ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈ ဝၢၼ်ႈတေႃႉသၢင်ႇ တင်း ဝၢၼ်ႈပႃႇၶႃး ႁူဝ်ၵူၼ်း 400 ပၢႆ ပႆႇၸၢင်ႈပွၵ်ႈၶိုၼ်းႁိူၼ်း တိုၵ်ႉလူဝ်ႇတၢင်းၸွႆႈထႅမ် ႁၢဝ်ႈႁႅင်း။
တႄႇဢဝ်ၵၢင်လိူၼ် ၾႅပ်ႊၿိဝ်ႊရီႊမႃး တေႃႇထိုင် မိူဝ်ႈၼႆႉ ဝၼ်းတီႈ 23/3/2021 ၶၢဝ်းတၢင်းလိူၼ်ပၢႆ ၵူၼ်းပၢႆႈၽေးသိုၵ်း ဢၼ်ပၢႆႈသွၼ်ႈဝႆႉတီႈ ဝၢၼ်ႈတေႃႉသၢင်ႇ တင်း ဝၢၼ်ႈပႃႇၶႃး ႁူဝ်ၵူၼ်း 400 ပၢႆၼၼ်ႉ ႁူပ်ႉလွင်ႈယၢပ်ႇၽိုတ်ႇ ၵိၼ်းၸႂ် လူဝ်ႇ တၢင်းၸွႆႈထႅမ် ႁၢဝ်ႈႁႅင်း ၼႆယဝ်ႉ။
ၽူႈတူင်ႉၼိုင် ၸုမ်းၸွႆႈထႅမ် တူင်ႇဝူင်းတႆး တီႈၵျွၵ်ႉမႄး ၵေႃႉၼိုင်ႈ လၢတ်ႈဝႃႈ – “ယၢမ်းလဵဝ် ၵူၼ်းပၢႆႈၽေးသိုၵ်းႁဝ်းၶႃႈ ႁူပ်ႉလွင်ႈယၢပ်ႇၽိုတ်ႇ လိူဝ်ႁႅင်း တီႈဝၢၼ်ႈတေႃႉသၢင်ႇ တင်းဝၢၼ်ႈပႃႇၶႃး ႁူဝ်ၵူၼ်း 400 ပၢႆၶႃႈဢေႃႈ။ ၵူၼ်းပၢႆႈၽေး ႁဝ်း ၶႃႈ လႆႈပၢႆႈၵၼ်မႃးၶၢဝ်းယၢမ်းႁိုင် ဢၼ်ၵိၼ်ဢၼ်ယႅမ်ႉၵေႃႈ ဢမ်ႇမီးယဝ်ႉ ပၢင်တိုၵ်းၵေႃႈ သမ်ႉပဵၼ်ယူႇႁၢဝ်ႈႁႅင်းယူႇလႄႈ ယၢမ်းလဵဝ် ၵူၼ်းပၢႆႈၽေးႁဝ်းၶႃႈ သွင်တီႈၼႆႉ လွင်ႈၵိၼ်ယႅမ်ႉ ၵိၼ်းၸႂ် လိူဝ်ႁႅင်းဝႆႉၶႃႈဢေႃႈ၊ လူဝ်ႇတၢင်းၸွႆႈထႅမ် ၶွင်ၵိၼ် ယႅမ်ႉ လွင်ႈၼုင်ႈဝႆ ၸိူဝ်းၼႆႉတႄႉတႄႉၶႃႈ”- ဝႃႈၼႆ။
ဢိင်ၼိူဝ် လွင်ႈၼႆႉ ယွၼ်ႉၸုမ်းဢူၺ်းလီ ပွတ်းႁွင်ႇ TNLA, SSPP တင်း RCSS ပဵၼ်ပၢင်တိုၵ်းၵၼ်မႃးႁၢဝ်ႈႁႅင်း ဝၢႆးသိုၵ်း မၢၼ်ႈ ယိုဝ်းဢႃႇၼႃႇ ၸိုင်ႈမိူင်းမႃး မိူဝ်ႈၵၢင်လိူၼ်ၾႅပ်ႊၿိဝ်ႊရီႊၼၼ်ႉသေ ၵူၼ်းမိူင်း တၢင်းပွတ်းၾၢႆႇႁွင်ႇ ဝဵင်းၵျွၵ်ႉမႄး လႆႈဢွၼ်ၵၼ် ပၢႆႈယၢၼ်ႁိူၼ်းယေးတီႈယူႇၵၼ် ဢမ်ႇယွမ်းႁဵင် ၼႆယဝ်ႉ။
