လွင်ႈတုၵ်ႉလွင်ႈယၢပ်ႇ ၵူၼ်းၼိုင်ႈၵေႃႉၼၼ်ႉ ၽႂ်ၸမ်ၵေႃႈ မၼ်းၸွႆႈၵၼ်လႆႈ တိုတ်ႉတၢႆးၵၼ်လႆႈယူႇၼႆသေတႃႉ သင်ပဵၼ်မူႇပဵၼ်ၵေႃ ပဵၼ်ဝၢၼ်ႈပဵၼ်မိူင်းမႃးသမ်ႉ ယိင်ႈၶႅၼ်းလူဝ်ႇတၢင်းၸွႆႈထႅမ် တႃႇႁႂ်ႈၵုမ်ႇထူၼ်ႈ တူဝ်ႈထိုင် ၵူၼ်းၵူႈၵေႃႉၼၼ်ႉဢမ်ႇငၢႆႈ ။ ၸင်ႇၼၼ်လႄႈ ၵၢပ်ႈပၢၼ်မႂ်ႇၼႆႉ ၼင်ႇႁိုဝ် တေပိူင်းၼႄလႆႈ လွင်ႈတုၵ်ႉလွင်ႈၶီ လွင်ႈမႆႈလွင်ႈလိူတ်ႇ ၵူၼ်းတီႈလႂ်တီႈၼၼ်ႈၼၼ်ႉ ၸင်ႇဢွၼ်ၵၼ် ထၢႆႇငဝ်းတူင်ႉလႄႈသင် ၶႅပ်းႁၢင်ႈလႄႈသင် ၸိူဝ်းၼႆႉသေ ဢွၵ်ႇသဵင်တႅၼ်းပၼ်ၵူၼ်းၸိူဝ်းၼၼ်ႉမႃးၶိူဝ်းယႂ်း ။

မိူင်းႁူမ်ႈတုမ်မၢၼ်ႈ ဢၼ်ၺႃးသိုၵ်း ယိုတ်းမိူင်း ၼႆႉၵေႃႈ ၵူၼ်းမိူင်းတုၵ်ႉၵိၼ်းတူဝ်ႈမိူင်းၵေႃႈ ဢိင်ၼိူဝ်ငဝ်းလၢႆးလုမ်ႈၾႃႉသေ ၸိုင်ႈမိူင်းဢဵၼ်ႁႅင်းယႂ်ႇၶဝ် ၸၢင်ႈတူၺ်းၶၢမ်ႈပႅတ်ႈ မိူၼ်ဢမ်ႇပေႃးသႂ်ႇၸႂ် ။ ၸင်ႇၼၼ် လႄႈ သိုဝ်ႇၶၢဝ်ႇ DVB ၼမ်းၸတ်းပၢင်ၼႄငဝ်းတူင်ႉ ဢၼ်ဢွၵ်ႇသဵင်ပၼ် လွင်ႈယၢပ်ႇၵိၼ်းၸႂ်ၵူၼ်းမိူင်းႁူမ်ႈတုမ်ပတ်းပိုၼ်ႉ တီႈၸၼ်ႉၸွမ်ၵဵင်းမႂ်ႇ ၸိုင်ႈထႆး ။

ပၢင်ၼႄငဝ်းတူင်ႉ DVB Peacock Film Festival 2025 ၼႆႉ ၸတ်း တီႈၸၼ်ႉၸွမ်ၵဵင်းမႂ်ႇ ၸိုင်ႈထႆး ၊တႄႇသၢႆၼႄ ဝၼ်းတီႈ 8/12/2025 ထိုင် 10/12/2025 ၊ ၶၢဝ်းယၢမ်းၵၢင်ၼႂ် 10 မူင်းၶိုင်ႈ တေႃႇပေႃးထိုင် ႁူဝ်ၶမ်ႈ 6 မူင်းၶိုင်ႈ ၵူႈဝၼ်း။ ၼႂ်းတွၼ်ႈၵၢင်ၶမ်ႈ တေႃႇထိုင် 8 မူင်းၶိုင်ႈ ၵေႃႈ မီးၶပ်ႉမၢႆဢၼ်ၶိုၵ်ႉတွၼ်း မၼ်းဝႆႉၶေႃၶေႃ။

