼ်းမိူင်းၵႂႃႇတွတ်ႈသေတႃႉ ပွတ်းဢွၵ်ႇၶူင်းတႄႉ ဢမ်ႇပေႃးမီးၽႂ်တူင်ႉတိုၼ်ႇၵႃႈႁိုဝ် ၼႆ ၵူၼ်းပိုၼ်ႉတီႈ ဢွၼ်ၵၼ်လၢတ်ႈၼင်ႇၼႆ။

မိူၼ်ၼင်ႇ တီႈဝဵင်းမိူင်းတူၼ်ၼႆႉ ၵူၼ်းသူၼ်ၸႂ်မၼ်းၵေႃႈ ဢေႇ ၊ ၵူၼ်းၵႂႃႇတွတ်ႈမၼ်းၵေႃႈဢေႇ ။ ဢေႇလိူဝ်ပၢင်လိူၵ်ႈတင်ႈ ဢၼ်ယၢမ်ႈၸတ်းမႃး ။ ၵမ်ႈၼမ် ဢမ်ႇဝႄႈယၢင်ႇလႆႈလႄႈ ၵႂႃႇတွတ်ႈၵူၺ်း ဝႃႈၼႆ။

လွင်ႈၼႆႉ ၵူၼ်းမိူင်းတူၼ်ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈၸဝ်ႉတႄႉ ၵူၼ်းၼမ်ယူႇၼႆဢေႃႈ ။ မိူဝ်ႈႁဝ်းၵႂႃႇတႄႉ ဢမ်ႇမီးၽႂ် ။ ၵူၼ်းပႂ်ႉမၼ်းၵေႃႈ တေႃႉတႄႉ မီးလၢႆၵေႃႉၵူၺ်း။ ၵူၼ်းၵႂႃႇတွတ်ႈမၼ်းၵေႃႈ တွတ်ႈႁႂ်ႈပူၼ်ႉဝူတ်ႈပူၼ်ႉဝၢတ်ႈၵူၺ်း။ ႁဝ်းတႄႉတွတ်ႈပၼ်သိူဝ်ၽိူၵ်ႇယူႇ ။ မၢင်ၵေႃႉတႄႉဝႃႈ တွတ်ႈဢၼ်လႂ်ၵေႃႈ ႁူႉသၢင်ႇသီႈတေပေႉၵူၺ်းလႄႈ တွတ်ႈပၼ်သၢင်ႇသီႈႁေ ၵမ်းလဵဝ်သေယဝ်ႉ ၼႆႉၵေႃႈမီး ” – ဝႃႈၼႆ။

