ၵူၼ်းမိူင်း တူၵ်းၸႂ် တိုၼ်ႇသၢၼ်ႈ သဵင်ၵွင်ႈတႅၵ်ႇ ၼႂ်းၸႄႈဝဵင်း မိူင်းသၢတ်ႇၼႂ်ၼႆႉ ယိုဝ်းၵွင်ႈလူင်ၵွင်ႈဢွၼ်ႇ 2 ၸူဝ်ႈမူင်း ဝႃႈၼႆ။
မိူဝ်ႈၼႆႉ ဝၼ်းတီႈ 17/3/2021 ယၢမ်းၵၢင်ၼႂ် 7 မူင်းပၢႆ ထိုင် 9 မူင်းပၢႆ သဵင်ၵွင်ႈတႅၵ်ႇ တၢင်းၾၢႆႇႁူဝ်ၼမ်ႉသၢတ်ႇ ဢၼ်မီး တၢင်းၾၢႆႇႁွင်ႇဝဵင်း ၼႂ်းၸႄႈဝဵင်းမိူင်းသၢတ်ႇ ၸိုင်ႈတႆး ပွတ်းဢွၵ်ႇၶူင်း ၵူၼ်းမိူင်း ဢွၼ်ၵၼ် တူၵ်းၸႂ် တိုၼ်ႇသၢၼ်ႈၵၼ် ၼႆယဝ်ႉ။
ၵူၼ်းမိူင်းသၢတ်ႇ ၵေႃႉၼိုင်ႈ လၢတ်ႈဝႃႈ -“ၸႂ်ႈၶႃႈဢေႃႈ သဵင်ၵွင်ႈတႅၵ်ႇၶႃႈ တႄႇဢဝ် 7 မူင်းပၢႆ ထိုင် 9 မူင်းပၢႆၼၼ်ႉၶႃႈၼႃႇ။ တႅၵ်ႇၾၢႆႇလဵဝ်ၵူၺ်းၶႃႈ သဵင်ၵွင်ႈၸၢၵ်ႈတႄႉ ယိုဝ်းယၢဝ်း ဝႆႉၶႃႈဢေႃႈ။ ယဝ်ႉၵေႃႈ ပွႆႇမၢၵ်ႇလူင်ပႃးၸွမ်းၶႃႈဢေႃႈ။ ပဵၼ် သိုၵ်းမၢၼ်ႈ ၶဝ်ၸၢမ်းၶိူင်ႈၵွင်ႈၵၢင်ႇၶဝ်ၵူၺ်းၶႃႈယူဝ်ႉ၊ ၵူၼ်းမိူင်းတူၵ်းၸႂ် တိုၼ်ႇသၢၼ်ႈၵၼ် ၶႃႈဢေႃႈ”- ဝႃႈၼႆ။
ပူၼ်ႉမႃး လၢႆဝၼ်းၼႆႉ တၢင်းသၢႆၼႆႉ မီးၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸုမ်းၼိုင်ႈ တူင်ႉၼိုင် ႁွတ်ႈထိုင်ဝႆႉ တင်းၼမ် ၼႆ ယဝ်ႉ။
“ၼႂ်းၶၢဝ်းတၢင်း 2-3 ဝၼ်းၼႆႉ ႁၼ်သိုၵ်းၶူဝ်းလၢႆး ႁွတ်ႈၽႅဝ်ဝႆႉ တၢင်းႁူဝ်ၼမ်ႉသၢတ်ႇၼႆႉ ၼမ်ၶႃႈဢေႃႈ။ လွင်ႈသိုၵ်းမၢၼ်ႈ ယိုဝ်းၵွင်ႈမိူဝ်ႈၼႆႉ လႅပ်ႈတေၵႂႃႇလွၵ်ႇငိုတ်ႈ ၸူးၶူဝ်းလၢႆးၶႃႈယူဝ်ႉ ႁဝ်းၶႃႈထၢင်ႇတႄႉ”- ၵူၼ်း မိူင်း ပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။
ဢိင်ၼိူဝ် လွင်ႈၼႆႉ သိုၵ်းမၢၼ်ႈ ဢၼ်ၵႂႃႇယိုဝ်းၵွင်ႈ မၢၵ်ႇလူင် တၢင်းႁူဝ်ၼမ်ႉသၢတ်ႇၼၼ်ႉ ပဵၼ်မၢႆတပ်ႉသင် ဢၼ်ဝႃႈ ၼၼ်ႉ ပႆႇႁူႉ။ ၵူၼ်းမိူင်းၵမ်ႈၼမ် ႁၼ်ထိုင်ဝႃႈ ဢမ်ႇၵိုင်ႇလီယိုဝ်း လွၵ်ႇၸိူင်ႉၼႆ ႁဵတ်းႁႂ်ႈ ၵူၼ်းမိူင်းတူၵ်းၸႂ်ၵူၺ်း ဝႃႈၼႆ။
