တွၼ်ႈတႃႇ လၢႆးၵၢၼ်ႁဝ်းၶႃႈ ဝူင်ႈၼႆႉ လိူၵ်ႈဝႆႉ ႁူဝ်ၶေႃႈဢၼ်ဝႃႈ ၵေႃတၢင်တူဝ်သၽႃးမိူင်းႁူမ်ႈတုမ် CRPH တေၶွတ်ႇ ၽွတ်ႈပဵၼ်လႆႈလူင်ပွင်ၸိုင်ႈၸၢဝ်းၶိူဝ်းၽွမ်ႉႁူမ်ႈတႄႉယူႇႁႃႉ ဢၼ်ဝႃႈၼၼ်ႉၶႃႈဢေႃႈ။

CRPH ဢၼ်ႁွင်ႉဝႃႈ ၵေႃတၢင်တူဝ်သၽႃးမိူင်းႁူမ်ႈတုမ်ၼႆႉ တႄႇတီႈၶေႃႈၶၢၼ်ပၢၵ်ႇ ဢၼ်ဝႃႈ (စုရွေးလွှတ်) ၶတ်းၸႂ် ႁဵတ်းႁႂ်ႈပွႆႇပၼ် တေႃႇဢွင်ႇသၢၼ်းသူႉၵျီႇ၊ ၶတ်းၸႂ်ႁဵတ်းႁႂ်ႈ လႆႈထုၵ်ႇမၵ်းမၼ်ႈၽွၼ်းၵၢၼ်ပၢင်လိူၵ်ႈတင်ႈ၊ ၶတ်းၸႂ်ႁဵတ်း ႁႂ်ႈၸတ်းပဵၼ်ပၢင်ၵုမ်သၽႃး 2008 ဢၼ်ဝႃႈၼၼ်ႉသေ လႅၵ်ႈလၢႆႈပိၼ်ႇပႅင်မႃးၵမ်းၶၵ်ႉၶၵ်ႉယူႇ။

ထိုင်မႃး ဝၼ်းမိူဝ်ႈလဵဝ်တႄႉ လႅၵ်ႈလၢႆႈပိၼ်ႇပႅင်ၶိုၼ်ႈထိုင်မႃးဝႃႈ တေၶွတ်ႇၽွတ်ႈတပ်ႉသိုၵ်းမိူင်းႁူမ်ႈတုမ်ၾႅတ်ႊၻရႄႊ ဢမ်ႇၼၼ်ၵေႃႈ ပိုၼ်ၽၢဝ်ႇႁႂ်ႈတပ်ႉသိုၵ်း တပ်ႉမတေႃႇ ၶွင်မၢၼ်ႈၼႆႉ ပဵၼ်ၸုမ်းၵေႃႇၵၢၼ်ႁၢႆႉ/ ၸုမ်းႁုၵ်ႉႁၢႆႉသေယဝ်ႉ။ တပ်ႉသိုၵ်းၸၢဝ်းၶိူဝ်းၸိူဝ်းၼႆႉ သမ်ႉပဵၼ်တပ်ႉသိုၵ်းၶဝ်ႈတၢင်းၵၢၼ် ဢဝ်ၸဵမ်ၸိူဝ်းၼႆႉ ႁဝ်းၶႃႈၵေႃႈ တေလႆႈငိၼ်းထိုင် ၵၼ်ယူႇ။

CRPH ၼႆႉ ပွင်ႇဝႃႈ ၶဝ်ဢုပ်ႇၵုမ်ၸွမ်း ၶွမ်ႊမတီႊၾၢႆႇဢွၼ်ႁူဝ်ၼႄၵၢင်ၸႂ် ၶွင်ၸၢဝ်းၶိူဝ်း ဢၼ်ႁွင်ႉဝႃႈ GS,GN ၸိူဝ်းၼႆႉ လႂ်၊ ဢုပ်ႇၵုမ်ၸွမ်းပႃႇတီႇပၢႆးမိူင်းၸၢဝ်းၶိူဝ်း ၸိူဝ်းၸုၵ်းမၼ်ႈၼိူဝ်သဵၼ်ႈတၢင်းၾႅတ်ႊၻရႄႊၼၼ်ႉလႂ်၊ ဢုပ်ႇၵုမ်ၸွမ်း ၸုမ်းၸၢဝ်းၶိူဝ်းလုၵ်ႉၾိုၼ်ႉဢၼ်ဝႃႈ ဢမ်ႇၵႂႃႇၸွမ်းသဵၼ်ႈတၢင်းၾႅတ်ႊၻရႄႊဢမ်ႇပဵၼ် ၸိူဝ်းၼၼ်ႉလႂ် သေယဝ်ႉ။ ယူႇ တီႈ CRPH ၼႆႉ ပွႆႇၽႃႈပႅတ်ႈတင်းမုင်ႈမွင်းၶဝ် ဢၼ်ယၢင်ႇႁၢၵ်ႈၼိူဝ်လၵ်းမိူင်း 2008 ၼၼ်ႉမႃး။

