မိူဝ်ႈၼႆႉဝၼ်းတီႈ 15 /3/2021 ယၢမ်းၵၢင်ၶမ်ႈ 8 မူင်း ၶၢဝ်းၵူၼ်းမိူင်း ယူႇၼႂ်းဝၢင်းႁိူၼ်းၸဝ်ႈၵဝ်ႇသေ တွႆႇပုင်းလဵၵ်း ၼႄၵၢင်ၸႂ်သၢၼ်ၶတ်းသိုၵ်းယိုတ်းဢႃႇၼႃႇႁင်းၽႂ်မၼ်းၼၼ်ႉ မီးၵူၼ်းၸုမ်းၼိုင်ႈ သႂ်ႇသိူဝ်ႈၶူဝ်းသိုၵ်း မႃးပွႆႇမၢၵ်ႇသႂ်ႇ ႁိမ်းႁိူၼ်း ၵူၼ်းတွႆႇပုင်း။
ၵူၼ်းၼုင်ႈၶူဝ်းသိုၵ်းၸုမ်းၼၼ်ႉ ၶီႇရူတ်ႉၵႃးလဵပ်ႈမႃးၼႂ်းပွၵ်ႉ 10 ။ ၽွင်းထိုင်တီႈသဵၼ်ႈတၢင်းႁိၼ်ၶဵဝ်ၼၼ်ႉ ထိုမ်ႈမၢၵ်ႇသႂ်ႇႁိမ်းႁိူၼ်းတွႆႇပုင်းလဵၵ်းလင်ၼိုင်ႈ ၊ မၢၵ်ႇတူၵ်းသႂ်ႇ တိူဝ်ႉၺႃး တႃႈရူတ်ႉၵႃး “သၼ်လွႆပလွင်ႈ” ဢၼ်မီးႁိမ်းႁိူၼ်းတွႆႇပုင်းလဵၵ်းၼၼ်ႉ လင်ၶႃးႁိူၼ်းယွၵ်းယွႆၵႂႃႇၵူၼ်းၼႂ်းပွၵ်ႉ ဢၼ်ႁၼ်ၵိုၵ်းတႃၼၼ်ႉလၢတ်ႈတီႈၽူႈတွႆႇႁွၵ်ႈ။
ၵူၼ်းၼႂ်းပွၵ်ႉၼၼ်ႉလၢတ်ႈဝႃႈ – “ၽွင်းၶၢဝ်း 8 မူင်းၵၢင်ၶမ်ႈၽွင်းပိူၼ်ႈတွႆႇပုင်းလဵၵ်းၼၼ်ႉၵႃးတၢင်ႇၵူၼ်းသိုၵ်းလမ်းၼၼ်ႉၶဝ်ႈမႃးၼႂ်းပွၵ်ႉသေမႃးပွႆႇမၢၵ်ႇ ။ သဵင်မၢၵ်ႇမေႃးၵႂႃႇ 4 ၵမ်း၊ လင်တႄႉတႄႉၶႃႈ။ ယူႇႁိူၼ်းႁဝ်းၶႃႈၼႆႉသေမုင်ႈႁၼ် မၢၵ်ႇတႅၵ်ႇၼၼ်ႉယူႇ။ ၶၢဝ်းၼၼ်ႉမီရူတ်ႉ လမ်းၼၼ်ႉၵူၺ်းဢေႃႈၼိူဝ်တၢင်း ။ ဢမ်ႇမီးၵူၼ်းမိူင်းၵႂႃႇမႃးယဝ်ႉၶႃႈလူး” – ဝႃႈၼႆ။
ၵဵဝ်ႇၵပ်းလွင်ႈၼႆႉၵူၼ်းမၢတ်ႇၸဵပ်းလူႉတၢႆတႄႉဢမ်ႇမီး။ ၵူၼ်းၼုင်ႈၶူဝ်းသိုၵ်းဢၼ်မႃးပွႆႇမၢၵ်ႇပွမ်းၼၼ်ႉ ပဵၼ်ၸုမ်းလႂ် ၼႆတႄႉ ၵူၼ်းၼႂ်းပွၵ်ႉဢမ်ႇႁတ်းလၢတ်ႈ။
ၵူၼ်းပွၵ်ႉ 12 လႃႈသဵဝ်ႈ ၵေႃႉၼိုင်ႈ တႄႉလၢတ်ႈဝႃႈ – “ၶဝ်မႃးလွၵ်ႇငိုတ်ႈၼင်ႇႁိုဝ်ပိူၼ်ႈတေဢမ်ႇႁတ်းတွႆႇပုင်းၼႆႉၵႂႃႈ။ ၵႃးပလိၵ်ႈ ၵႃးသိုၵ်းမၢၼ်ႈ လဵပ်ႈတဝ်ၼႂ်းဝဵင်းၵူႈၵိဝ်ႇၵူႈငွၼ်ႈၵူႈၶမ်ႈၶိုၼ်း ၶႃႈယဝ်ႉ။ၶဝ်လွၵ်ႇႁႂ်ႈၵူၼ်းမိူင်းၵူဝ်ၼၼ်ႉယိုင်။” – ဝႃႈၼႆ။
တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼႆႉ မီးၵူၼ်းမိူင်းၼႄၵၢင်ၸႂ် သၢၼ်ၶတ်းသိုၵ်းမၢၼ်ႈၵူႈဝၼ်း။ ၸႂ်ႉလွၵ်းလၢႆးလၢႆလၢႆယၢင်ႇ ၼႄၵၢင်ၸႂ်လူၺ်ႈလၢႆးၵတ်းယဵၼ်ၼင်ႇႁိုဝ်ပလိၵ်ႈမၢၼ်ႈတေဢမ်ႇတီႉၺွပ်းပိုတ်းယိုဝ်းလႆႈ။
