သင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ၊ ၸိုင်ႈထႆး ၸုပ်ႈ  16  လႆႈၸတ်းႁဵတ်းပၢင်လိူၵ်ႈတင်ႈ ႁူဝ်ပဝ်ႈလႄႈ ၸုမ်းပွင်ၵၢၼ် ၸုပ်ႈ 17 ၊ တႃႇႁၢပ်ႇၵၢၼ် ၼႂ်းပီၵၢၼ်သွၼ် ၵၢၼ်ႁဵၼ်း 2021-2022 ။

မိူဝ်ႈဝၼ်းတီႈ 7/3/2021 သင်ၶတႆး လုၵ်ႈႁဵၼ်းၸၼ်ႉၸွမ်မိူင်းၵွၵ်ႇ ၸိုင်ႈထႆး ၸတ်းပၢင်လိူၵ်ႈတင်ႈ ႁူဝ်ပဝ်ႈ လႄႈ ၸုမ်းပွင်ၵၢၼ် သင်ၶတႆး လုၵ်ႈႁဵၼ်းၸၼ်ႉၸွမ်မိူင်းၵွၵ်ႇ တႃႇႁၢပ်ႇၵၢၼ် ပီ 2021-22 ။ ပၢင်လိူၵ်ႈတင်ႈ ၸတ်းႁဵတ်းတီႈ ဝတ်ႉမႂ်ႇတႆး သႃထုပရႃႇတိတ်ႇ၊ ယၼ်းၼႃးဝႃး၊ ၵိဝ်ႇ 44/1 မိူင်းၵွၵ်ႇ ၸိုင်ႈထႆး။

ၽူႈၶဝ်ႈလိူၵ်ႈတင်ႈ တၼ်းႁဵင်း ႁူဝ်ပဝ်ႈ သင်ၶတႆး လုၵ်ႈႁဵၼ်းၸၼ်ႉၸွမ်မိူင်းၵွၵ်ႇ – (1) ၸဝ်ႈၶူးသၢႆဝၼ်း သုၼၼ်ႇတ (လၢႆးၶႃႈ)၊ပၢႆးပုတ်ႉ ပီသၢမ်၊ (2) ၸဝ်ႈၶူးသႅင်သုမင်ႇၵလ (မိူင်းၵိုင်)၊ ပၢႆးၾိင်ႈၵူၼ်း၊ ပီသၢမ်။ ၸဝ်ႈၶူးသၢႆဝၼ်း သုၼၼ်ၻ လႆႈၶႅပ်းၵၢင်ၸႂ် (55) ၶႅပ်း သေ လႆႈထုၵ်ႇ ယုၵ်ႉၶိုၼ်ႈပဵၼ်ႁူဝ်ပဝ်ႈ ၵႂႃႇ။ ၸဝ်ႈၶူး သႅင် သုမင်ၵလ သမ်ႉ လႆႈၶႅပ်းၵၢင်ၸႂ် (36) ၶႅပ်း။