CRPH ၼႆႉ ဢၢၼ်ႈဢၢင်းၶွတ်ႇၽွတ်ႈၸုမ်းလူင်ပွင်ၸိုင်ႈၵၢင်ၸူဝ်ႈဢၼ်ႁွင်ႉဝႃႈ (ကြားဖြတ်အစိုးရ) ဝႃႈဝႆႉၸိူင်ႉၼၼ်သေ တႃႉ ၾၢႆႇၼိုင်ႈသမ်ႉ ပႆႇပႃႈလႆႈၶဵၼ်ႇတႅမ်ႈလၵ်းမိူင်းၵၢင်ၸူဝ်ႈဢၼ်ႁွင်ႉဝႃႈ  Interim Constitution (ကြားဖြတ်ဖွဲ့စည်းပုံ) ၼၼ်ႉ။

ပေႃးဢဝ်လၢႆးၵၢၼ်ဝႃႈၸိုင် တႃႇတေၶွတ်ႇၽွတ်ႈလႆႈလူင်ပွင်ၸိုင်ႈၵၢင်ၸူဝ်ႈ Interim Government လူဝ်ႇလႆႈပိုၼ်ၽၢဝ်ႇဝႃႈ လၵ်းမိူင်း 2008 ၼႆႉ ဢမ်ႇမီးယဝ်ႉ ဢၼ်ၼႆႉ ဢွၼ်တၢင်းသုတ်း။ ၵႂႃႇၸွမ်း 2008 သေ သမ်ႉဝႃႈ ၶႂ်ႈႁဵတ်းလူင်ပွင်ၸိုင်ႈၵၢင်ၸူဝ်ႈ မၼ်းဢမ်ႇလႆႈ။ ယဝ်ႉၵေႃႈ တေလႆႈၶဵၼ်တႅမ်ႈပူင်ပၢႆးလၵ်းမိူင်းၵၢင်ၸူဝ်ႈ ပိူဝ်ႈတႃႇၽွင်းငမ်းႁႂ်ႈၸိုင်ႈမိူင်းႁွၼ်ႈၵႂႃႇလႆႈ ၸူဝ်ႈၶၢဝ်း။

ၵမ်းၼႆႉ ၼႂ်းလၵ်းမိူင်းၵၢင်ၸူဝ်ႈၼၼ်ႉသမ်ႉ တေလႆႈပႃးဝႃႈ တေႁဵတ်းႁိုဝ် ဢုပ်ႇပိူင်ႇၽွင်းငမ်း၊ တေႁဵတ်းႁိုဝ် ၸႂ်ႉတိုဝ်းၵၢဝ်ႉ ၵူင်းၸိူင်ႉႁိုဝ်သေ ႁႂ်ႈဝၢၼ်ႈမိူင်းပေႃးပၼ်ႇႁွၼ်ႈ ယႃႇႁႂ်ႈပေႃးၵႂင်တၢင်း။ လမ်ႇလွင်ႈသုတ်းတႄႉ တေလႆႈလၢတ်ႈပႃးဝႃႈ တေ ႁဵတ်းႁိုဝ်ၶဵၼ်ႇတႅမ်ႈပူင်ပၢႆးပၵ်းပိူင်လၵ်းမိူင်းဢၼ်မႂ်ႇ ဢၼ်ဝႃႈၼၼ်ႉ။ သိုပ်ႇသေၼၼ်ႉ တမ်ႇၼင်ႇၼႂ်းလၵ်းမိူင်းၵၢင်ၸူဝ်ႈ ပူင်ပၢႆးဝႆႉၼၼ်ႉ တေလႆႈၸတ်းႁဵတ်းပၢင်လိူၵ်ႈတင်ႈသေ ၸတ်းႁဵတ်းပၢင်ၵုမ်သၽႃးပွင်မိူင်း။