ႁွင်ႈၼႄငဝ်းတူင်ႉၼႆႉ တေၸႅၵ်ႇဝႆႉပဵၼ် 2 ႁွင်ႈ Cinema 1 လႄႈ 2 ပေႃးထိုင်ၼႂ်းဝၢင်းၸၼ်ႉၸွမ်ၵဵင်းမႂ်ႇယဝ်ႉ လတ်းၵႂႃႇၸူး တိုၵ်း Communication Innovation Center – CIC ဢၼ်မီးႁိမ်းၼွင်ဢၢင်ႇၵႅဝ်ႈၼၼ်ႉၵေႃႈ ၶဝ်ႈတူၺ်းလႆႈ ။
ပၢင်ၼႄငဝ်းတူင်ႉၼႆႉ ဢဝ်ႁၢင်ႈဢဝ်သဵင်မႃးလေႃးၵၼ်ၵူၺ်းဢမ်ႇၸႂ်ႈ ၊ ပဵၼ်ငဝ်းတူင်ႉဢၼ်ဢဝ်သဵင်ၵၢင်ၸႂ် ၵူၼ်းမိူင်း ၊ ပဵၼ်ငဝ်းတူင်ႉဢၼ်ၼႄ သရေႇၼႃႈတႃၵူၼ်းမိူင်း ၊ ၼႄတၢင်းမုင်ႈမွင်းၵူၼ်းမိူင်း ၸိူဝ်းၼႆႉ ။ တႃႇၸတ်းၶူင်းၵၢၼ် ဢၼ်ၼႆႉ ငိုၼ်းၵွင်ၵၢင်မၼ်းလႆႈတိၼ်းတွၼ်းသေတႃႉ မၼ်းႁဵတ်းႁႂ်ႈသဵင်ႁူဝ်ၸႂ်ၵူၼ်းမိူင်းၵႂႃႇလႆႈၵႂၢင်ႈၶႂၢင်လႄႈ တႅပ်းတတ်းႁဵတ်းမႃးပၢင်ၼႄငဝ်းတူင်ႉၼႆႉ – ၼႆ မၶျၢၼ်းသီႇရိၸူဝ်း ၽူႈၼမ်းၸတ်းပၢင်ၼႄငဝ်းတူင်ႉ လၢတ်ႈၼင်ႇၼႆ။

ငဝ်းတူင်ႉ ဢၼ်ဢဝ်မႃးသၢႆၼႄၼႂ်းပၢင်ၼႆႉတႄႉ ပဵၼ်ငဝ်းတူင်ႉဢၼ်ဢိင်ၼိူဝ်ပိူင်ပဵၼ်တႄႉ ၊ မိူဝ်ႈလူင်းပိုၼ်ႉတီႈထၢႆႇဝႆႉၸိူဝ်းၼၼ်ႉၵေႃႈ လႆႈဢဝ်ဢသၢၵ်ႈလႅၵ်ႈသေထၢႆႇမႃး ၊ ယွၼ်ႉဝႃႈ ပဵၼ်ၼႂ်းဢွင်ႈတီႈ ဢၼ်မီးၽေးသိုၵ်းသိူဝ် ၽေးသၽႃဝ ၽေးၵူႈၸိူဝ်ႉၵူႈလွင်ႈ ။ လီဢဝ်ၵုင်ႇမုၼ် ၵူၼ်းၼုမ်ႇၸိူဝ်းၶူင်သၢင်ႈမႃး ငဝ်းတူင်ႉၸိူဝ်းၼႆႉတႄႉတႄႉၼႆ မၶျၢၼ်းသီႇရိၸူဝ်း သိုပ်ႇလၢတ်ႈၼင်ႇၼႆ။