ပွတ်းဢွၵ်ႇၼႆႉ ဝဵင်းဢၼ်ၸတ်းပၢင်လိူၵ်ႈတင်ႈၼၼ်ႉ သိုၵ်းမၢၼ်ႈႁၢမ်ႈပိုတ်ႇႁၢၼ်ႉၶၢႆၶူဝ်း ၊ ၵၢတ်ႇၵေႃႈၸႂ်ႉဢိုတ်းလႄႈ ၵူၼ်းၸိူဝ်းၵႂႃႇမႃး ၸွမ်းတၢင်းၵေႃႈ ဢမ်ႇၼမ်မိူၼ်ၵူႈဝၼ်းဝႃႈၼႆ။
ပွတ်းတၢင်းမိူင်းယွင်းၼႆႉၵေႃႈ ထိုင်ဝၼ်းတွတ်ႈသဵင်ယဝ်ႉသေတႃႉ ၵူၼ်းပႂ်ႉႁူင်းတွတ်ႈသဵင်မၼ်းပႆႇတူဝ်ႈတၼ်း ၵူၼ်း မိူင်းၸိူဝ်းလူဝ်ႇတွတ်ႈၸဝ်ႉသေ ဢွၵ်ႇတၢင်း လႆႈသဵင်ႈၶၢဝ်းယၢမ်းပႂ်ႉႁႂ်ႈၶဝ်တူဝ်ႈတၼ်းထႅင်ႈလူးၵွၼ်ႇ ၼႆယဝ်ႉ။
ၼၢင်းယိင်း ၵူၼ်းမိူင်းယွင်းၵေႃႉၼိုင်ႈလၢတ်ႈတီႈၽူႈတွၵ်ႇႁွၵ်ႈ ဝႃႈ – “ လူဝ်ႇဢွၵ်ႇတၢင်းလႄႈ ႁဝ်းဢၢၼ်းၵႂႃႇ တွတ်ႈ ၸဝ်ႉ။ ၽိူဝ်ႇၵႂႃႇထိုင်တီႈ ႁူင်းတွတ်ႈသဵင်သမ်ႉ ၶဝ်ပႆႇၽွမ်ႉသေဢိတ်း ။ ၵမ်ႉဝႃႈ ၾၢႆႇႁူမ်ႇလူမ်ႈ ပႆႇၸေးဝႃႇ ။ ၵမ်ႉဝႃႈ ၵူၼ်းပႂ်ႉႁူင်းမၼ်းပႆႇၽွမ်ႉၼႆသေ လႆႈပႂ်ႉၶဝ်ၵေႃႉၼိုင်ႈယဝ်ႉၵေႃႉၼိုင်ႈ။ ၶိူင်ႈၸၢၵ်ႈတွတ်ႈမႄးၶဝ်ၼၼ်ႉ လႆႈတဵၵ်းတဵၵ်းၵႂႃႇႁဵတ်းၼၼ်သေ ၵမ်းလိုၼ်းၵေႃႈ တီႈၶိူင်ႈၼၼ်ႉ တေဢွၵ်ႇမႃးၸိုဝ်ႈပႃႇတီႇဢၼ်ႁဝ်းတဵၵ်းၼၼ်ႉ။ ပုင်းဢၼ်တုင်းဝႂ်မႄးၼၼ်ႉၵေႃႈ ပဵၼ်ပုင်းၵေႃႇၵူၺ်းၼေႃႈ ယဝ်ႉၵေႃႈ ဢၼ်ႁူမ်ႇမၼ်းၵေႃႈ ဢမ်ႇႁၼ်ဢဝ်သင်မႃးတိတ်းဝႆႉသေဢိတ်း။ ၽႂ်ၶႂ်ႈၸူၵ်းဢွၵ်ႇၵေႃႈလႆႈလူးၵွၼ်ႇဢေႃႈၼၼ်ႉ ” – ဝႃႈၼႆ။

ၸဵမ်ဢဝ် မိူင်းပဵင်း မိူင်းၶၢၵ်ႇ မိူင်းယၢင်း မိူင်းၽျၢၵ်ႈ ၸိူဝ်းၼႆႉ ဢွၼ်တၢင်းၵေႃႈ ပႃႇတီႇသၢင်ႇသီႈ လႆႈတီႈယူႇမႃးၵူႈပၢၼ်ပၢၼ်လႄႈ ပွၵ်ႈၼႆႉၵေႃႈ ၵူၼ်းမိူင်းဢမ်ႇမုင်ႈမွင်းသင်တီႈပၢင်လိူၵ်ႈတင်ႈ မၼ်းဢမ်ႇပိူင်ႈသင်မႃး ။ သမ်ႉပၢႆပဵၼ် သိုၵ်းမၢၼ်ႈဢွၼ်ၼမ်းၸတ်းလႄႈ ယိင်ႈၶႅၼ်း ဢမ်ႇထၢင်ႇဝႃႈ တၢင်ႇပႃႇတီႇတေလႆႈတီႈယူႇ ၼႆ ၵူၼ်းပိုၼ်ႉတီႈလၢတ်ႈၼင်ႇၼႆၵမ်ႈၼမ်။