ယူႇတီႈ သၽႃးပွင်မိူင်းသမ်ႉ ၶိုၼ်းတေလႆႈၶဵၼ်ႇတႅမ်ႈလၵ်းမိူင်း မိူင်းႁူမ်ႈတုမ် ၾႅတ်ႊၻရႄႊတီႊမူဝ်ႊၶရေႊသီႊ ဢၼ်ႁဝ်း ၶႃႈ မုင်ႈမွင်းမႃး တၢင်းႁိုင် တၢင်းႁီးၼၼ်ႉ ပေႃးၶဵၼ်ႇတႅမ်ႈယဝ်ႉ။ တေလႆႈၸတ်းႁဵတ်း ပၢင်ယၢင်ႇၵၢင်ၸႂ်ၵူၼ်းမိူင်း မၵ်း မၼ်ႈလၵ်းမိူင်း ၾႅတ်ႊၻရႄႊတီႊမူဝ်ႊၶရေႊသီႊၼၼ်ႉ။

ၵမ်းၼႆႉ ၵူၼ်းမိူင်းႁူမ်ႈၵၼ်မၵ်းမၼ်ႈယဝ်ႉ ယိုၼ်ယၼ်ယဝ်ႉ ၸင်ႇၶိုင်ႁဵတ်းပၢင်လိူၵ်ႈတင်ႈ တမ်ႇၼင်ႇလၵ်းမိူင်းၾႅတ်ႊၻ ရႄႊတီႊမူဝ်ႊၶရေႊသီႊ တႅမ်ႈတမ်းမီးဝႆႉၼၼ်ႉ။ တမ်ႇၼင်ႇၽွၼ်းၵၢၼ်ပၢင်လိူၵ်ႈတင်ႈ ဢၼ်ဢွၵ်ႇမႃးၼၼ်ႉ ၸင်ႇတေ လႆႈဢူၼ်းဢၢပ်ႈဢႃႇၼႃႇ ပွင်မိူင်း တီႈလူင်ပွင်ၸိုင်ႈမႂ်ႇ ဢၼ်ၵူၼ်းမိူင်းယုၵ်ႉတၢင်ႇဝႆႉၼၼ်ႉ။

ၼႂ်းၼၼ်ႉ လၢႆးၵၢၼ် ၶၵ်ႉၵၢၼ်ဢၼ်ၵူႈမိူင်းမိူင်းၶဝ် ၸိူဝ်းဢၼ်ႁဵတ်းၵၢၼ် Transition ဢၼ်ႁွင်ႉဝႃႈ လႅၵ်ႈလၢႆႈၶၢႆႉ တေႃႇၵၢၼ်မိူင်း ၸိူဝ်းၼၼ်ႉ ႁူမ်ႈၵၼ် ၸႂ်ႉတိုဝ်းမႃးၵူႈမိူင်းမိူင်းၼၼ်ႉ။ ၵူၺ်းၵႃႈ ၼႆႉပဵၼ်လၢႆးၵၢၼ်မၼ်းၵူၺ်း တေႁိုင်လၢႆ လိူၼ်၊ လၢႆပီ ဢမ်ႇၸၢင်ႈလၢမ်းလႆႈ။