ႁူဝ်ပဝ်ႈမႂ်ႇ သင်ၶတႆး လုၵ်ႈႁဵၼ်းၸၼ်ႉၸွမ်မိူင်းၵွၵ်ႇ မွၵ်ႇလၢတ်ႈဝႃႈ – ” ၸဝ်ႈႁဝ်းဝူၼ်ႉဝႃႈ ၼႃႈၵၢၼ် ဢၼ် ၸဝ်ႈၵဝ်ႇႁဵတ်းဝႆႉဝၼ်းမိူဝ်ႈၼႆႉ မိူဝ်ႈၽုၵ်ႈၼၼ်ႉပဵၼ်ပိုၼ်းၵႂႃႇယဝ်ႉ တေပဵၼ်ပိုၼ်းလီႁိုဝ် ပိုၼ်း ႁၢႆႉ မၼ်းယူႇတီႈႁဝ်းလိူၵ်ႈႁဵတ်း ။  ယွၼ်ႉၼႆလႄႈ ၼင်ႇႁိုဝ်တေပဵၼ်ၽွၼ်းလီ ပုၼ်ႈတႃႇ ၽႃႇသႃႇ လိၵ်ႈလၢႆး၊ ၸိူဝ်ႉၶိူဝ်း ဝၢၼ်ႈမိူင်းၵႂႃႇၼၼ်ႉ ၼင်ႇဢၼ်ၸဝ်ႈႁဝ်းဝူၼ်ႉလႆႈ၊ လၢတ်ႈလႆႈ၊ ႁဵတ်းလႆႈၸိူဝ်း ၼၼ်ႉ တေႁူမ်ႈမိုဝ်းတင်းၽူႈပွင်ၵၢၼ်ၸုပ်ႈ 17 ၵူႈၽၢႆႇၽၢႆႇသေ  ၶတ်းၸႂ်ႁပ်ႉဢဝ်ပုၼ်ႈ ၽွၼ်းႁဵတ်း သၢင်ႈ ၵႂႃႇ” – ဝႃႈၼႆ။

ၵေႃပွင်ၵၢၼ်မႂ်ႇပီၼႆႉ ႁူဝ်ပဝ်ႈ ပဵၼ် ၸဝ်ႈၶူးသၢႆဝၼ်း သုၼၼ်ၻ၊ ၵႅမ်ႁူဝ်ပဝ်ႈ (1) ပဵၼ်  ၸဝ်ႈၶူးသႅင် သုမင်ၵလ၊ ၵႅမ်ႁူဝ်ပဝ်ႈ (2) ပဵၼ်ၸဝ်ႈသြႃႇ သူရိယ တၢင်ႉယၢၼ်း၊ ၽူႈမၢႆလူင် ပဵၼ် ၸဝ်ႈသုဝၼ်း သုဝꧣ်ꧣ ၊ ၵႅမ်ၽူႈမၢႆ(1) ပဵၼ် ၸဝ်ႈၻေဝိၼ်ၻ သီႇပေႃႉ၊ ၵဵမ်ႈၽူႈမၢႆ (2) ပဵၼ်ၸဝ်ႈမွၼ်းတႆး မုၼိၼ်ၻ ၶဝ်ၸဝ်ႈၸိူဝ်းၼႆႉ။

ၵေႃႈၵမ်ၵၢၼ် ၸုပ်ႈ 16  တႄႉ ႁူဝ်ပဝ်ႈပဵၼ် ၸဝ်ႈၶူး ပိုၼ်းၼုမ်ႇ ပၼ်ႇတိတ ၊ ပွင်ၵၢၼ်မႃး ၼႂ်းပီ ၵၢၼ်သွၼ်ႁဵၼ်း ပီ 2020 – 2021 ။

ၸုမ်းသင်ၶတႆး လုၵ်ႈႁဵၼ်းၸၼ်ႉၸွမ်မိူင်းၵွၵ်ႇၼႆႉ ၵေႃႇတင်ႈမႃး မီး 17 ပီ လိူၵ်ႈတင်ႈ ၵေႃၵမ်ၵၢၼ်မူႇၸုမ်းမႃးၵေႃႈမီး 17 ပွၵ်ႈ။ ၽူႈၼမ်းၼႃႇ မူႇၸုမ်းမီး 9 ၸဝ်ႈ၊ ပႃးၸဝ်ႈတူၼ်ၶူးလူင် – ၸဝ်ႈၶူး Prof. Dr. ၶမ်းမၢႆ ထမ်မသႃမိ (Oxford) မိူင်းဢိင်းၵလဵတ်ႈ၊ ၸဝ်ႈၶူး Dr. ႁိူင်းသႅင် ပၺႃၽေႃးၵ ၽိပႃလ (မိူင်းသူႈ) ၸၼ်ႉၸွမ်ပုတ်ႉထမိူင်းတႆး ဝဵင်းတူၼ်ႈတီး ၶဝ်ၸဝ်ႈၸိူဝ်းၼႆႉ။