ၼုမ်ႇယိင်းၵူၼ်းမိူင်းပဵင်းလၢတ်ႈတီႈၽူႈတွႆႇႁွၵ်ႈဝႃႈ – “ တီႈႁိူၼ်းႁဝ်း မီး 7-8 ၵေႃႉၼႆႉ ဢမ်ႇပႃးၸိုဝ်ႈၶႃႈ တႃႇၵႂႃႇတွတ်ႈ။ ၶႃႈၵေႃႈ တင်းဢမ်ႇသူၼ်ၸႂ်သေၵေႃႈ လီယဝ်ႉ။ ႁၼ်ပိူၼ်ႈၵႂႃႇတွတ်ႈၵၼ်ယူႇ ။ မၼ်းဢမ်ႇလိူဝ်လႆႈလူးၼေႃႈ” – ဝႃႈၼႆ။
ၸွမ်းႁူင်းတွတ်ႈသဵင်ၼၼ်ႉ တေမီး ၽူႈမၢႆ ၊ ၽူႈၵွၼ်းပွၵ်ႉ ၊ ပလိၵ်ႈ လႄႈ ၶူးသွၼ်မေႃသွၼ် ၸိူဝ်းႁပ်ႉပုၼ်ႈၽွၼ်း ပႂ်ႉႁူင်းတွတ်ႈသဵင်ၸိူဝ်းၼႆႉ။ မၢင်တီႈၵေႃႈ သိုၵ်းမၢၼ်ႈ မႃးပႂ်ႉဝႆႉ ဝႃႈၼႆ။

တီႈဝဵင်းမိူင်းတူၼ်ၼႆႉ မီး 3 ပွၵ်ႉ 16 ဢိူင်ႇ။ ႁူဝ်ၼပ်ႉၵူၼ်းမီး 55000 ပၢႆ။ မီးႁူင်းတွတ်ႈၶႅပ်းၵၢင်ၸႂ် 58 ႁူင်း။ တႄႇဢဝ် ပုင်ႇပႃႇၶႅမ် ၼႃးၵွင်းမူး ႁူဝ်ပၢင်ႇ ႁူဝ်ယွတ်ႈ ၸိူဝ်းၼၼ်ႉမႃး ၵူၼ်းမိူင်းဢၼ်ပႃးၼႂ်သဵၼ်ႈတႃႇတွတ်ႈၶႅပ်းၵၢင်ၸႂ် မီးမွၵ်ႈ 5 မိုၼ်ႇပၢႆ ၼႆ ၵူၼ်းပိုၼ်ႉတီႈၵေႃႉၼိုင်ႈလၢတ်ႈ။

ၼႂ်းပၢင်လိူၵ်ႈတင်ႈ ႁွပ်ႈသွင်ၼႆႉ ပွတ်းဢွၵ်ႇၶူင်းပႃး 6 ဝဵင်း ပဵၼ် မိူင်းတူၼ် မိူင်းပဵင်း မိူင်းၶၢၵ်ႇ မိူင်းယၢင်း မိူင်းၽျၢၵ်ႈ မိူင်းယွင်း ၸိူဝ်းၼႆႉ ။ တေမီးပႃႇတီႇသၢင်ႇသီႈ လႄႈ ပႃႇတီႇသိူဝ်ၽိူၵ်ႇ
ပၢင်လိူၵ်ႈတင်ႈၵမ်းၼႆႉ ပွတ်းဢွၵ်ႇၶူင်းၼႆႉ တေမီးပႃႇတီႇသၢင်ႇသီႈ USDP ၊ ပႃႇတီႇသိူဝ်ၽိူၵ်ႇ SNDP ၊ ပႃႇတသၺ၊ ပႃႇတီႇဢၶႃႇလႄႈပႃႇတီႇ PPP ၶဝ်ႈၶေႉၶဵင်ႇ။ တႃႇႁႂ်ႈၵူၼ်းမိူင်းၵႂႃႇပၼ်သဵင်ၵၢင်ၸႂ်ၼႆႉ ၽူႈယႂ်ႇၵူၼ်းလူင်ၼႂ်းတပ်ႉသိုၵ်းမၢၼ်ႈ ၸီႉသင်ႇလူင်း တီႈၶႃႈႁၢပ်ႇ ၵၢၼ်ၶုၼ်ၶဝ် ပဵၼ်ၸၼ်ႉပဵၼ်ၸၼ်ႉလႄႈ ၵူၼ်းမိူင်းၵေႃႈဢမ်ႇလိူဝ်လႆႈ ၵႃႈတေလႆႈၵႂႃႇသႂ်ႇပၼ် ၶႅပ်းၵၢင်ၸႂ် ၼႆယဝ်ႉ။