ဢိင်ၼိူဝ် ငဝ်းလၢႆး ၵၢၼ်မိူင်းၼွၵ်ႈမိူင်း/ၼႂ်းမိူင်း ဢိၵ်ႇလူၺ်ႈ ပႃးတၢင်းငဝ်းလၢႆးၵၢၼ်မိူင်းၼမ်ႉလိၼ်ႁိၼ်ၽႃ မိူင်းႁိမ်းႁွမ်း သေယဝ်ႉ။ သမ်ႉဢိင်ၼိူဝ် ၼမ်ႉၸႂ် ထၢတ်ႈၸႂ် ၵူၼ်းမိူင်းၵႅၼ်ႇၶႅင်ၵႃႈႁိုဝ် ဢၼ်ဝႃႈၼၼ်ႉသေ ၶႂ်ႈႁိုင်ၼိုင်ႈပီႁိုဝ် သွင်ပီ။ ၶႂ်ႈႁိုင်သိပ်းပီႁိုဝ် သဝ်းပီႁိုဝ် မၼ်းၸၢင်ႈပဵၼ်လႆႈၵူႈဢၼ်။

ၵမ်းၼႆႉ ပေႃးႁဝ်းၶႃႈ မႃးတူၺ်းငဝ်းလၢႆး တေႃႈလဵဝ်ၼႆႉ ၼႂ်းမိူင်းႁဝ်းၶႃႈၼႆႉ ယူႇတီႈ CRPH ၵေႃတၢင်တူဝ်သၽႃးမိူင်းႁူမ်ႈ တုမ် မၼ်းၵိုတ်းၶမ်ဝႆႉတီႈလႂ်။ မၼ်းၶၢင်ႉၶူင်ႉဝႆႉတီႈလႂ် ႁဝ်းမႃးတူၺ်းၶႃႈ ဢၼ်ဝႃႈ တေႁဵတ်းႁိုဝ် ၶွတ်ႇၽွတ်ႈၸုမ်းလူင်ပွင် ၸိုင်ႈၵၢင်ၸူဝ်ႈ ဢၼ်ၵူႈၸုမ်းၸၢဝ်းၶိူဝ်း ၶဝ်ႈႁူမ်ႈပႃးၼၼ်ႉ ၼႆႉပဵၼ်တၢင်းယၢပ်ႇၶဝ်။

ၶဝ်တႄႉပိုၼ်ၽၢဝ်ႇဝႃႈ လူင်ပွင်ၸိုင်ႈၵူႈၸၢဝ်းၶိူဝ်း ၽွမ်ႉႁူမ်ႈၶဝ်ႈပႃးၸွမ်းၼၼ်ႉ တိုၼ်းတေလႆႈၽွတ်ႈႁႅၼ်း ၶဝ်ပွင်ႇၸႂ်ဝႆႉ ယူႇ။ ၵူၺ်းၵႃႈ တႃႇတေမႃးႁဵတ်းတႄႉ မၼ်းသမ်ႉ ဢမ်ႇငၢႆႈငၢႆႈ။

CRPH ၵေႃတၢင်တူဝ်သၽႃးမိူင်းႁူမ်ႈတုမ်ၼႆႉ ပဵၼ်ဝႆႉတီႈၸႂ်ယႂ်ႇၶွင်ၵူၼ်းမိူင်းပတ်းပိုၼ်ႉယူႇ ၸိူဝ်းၼႄၵၢင်ၸႂ်ၶွမ်ႈၶတ်း တေႃႇသိုၵ်းမၢၼ်ႈ၊ ၽူႈႁၢပ်ႇၵၢၼ်ၶုၼ် ၸိူဝ်းဢမ်ႇယွမ်းႁဵတ်းၵၢၼ်သေယဝ်ႉ ၶွမ်ႈၶတ်းယူႇ ၸိူဝ်းၼၼ်ႉ တင်းမူတ်းတင်း သဵင်ႈ ဢွၼ်မုင်ႈမွင်း တၢင်းဢွၼ်ႁူဝ် CRPH ယူႇ တင်းယႂ်ႇ တင်းလူင်။

ယူႇတီႈ CRPH ၼႆၵေႃႈ ၵႃႈၼင်ႇပွင်ပဵၼ်လႆႈၼၼ်ႉ ၶွတ်ႇၽွတ်ႈႁွင်ႈၵၢၼ်ၶုၼ်ၽွင်းလူင်လၢႆလၢႆဢၼ်သေယဝ်ႉ ဢွၵ်ႇလိၵ်ႈ ပိုၼ်ၽၢဝ်ႇ ၸီႉသင်ႇၵႅတ်ႇၶႄပၼ်ယူႇ ၶိူဝ်းယႂ်း။