ၼႂ်းၶၢဝ်းတၢင်း 3 ဝၼ်းၼႆႉ တေသၢႆၼႄငဝ်းတူင်ႉ ဢၼ်ထုၵ်ႇမၵ်းမၼ်ႈၶဝ်ႈၶႄႉၶႅင်ႇ ၼႂ်းပီ 2025 လႄႈ ငဝ်းတူင်ႉဢၼ် ၵူၼ်းမိူင်း လႄႈ ၽူႈသိုဝ်ႇၶၢဝ်ႇၵူႈတီႈတီႈ ထၢႆႇမႃးၸိူဝ်းၼၼ်ႉ မိူၼ်ၼင်ႇ CJ Shots 2025 ၊ ပွင်ႈၵႂၢမ်းၶၢဝ်ႇ (News Feature) ၊ Podcast ၸိူဝ်းၼႆႉ ငဝ်းတူင်ႉတင်းသဵင်ႈမီး 30 ပၢႆ ။

လိူဝ်ၼၼ်ႉ ၸတ်းပႃး ပၢင်ဢုပ်ႇဢူဝ်း workshop ဢၼ်ၵဵဝ်ႇလွင်ႈၵၢၼ်မိူင်း ၵၢၼ်သိုဝ်ႇ လႄႈ သုၼ်ႇလႆႈသုၼ်ႇပဵၼ်ၵူၼ်းၸိူဝ်းၼႆႉ ။ ဝၼ်းလူပ်းပၢင်ၼၼ်ႉ တေၸတ်းပႃး ပၢင်မွပ်ႈဝႂ်ယွင်ႈယေႃး တႃႇၽူႈၸိူဝ်းၶူင်ငဝ်းတူင်ႉသေမႃးၶဝ်ႈၶႄႉၶႅင်ႇ ။ ပိုတ်ႇပၼ်တိုဝ်ႉတၢင်း တႃႇၵူၼ်းၸိူဝ်းသူၼ်ၸႂ်ၶႂ်ႈၵႃႉၶႂ်ႈၶၢႆ တၢင်းၵိၼ်တၢင်းယမ်ႉၾိင်ႈထုင်း လႄႈ ၶၢႆၶူဝ်းၶွင်ၾၢၵ်ႇတွၼ်ႈ ၸိူဝ်းၼႆႉထႅင်ႈ ။

ၵူဝ်ႇဢေးၶျၢၼ်းၼၢႆႇ ၽူႈၵုမ်းထတ်း သိုဝ်ႇၶၢဝ်ႇ DVB လၢတ်ႈဝႃႈ – ” ပိူင်လူင်မၼ်း ဢၼ်ၼႄငဝ်းတူင်ႉၼႆႉ တႃႇပိူင်းၼႄလွင်ႈတုၵ်ႉၵိၼ်းၸႂ်ၵူၼ်းမိူင်းႁူမ်ႈတုမ် ။ ဢမ်ႇၸႂ်ႈဝႃႈ ယိူင်းၸူးတႃႇၵူၼ်းမိူင်းမၢၼ်ႈတူၺ်းၶိုၼ်းၵူၺ်း တႃႇႁႂ်ႈၵူႈၸိုင်ႈမိူင်းႁပ်ႉႁူႉၸွမ်းလွင်ႈပိူင်ပဵၼ်ၼႂ်းမိူင်းႁူမ်ႈတုမ်ၼၼ်ႉ။ၼင်ႇႁိုဝ် ၵူႈၸိုင်ႈမိူင်းတေပၵ်းၸႂ် ၼိူဝ်ငဝ်းလၢႆးမိူင်းႁူမ်ႈတုမ် ၊ ၼင်ႇႁိုဝ် သိုပ်ႇၶတ်းၸႂ်တႃႇတီႊမူဝ်ႊၵရေႊၸီႊၵႂႃႇထႅင်ႈ ”- ဝႃႈၼႆ ။