“ယွၼ်းတၢင်းၸွႆႈထႅမ်ထိုင် တီႈပီႈၼွင်ႉၵူၼ်းမိူင်း ၵူႈတီႈသေ ဢမ်ႇၵႃး ပီႈၼွင်ႉတႆး တၢင်းၼႂ်းမိူင်းထႆး ၵူႈၵေႃႉ ၸွမ်းၼင်ႇ ပွင်ပဵၼ်လႆႈ ယွၼ်းပိုင်ႈဢိင်သေ ၸွႆႈၵမ်ႉထႅမ် ပၼ်ၵူၼ်းပၢႆႈၽေးသိုၵ်း တီႈဝၢၼ်ႈတေႃႉသၢင်ႇ တင်း ဝၢၼ်ႈပႃႇ ၶႃး သေၵမ်းၶႃႈ လူဝ်ႇတၢင်းၸွႆႈထႅမ်ယႂ်ႇၼမ်ၶႃႈ”- ၽူႈတူင်ႉၼိုင် ၸုမ်းၸွႆႈထႅမ် တူင်ႇဝူင်းတႆး တီႈ ၵျွၵ်ႉမႄး သိုပ်ႇလၢတ်ႈ ၼႄၼင်ႇၼႆ။
သင်ဝႃႈ ၽူႈမီးၼမ်ႉၸႂ် တီႈၸမ်ၵႆ ၼႂ်းမိူင်းတႆး ၼႂ်းမိူင်းႁူမ်ႈတုမ် လႄႈ ပီႈၼွင်ႉတႆး ၸိူဝ်းႁွတ်ႈၽႅဝ်ဝႆႉ ၼႂ်းမိူင်းထႆး ၶႂ်ႈၵမ်ႉ ထႅမ် ၸွႆႈထႅမ် တႃႇၵူၼ်းပၢႆႈၽေးသိုၵ်း တီႈ ဝၢၼ်ႈတေႃႉသၢင်ႇ ဝၢၼ်ႈပႃႇၶႃး ၼႆၸိုင် ၵမ်းသိုပ်ႇမၢႆၾူၼ်း လႆႈတီႈ ၸုမ်းၼမ်ႉ ၶူင်း ၶႅၵ်ႇလီပၢင်ၸႃႉတႆး ဝဵင်းၵျွၵ်ႉမႄး ၸၢႆးလွၼ်ႉၶိူဝ်း ၽူႈၶၢၼ်ပၢၵ်ႇ ၸုမ်းၼမ်ႉၶူင်း 09-776-175-611, ၼၢင်းၼီႇ 09-791-111-663 လႄႈ လုင်းၸၢႆးၵူး 09-792-558-608 (မၢႆၾူၼ်း ၼႂ်းမိူင်းမၢၼ်ႈ) ၸိူဝ်းၼႆႉ။
ယၢမ်းလဵဝ်ၵူၼ်းပၢႆႈၽေးသိုၵ်း ဢၼ်တီႈၵျွၵ်ႉမႄးၼႆႉ တေမီးဝႆႉတီႈဝၢၼ်ႈတေႃႉသၢင်ႇ၊ ဝၢၼ်ႈပႃႇၶႃး၊ ဝၢၼ်ႈၵၢင်ႉၵၢင်၊ ဝၢၼ်ႈပၢင်ၸၢမ်လႄႈ ဝတ်ႉၼမ်ႉၸဵတ်းလိၼ်း ၸိူဝ်းၼႆႉ ႁူဝ်ၵူၼ်း ဢမ်ႇယွမ်းႁဵင် ထိုင်ယၢမ်းလဵဝ် ပႆႇၸၢင်ႈပွၵ်ႈႁိူၼ်းယေး တီႈယူႇၵၼ် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