ယဝ်ႉၵေႃႈ တႅင်ႇတၢင်ႈၵႅမ်ၸွမ်ၸိုင်ႈသေယဝ်ႉ ပိုၼ်ၽၢဝ်ႇဝႃႈ ၸုမ်းသိုၵ်းမၢၼ်ႈ ပဵၼ်ၸုမ်းၵေႃႇၵၢၼ်ႁၢႆႉ ဢၼ်ဝႃႈမႃးမိူဝ်ႈၵႆႈ ၼၼ်ႉ ယဝ်ႉၵေႃႈ ယိုတ်းယႃႉပႅတ်ႈဝႃႈ သိုၵ်းၸၢဝ်းၶိူဝ်းတင်းသဵင်ႈၼႆႉ ပဵၼ်ၸုမ်းသိုၵ်းၶဝ်ႈတၢင်းၵၢၼ်ၼႆသေ ၸိူဝ်းၼႆႉ ဢမ်ႇၵႃး မိူဝ်းၼႃႈ လူဝ်ႇလႆႈႁူမ်ႈၵၼ်ၶွတ်ႇၽွတ်ႈတပ်ႉသိုၵ်းၾႅတ်ႊၻရႄႊမိူင်းႁူမ်ႈတုမ်ဢိူဝ်ႈ။ လႆႈႁၼ်ၶဝ်တႅမ်ႈဢွၵ်ႇပိုၼ် ၽၢဝ်ႇမႃး ၶႅမ်ႉယူႇၶႃႈ ၸိူဝ်းၼႆႉ တင်းမူတ်း တင်းသဵင်ႈ။ ၵူၺ်းၵႃႈ ၼင်ႇဝႃႈမႃးမိူဝ်ႈၵႆႈၼၼ်ႉ မၼ်းၵႂႃႇၶွင်ႉၶမ်မႃးဝႆႉတီႈလႂ် မၼ်းၵႂႃႇၵိုတ်းၶမ်ဝႆႉတီႈလႂ်လႃႇ။ ႁၢၼ်ႉတေႃႇထိုင်ဝၼ်းမိူဝ်ႈလဵဝ် ၸုမ်းၸၢဝ်းၶိူဝ်းၾၢႆႇသိုၵ်း ၸုမ်းၸၢဝ်းၶိူဝ်းၾၢႆႇမိူင်း ပႆႇပႃႈ ဝၢင်းတူဝ် ဝၢင်းၸႂ် ၶဝ်ႈႁူမ်ႈၸွမ်း CRPH ၼႆႉ ၵွပ်ႈသင်လႃႇ မီးမႃးၶေႃႈထၢမ်ဝႆႉ။

ၼင်ႇႁဝ်းၶႃႈ ႁၼ်ထိုင်တႄႉ 1 ၼႆႉ ၼႂ်း CRPH ၼႆႉ ပႆႇႁၼ်ပႃးမႃးၽူႈဢွၼ်ႁူဝ် ၼႂ်းပႃႇတီႇၼူၵ်ႉယုင်းၶဝ် ပဵၼ်ၵူၼ်းၼုမ်ႇ လၢႆလၢႆ ၸိူဝ်းပဵၼ်သႅၼ်း ႁၢၼ်ႈပၢႆၼၼ်ႉၵူၺ်း မႃးဢွၼ်ႁူဝ်ၼႂ်း CRPH ၼႆႉလႄႈ ပႆႇပေႃးလႆႈ လွင်ႈယုမ်ႇယမ်ၼႄႉၸႂ်တီႈ တၢင်ႇၸုမ်း တၢင်ႇၸၢဝ်း ႁဝ်းၶႃႈ ႁၼ်ထိုင်ဢၼ်ၼၼ်ႉ။