ပၢင်ၼႄငဝ်းတူင်ႉၼႆႉ လႆႈတၢင်ႇၸိုဝ်ႈပၼ်ဝႆႉဝႃႈ “Giving Voice to the Voiceless” ပွင်ႇဝႃႈ ဢွၵ်ႇသဵင်ပၼ် ၵူၼ်းၸိူဝ်းဢၼ်ဢမ်ႇဢွၵ်ႇသဵင်လႆႈ ။ ဢၼ်ၸတ်းပၢင်ၼႄငဝ်းတူင်ႉၸိူင်ႉၼႆ မီးမႃး 4 ပီ ပႃးပီ 2025 ၼႆႉ။ တႃႇတေပဵၼ်မႃး ပၢင်ဢၼ်ၼႆႉၵေႃႈ သိုဝ်ႇၶၢဝ်ႇၼႂ်းမိူင်းႁူမ်ႈတုမ်မၢၼ်ႈလၢႆမူႇလၢႆၸုမ်း လႆႈႁူပ်ႉထူပ်းဢုပ်ႇဢူဝ်းၵၼ် တီႈဝဵင်းၵဵင်းမႂ်ႇ ၸိုင်ႈထႆး ဝၼ်းတီႈ 30/11/2025 ၼႆႉ လႆႈႁူႉၼင်ႇၼႆ။

ၼႂ်းပၢင်ၼႆႉ ၸုမ်းၶၢဝ်ႇၽူႈတွႆႇႁွၵ်ႈ SHAN NEWS ၵေႃႈ မီးသုၼ်ႇလီ လႆႈၼႄပႃး Documentary လွင်ႈၵူၼ်းထူပ်းၽေးၽွင်းပၢင်တိုၵ်းသိုၵ်းသိူဝ် ဢၼ်မီးၸိုဝ်ႈဝႃႈ Flower that Survive in War တႃႇၶၢဝ်းတၢင်း 3 ဝၼ်း။

ၽူႈတူင်ႉၼိုင် ၼႂ်းၸုမ်းထၢႆႇငဝ်းတူင်ႉ Documentary ၽူႈတွႆႇႁွၵ်ႈ လၢတ်ႈၼႄဝႆႉၼင်ႇၼႆ –

ဢၼ်ႁဝ်းၵႂႃႇ ထၢႆႇလွင်ႈငဝ်းတူင်ႉဢၼ်ၼႆႉ မၼ်းၵေႃႈ ပဵၼ်ပိူင်ပဵၼ်တေႉမိူင်းႁဝ်းၶႃႈၼေႃႈ။ယဝ်ႉၵေႃႈ ပိူၼ်ႈလွင်ႈယၢပ်ႇၽိုတ်ႇၵပ်ႉၵိၼ်း ဢၼ်ၵူၼ်းမိူင်းႁဝ်း လႆႈႁူပ်ႉလႆႈၺႃးယူႇၸိူဝ်းၼၼ်ႉ။ တႃႇတေထၢႆႇၼႆႉ မၼ်းဢမ်ႇၸႂ်ႈဝၢၼ်ႈႁဝ်းမိူင်းႁဝ်း ႁဝ်းဢမ်ႇၸၢင်ႈပိုတ်ႇပၢႆးၼႄဢွင်ႈတီႈမၼ်းလႄႈ ပိူင်ပဵၼ်မၼ်းမၢင်ၸိူဝ်ႉမၢင်လွင်ႈ ။ ၵွပ်ႈၼၼ်လႄႈ လႆႈဢမ်လပ်ႉၽွင်ႈသေ လႆႈႁဵတ်းမႃးၼႂ်းၵႄႈတၢင်းယၢပ်ႇၽိုတ်ႇ လၢႆလၢႆဢၼ်။ၼႂ်းၵႄႈတၢင်းယၢပ်ႇၽိုတ်ႇ ၼႂ်းၵႄႈလွင်ႈၸႃႉၼၼ်ႉမၼ်းၵေႃႈ မီးဢၼ်လီၶႃႈၼေႃႈ။မိူဝ်ႈလဵဝ်ၵေႃႈ ႁဝ်းၶႃႈလႆႈမႃးပၢႆးၼႄတီႈၸၼ်ႉၸွမ်ၵဵင်းမႂ်ႇ

