ဝၼ်းတီႈ 8 လႄႈ 9/3/2021 ၶွင်ႇသီႇသိုၵ်းမၢၼ်ႈ သွၵ်ႈတဝ်ႁွင်ႈလုမ်းႁဵတ်းၵၢၼ်သိုဝ်ႇၶၢဝ်ႇ မၢၼ်ႈလၢႆလၢႆဢၼ် လႄႈပိုၼ်ၽၢဝ်ႇ ယိုတ်းပႅတ်ႈဝႂ်ဢၼုယၢတ်ႈႁဵတ်းၵၢၼ်ၶၢဝ်ႇလၢႆလၢႆႁွင်ႈၵၢၼ်ၶၢဝ်ႇမၢၼ်ႈ။
ၽွင်းၶၢဝ်းလူင်ပွင်ၸိုင်ႈတီႊမူဝ်ႊၶရေႊသီႊ 2 သိုပ်ႇ 2 ပၢၼ် ဢၼ်ၵူၼ်းမိူင်းလိူၵ်ႈတင်ႈၶိုၼ်ႈမႃးၽွင်းငမ်းၼၼ်ႉ ပၼ်တီႈယူႇသိုဝ်ႇၶၢဝ်ႇမီႇတီႇယႃႇပဵၼ်သင်ႉလၵ်းတီႈ 4 ၼႂ်းၵၢၼ်ပူၵ်းပွင်ဝၢၼ်ႈမိူင်း ဝႃႈၼႆသေတႃႉ ဝၼ်းတီႈ 8 ယၢမ်းဝၢႆးဝၼ်း ပလိၵ်ႈလႄႈသိုၵ်းၶဝ်ႈသွၵ်ႈလုမ်းသိုဝ်ႇၶၢဝ်ႇ မျၢၼ်ႇမႃႇၼၢဝ်း Myanmar Now ၊ ထိုင်တွၼ်ႈၵၢၼ်ၶၢဝ်ႇ ယၢမ်း 8 မူင်းၵၢင်ၶမ်ႈပိုၼ်ၽၢဝ်ႇတီႈလၢႆးၵၢၼ်ၶၢဝ်ႇ MRTV ဝႃႈ ၸုမ်းသိုဝ်ႇၶၢဝ်ႇၸိူဝ်းၼႆႉ ဢွၵ်ႇၶၢဝ်ႇၸပ်းၾၢႆႇ၊ ဢမ်ႇတိုဝ်းၵမ်ပိူင်သိုဝ်ႇၶၢဝ်ႇၼႆသေ ယူႇတီႈၶွင်ႇသီႇသိုၵ်းသေ ယိုတ်းပႅတ်ႈဝႂ်ဢၼုယၢတ်ႈႁဵတ်းၵၢၼ်ၶၢဝ်ႇ ၸုမ်းၶၢဝ်ႇ မိတ်ႉၸီႉမ Mizzima ၊ မျၢၼ်ႇမႃႇၼၢဝ်း Myanmar Now၊ တီႇဝီႇပီ DVB ၊ ၶိတ်ႉတိတ်ႉ Khit Thit Media လႄႈ သႄးဝႅၼ်းတေး 7 Day News ၸိူဝ်းၼႆႉ- ဝႃႈၼႆ။
ၵူၺ်းၵႃႈ ၸုမ်းၶၢဝ်ႇ ၸိူဝ်းၺႃးႁၢမ်ႈ/ ဢိုတ်းၸိူဝ်းၼၼ်ႉမိူဝ်ႈၼႆႉ ပိုၼ်ၽၢဝ်ႇသႃႈ ၶွင်ႇသီႇသိုၵ်းမၢၼ်ႈ ပိၵ်ႉဢိုတ်းဝႂ်ႁဵတ်းၵၢၼ်ၶၢဝ်ႇယူႇၵေႃႈ တေသိုပ်ႇတႅမ်ႈၶၢဝ်ႇ ဢၼ်မၢၼ်ႇမႅၼ်ႈလႄႈ တေသိုပ်ႇပိုၼ်ၽႄႈလွင်ႈဢၼ်ဢမ်ႇတြႃးၼၼ်ႉၵႂႃႇထႅင်ႈလွတ်ႈလႅဝ်း ဝႃႈၼႆ။
မိူဝ်ႈၼႆႉဝၼ်းတီႈ 9 သမ်ႉ ၶွင်ႇသီႇသိုၵ်းသိုပ်ႇၶူၼ်ႉသွၵ်ႈတဝ် လုမ်းႁဵတ်းၵၢၼ် မိတ်ႉၸီႉမ လႄႈ ၶိတ်ႉတိတ်ႉ မီႇတီႇယႃႇထႅင်ႈ။
လိူဝ်ၼၼ်ႉ သိုၵ်းမၢၼ်ႈဢဝ်ႁႅင်းသိုၵ်းၶဝ်ႈတဝ်လုမ်းၸုမ်းႁဵတ်းၵၢၼ်တူင်ႇဝူင်းၵူၼ်း ၊ ၸုမ်းၸွႆႈထႅမ်ၶႅၵ်ႇလီပၢင်ၸႃႉ ၸိူဝ်းၼႆႉသေ ပိုၼ်ၽၢဝ်ႇယိုတ်းပိၵ်ႉပႅတ်ႈလၢႆလၢႆၸုမ်းမိူၼ်ၵၼ် ။
ဝၢႆးလင်သိုၵ်းမၢၼ်ႈယိုတ်းဢႃႇၼႃႇ ၸိုင်ႈမိူင်း မႃးတေႃႇထိုင်ဝၼ်းမိူဝ်ႈၼႆႉ ၶၢဝ်းတၢင်း 37 ဝၼ်း၊ ၵူၼ်းမိူင်းပတ်းပိုၼ်ႉၸိုင်ႈမိူင်း ဢွၵ်ႇၼႄၵၢင်ၸႂ်သၢၼ်ၶတ်းၵူႈဝၼ်း။သိုၵ်းလႄႈပလိၵ်ႈ ၸႂ်ႉႁႅင်းၵူၼ်း ႁႅင်းမၢၵ်ႇၵႅတ်ႉသ်မၢၵ်ႇပွမ်းသေ ယႃႉၾုင်ၵူၼ်းၼႄၵၢင်ၸႂ်။ လိုပ်ႈလမ်းတီႉၺွပ်းၵူၼ်းၼုမ်ႇၽူႈၼႄၵၢင်ၸႂ် မီး 1857 ၵေႃႉ။ၼႂ်းၼၼ်ႉပႃးၵူၼ်းႁဵတ်းၵၢၼ်ၶၢဝ်ႇ 30 ပၢႆ။ယင်းပႆႇလွတ်ႈမႃးၶိုၼ်း။
ၵူၼ်းၸိုဝ်ႈသဵင်ယႂ်ႇဢၼ်ၺႃးၶွင်ႇသီႇမၢၼ်ႈပိုၼ်ၽၢဝ်ႇသဵၼ်ႈၸိုဝ်ႈဝႆႉဝႃႈႁႂ်ႈမႃးမွပ်ႈတူဝ် ၼႆသေ ပၢႆႈဝႆႉမီး 70 ၵေႃႉ။ ၵူၼ်းၸိူဝ်း တၢႆ ယွၼ်ႉသိုၵ်းမၢၼ်ႈလမ်းလိုပ်ႈပေႃႉထုပ်ႉယိုဝ်းတၢႆ မီး 60ပၢႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