CRPH ၼႆႉ ၸွင်ႇတေၶၢမ်ႈပူၼ်ႉလႆႈႁူမ်ႈငဝ်းဢႃႇၼႃႇ တေႃႇဢွင်ႇသၢၼ်းသူႉၵျီႇႁိုဝ် ၼႆႉပႆႇၼႄႉၼွၼ်း။ ၸူဝ်ႈၵႃႈပူၼ်ႉမႃး မိူဝ်ႈ 1998 ယၢမ်ႈၶွတ်ႇၽွတ်ႈမႃး CRPP ၸုမ်းၸၢဝ်းၶိူဝ်း ၸိူဝ်းဢၼ်ၵႂႃႇႁူမ်ႈပႃးၼၼ်ႉ လႆႈတူၵ်းမႆႈမႃး ယူႇတီႈ တေႃႇဢွင်ႇ သၢၼ်းသူႉၵျီႇ ဢမ်ႇႁဵတ်းၸွမ်းၵႂၢမ်းမၼ်ႈ ဢၼ်တူၵ်းလူင်းၵၼ်ဝႆႉၼၼ်ႉသေ ၵႂႃႇပႅတ်ႈသဵၼ်ႈၼိုင်ႈတၢင်းၼိုင်ႈႁင်းမၼ်း။  ၽိူဝ်ႇမၼ်းၼၢင်းလႆႈဢႃႇၼႃႇတႄႇဢဝ် 2016 တေႃႇထိုင် 2020 ၼႆႉမႃးၵေႃႈ သမ်ႉဢမ်ႇဝိၼ်ႇဝၢႆႇၸူးၾၢႆႇၸၢဝ်းၶိူဝ်း။ ၽိူဝ်ႇ တႃႉတေႁဵတ်းၵေႃႉတၢင်းၸၢဝ်းၶိူဝ်း သမ်ႉၶိုၼ်းၵႂႃႇႁဵတ်းၵေႃႉ ႁႃလီတေႃႇတပ်ႉသိုၵ်းမၢၼ်ႈဢၼ်ဝႃႈၼၼ်ႉၵေႃႈ မၼ်းပဵၼ် ပိုၼ်းဢၼ်ၵိုၵ်းဝႆႉ ပဵၼ်ၸဵပ်းပဵၼ်သႅပ်ႇ ပိူဝ်ႈတႃႇၸၢဝ်းၶိူဝ်း။

ၸင်ႇဝႃႈ ထိုင်မႃးဝၼ်းမိူဝ်ႈၼႆႉ ယူႇတီႈ CRPH ၼႆႉ လႆႈယွမ်းၼွမ်းတွင်ႇပၢၼ်ႇဝႃႈ ပူၼ်ႉ 5 ပီ ယူႇတီႈႁူဝ်ၼႃႈၶဝ်ႁဵတ်းၵႂႃႇ ၸိူင်ႉၼၼ်ႉ မၼ်းၽိတ်းမႃးယဝ်ႉ မိူၼ်တၢင်း လူလၢႆတေႃႇၸၢဝ်းၶိူဝ်းမႃးယဝ်ႉ။ မိူဝ်ႈလဵဝ်ၼႆႉ တေလႆႈမူၼ်ႉမႄးပိၼ်ႇပႅင် သေ တၵ်းလႆႈလၢႆႈလၢႆးၵၢၼ်မၼ်းယဝ်ႉၼႆၵေႃႈ လႆႈႁၼ်ၶဝ်ပိုၼ်ၽၢဝ်ႇပႃးယူႇ။ ၵူၺ်းၵႃႈ ၾၢႆႇၸၢဝ်းၶိူဝ်းတႄႉ ပႆႇပႃႈတိူဝ်ႉ ၼိူဝ်ႉတိူဝ်ႉၼင်သင် တိုၵ်ႉၾၢင်ႉသေ ၸုၵ်းတူၺ်းယူႇ။