ယွၼ်ႉပၢင်တိုၵ်းသေ ၵူၼ်းမိူင်းလႆႈတုၵ်ႉလႆႈယၢၵ်ႈ ၊ ၸိူဝ်းၺႃး မၢၵ်ႇ ၊ မၢၵ်ႇၵွင်ႈ ၸိူဝ်းၼႆႉသေ တိၼ်ပုတ်းမိုဝ်းပုတ်း ၊ တႃႇမွတ်ႇ ၊ ႁူၼူၵ်ႇ ၸိူဝ်းၼႆႉ။
ၼႄပႃး ပိူင်ပဵၼ်ၵူၼ်းၸိူဝ်းႁဵတ်းၵၢၼ်လုၵ်ႉၽိုၼ်ႉသေ ၸၢတ်ႈပၢၼ်လႆႈလူႉလႆႈသုမ်း ၊ တႃႇတင်ႈတူဝ်ယူႇႁင်းၵူၺ်းၵေႃႈ ယၢပ်ႇ ။ တႃႇပိုင်ႈႁူမ်ႈပိုင်ႈၽူၺ်းပိူၼ်ႈၵေႃႈယၢပ်ႇၼႆၸိူဝ်းၼႆႉ။ ဝၢႆးသေ ဢမေႊရိၵၼ်ႊ တတ်းပႅတ်ႈလွင်ႈၵမ်ႉၸွႆႈသေ တူင်ႇၵူၼ်းၸိူဝ်းၸွႆႈထႅမ်ၵူၼ်းထူပ်းၽေးၵေႃႈ ယၢပ်ႇၽိုတ်ႇ။ ငဝ်းတူင်ႉဢၼ်ၽူႈတွႆႇႁွၵ်ႈႁဵတ်းၼၼ် ပိူင်းၼႄလွင်ႈၶဵင်ႇတႃႉၸိူဝ်းၼၼ်ႉဝႆႉ။

ၸိူဝ်းမႃးသၢႆၼႄငဝ်းတူင်ႉၼႆႉ မၢင်ၸိူဝ်း ပဵၼ်သုၼ်ႇၸုမ်းသေမႃး မၢင်ၸိူဝ်းၵေႃႈ ပဵၼ်သုၼ်ႇတူဝ်သေၶဝ်ႈ ။ ၸဵမ်ဢဝ်လွင်ႈမိူင်းမၢၼ်ႈတွၼ်ႈၼိူဝ်ထိုင်တွၼ်ႈတႂ်ႈ ၊ လွင်ႈမိူင်းတႆး ၊ မိူင်းယၢင်းၽိူၵ်ႇ ၊ မိူင်းယၢင်းလႅင် ၊ မိူင်းၶျၢင်း ၊ မိူင်းရၶႅင်ႇၸိူဝ်းၼႆႉတႄႇၵႂႃႇ လွင်ႈၵူႈမိူင်းမိူင်း။ ပိူင်းၼႄ လွင်ႈႁႃၵိၼ်လဵင်ႉတွင်ႉ ယၢပ်ႇၽိုတ်ႇလႄႈသင် ၊ ပၢႆးပၺ်ႇၺႃႇလႄႈသင် ၸိူဝ်းၼႆႉသေ ၵမ်ႈၼမ် တေပိူင်းၼႄပႃးသုၼ်ႇလႆႈသုၼ်ႇပဵၼ်ၵူၼ်းသၢမ်ပၢၼ်ၸဵတ်းသႅၼ်း။