ၵမ်းၼႆႉ ၶေႃႈထီႉ 3 ယူႇၾၢႆႇၸုမ်းၸၢဝ်းၶိူဝ်းႁဝ်းၶႃႈသမ်ႉ တိုၵ်ႉငမ်းငဝ်းပဵၼ်ဝႆႉၸႂ်သွင်သဵၼ်ႈ ႁဝ်းၶႃႈလၢမ်းႁၼ်ဝႆႉၸိူင်ႉ ၼၼ်။ သဵၼ်ႈၼိုင်ႈၼႆႉ ယူႇတီႈသိုၵ်းၸၢဝ်းၶိူဝ်းၵမ်ႈၼမ် ပိူင်ယႂ်ႇမၼ်း တၢင်းပွတ်းႁွင်ႇၼႆႉ တိုၵ်ႉထၢင်ႇဝႃႈ မိူင်းၶႄႇတေၶဝ်ႈ ၸွႆႈသေယဝ်ႉ ႁဵတ်းႁႂ်ႈၸုမ်းသိုၵ်းမၢၼ်ႈၼႆႉ ဢွင်ႇပေႉၵႂႃႇ။ ဢမ်ႇၼၼ်ၵေႃႈ မိူင်းၶႄႇၶဝ်ႈၸွႆႈသေယဝ်ႉ တေႁဵတ်းႁႂ်ႈၸုမ်း သိုၵ်းမၢၼ်ႈလႄႈ တင်းတေႃႇဢွင်ႇသၢၼ်းသူႉၵျီႇ ဢမ်ႇၼၼ် ၸုမ်းၼူၵ်ႉယုင်း ႁႂ်ႈထုၵ်ႇမေႃၽေႃးၵႂၢမ်းၵၼ်သေ သိုပ်ႇပွင် မိူင်းၵႂႃႇ။ ၼႆႉပဵၼ်ဢီႈသင်လႃႇ ပဵၼ်လၢႆးတၢင်းၵႂႃႇၸွမ်း သဵၼ်ႈတၢင်း 2008 ထႅင်ႈၵမ်းၼိုင်ႈ။

ၵမ်းၼႆႉ ယူႇတီႈသိုၵ်းၸၢဝ်းၶိူဝ်း ပဵၼ်ဝႆႉၸႂ်ထႅင်ႈသဵၼ်ႈၼိုင်ႈသမ်ႉ ၽိူဝ်ႇၶဝ်ႈႁူမ်ႈၸွမ်း CRPH တႃႉတင်ႈၸုမ်း ၸၢဝ်းၶိူဝ်း ႁင်းၵူၺ်းသေယဝ်ႉ ႁဵတ်းဢူၺ်းလီတေႃႇ CRPH ၵႂႃႇ ၼင်ႇႁူဝ်မႃႇၽဵင်ႇပဵင်းၵၼ် တေမီးဝႆႉ ပၢႆးဝူၼ်ႉသွင်သဵၼ်ႈၼႆႉ။

ပဵၼ်ႁိုဝ်ၵေႃႈယဝ်ႉ ပေႃးတေမႃးတူၺ်း ၾၢႆႇသိုၵ်းၸၢဝ်းၶိူဝ်းၵေႃႈလီ ၾၢႆႇ CRPH ၵေႃႈယဝ်ႉ ဢၼ်ၸၢင်ႈလၢတ်ႈလႆႈတႅတ်ႈ တေႃးၼႄႉၼွၼ်းဢၼ်ၼိုင်ႈတႄႉ ၼင်ႇႁိုဝ် တေၵွၼ်းပေႉလႆႈ ၼင်ႇႁိုဝ်တေ သုမ်ႇငုမ်းပေႉပုၼ်ႈလႆႈ တီႈၸုမ်းသိုၵ်းမၢၼ်ႈ ဢၼ်ယိုCRPH တ်းသိမ်းဢႃႇၼႃႇယူႇၼၼ်ႉ ပႆႇႁႃလၢႆးတၢင်းတႅတ်ႈတေႃး မၼ်းလႆႈလႄႈ ထိုင်တီႈဝၼ်းမိူဝ်ႈၼႆႉ ၸင်ႇဝႃႈ ပႆႇတူဝ်ႈ တၼ်း ပိူဝ်ႈတႃႇတေႁဵတ်းႁႂ်ႈၵူၼ်းမိူင်းတင်းသဵင်ႈ လႆႈၸႂ်ယႂ်ႇ ၸႂ်သိူဝ်းဢၼ်ဝႃႈၼၼ်ႉ ႁဝ်းၶႃႈ ယွၼ်းတေႃႉတႆႇပၢႆးၼႄၵၼ် မွၵ်ႈၼႆႉသေ ႁႂ်ႈလႆႈယွၼ်းၶွတ်ႇယွတ်ႈဝႆႉတီႈၼႆႈၶႃႈ။

မႂ်ႇသုင်ၶႃႈ

ႁိုၼ်း ၵႃယၢင်း