SHRF ဝႃႈ လွင်ႈတဵၵ်းၸႂ်ႉၵူၼ်းမိူင်း ပဵၼ်ၶိူင်ႈမိုဝ်းသေ ဢွၵ်ႇၼႄၵၢင်ၸႂ် ၵမ်ႉထႅမ် ပၼ်ႁႅင်းသိုၵ်းမၢၼ်ႈၼၼ်ႉ မၼ်းလူလၢႆ ပူၼ်ႉပႅၼ် သုၼ်ႇလႆႈသုၼ်ႇပဵၼ်ၵူၼ်း ႁၢဝ်ႈ ႁႅင်း ဝႃႈၼႆ။
မိူဝ်ႈၼႆႉ ဝၼ်းတီႈ 25/2/2021 ယူႇတီႈၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF ဢွၵ်ႇၽိုၼ်တၢမ်းငဝ်းလၢႆး လွင်ႈသိုၵ်း မၢၼ်ႈတင်း ၸုမ်းပျီႇတူႉၸိတ်ႉ ၸိုင်ႈတႆး ပွတ်းဢွၵ်ႇၶူင်း ၸီႉသင်ႇ တဵၵ်းတဵင် ႁႂ်ႈၵူၼ်းမိူင်းဢွၵ်ႇၼႄၵၢင်ၸႂ် ၵမ်ႉထႅမ် သိုၵ်း မၢၼ်ႈ တၢင်းပွတ်းဢွၵ်ႇၶူင်း 4 ၸႄႈဝဵင်းၼၼ်ႉ ယွၼ်ႉဢမ်ႇၸႂ်ႈပဵၼ် သဵင်ၵၢင်ၸႂ် ၵူၼ်းမိူင်း ဢၼ်ၸႅတ်ႈၸၢင်ႇ ဢမ်ႇလိူဝ် လႆႈသေ တဵၵ်းၸႂ်ႉၵႂႃႇၵူၺ်း- လွင်ႈၼႆႉ မၼ်းပူၼ်ႉပႅၼ်သုၼ်ႇလႆႈၵူၼ်းႁၢဝ်ႈႁႅင်း ၼႆယဝ်ႉ။
ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈဝႃႈ – “ၵူၼ်းမိူင်းႁဝ်းၶႃႈ ဢၼ်လႆႈ ဢွၵ်ႇ ၼႄၵၢင်ၸႂ်ၵမ်ႉထႅမ်သိုၵ်းမၢၼ်ႈၼၼ်ႉ ၵွပ်ႈပိူဝ်ႈဝႃႈ ဢမ်ႇပႃးၵၢင်ၸႂ် ၸဝ်ႈၵဝ်ႇတႄႉ တႄႉဝႃႈဝႃႈ လႆႈထူပ်းၸုမ်းသိုၵ်းမၢၼ်ႈၶဝ်၊ ပျီႇတူႉၸိတ်ႉၶဝ် တဵၵ်းႁႂ်ႈ ၵူၼ်းမိူင်း ၵႂႃႇ ၼႄၵၢင်ၸႂ် ၵမ်ႉထႅမ်ပၼ်ၶဝ်ၸိူဝ်းၼႆႉ မၼ်းပဵၼ်ဢၼ်ပွမ်/ တု ၵူၺ်း လႄႈ မၼ်း ဢမ်ႇထုၵ်ႇလီပဵၼ်။ လၢႆးၶဝ်ႁဵတ်း ၸိူင်ႉၼႆ မၼ်းတိုၵ်ႉပဵၼ်ၵၢၼ် တဵၵ်းတဵင် ပူၼ်ႉပႅၼ်ၵၼ် ပၢၼ်သိုပ်ႇပၢၼ်မႃးလႄႈ ထိုင်မႃး ယၢမ်းလဵဝ်ၵေႃႈ တိုၵ်ႉၸႂ်ႉ ၵူၼ်း မိူင်းႁဵတ်းယူႇလႄႈ မၼ်းလူလၢႆသုၼ်ႇလႆႈသုၼ်ႇပဵၼ်ၵူၼ်းတႄႉတႄႉ”- ဝႃႈၼႆ။
မိူဝ်ႈဝၼ်းထိ 19/2/2021 ၼၼ်ႉ ၸုမ်းပျီႇတူႉလႃးႁူႇ၊ တပ်ႉပႂ်ႉလႅၼ်လိၼ် ဢၼ်ပၵ်းယူႇၼႂ်းၸႄႈဝဵင်း မိူင်းသၢတ်ႇ၊ မိူင်းတူၼ် လႄႈ မိူင်းၽျၢၵ်ႈ ၸိူဝ်းၼႆႉ ၶၢၼ်းႁွင်ႉ ၵူၼ်းဝၢၼ်ႈ ၸၢဝ်းလႃးႁူႇ၊ ဢႃႇၶႃႇလႄႈတႆး ၸိူဝ်းၼႆႉ ၼိုင်ႈႁိူၼ်း ၼိုင်ႈၵေႃႉ ၸႂ်ႉႁႂ်ႈ ယိပ်းတင်းတုင်း/ ၸွမ်ပိဝ်မၢၼ်ႈ၊ ၶႅပ်းႁၢင်ႈ ၸွမ်သိုၵ်းလူင် မိၼ်းဢွင်ႇလၢႆႇ ၸိူဝ်းၼႆႉသေဢွၵ်ႇၼႄၵၢင် ၵမ်ႉထႅမ် ၸုမ်းသိုၵ်းမၢၼ်ႈ ဢၼ်ယိုတ်းဢႃႇၼႃႇ။
ပၢင်ၼႄၵၢင်ၸႂ်ၵမ်ႉထႅမ်သိုၵ်းမၢၼ်ႈၼႂ်းမိူင်းသၢတ်ႇၼၼ်ႉမီးၵူၼ်းမွၵ်ႈ 2,000 ၵေႃႉ ၼိုင်ႈၵေႃႉ လႆႈငိုၼ်း မွၵ်ႈ 2,500 -3,000 ၵျၢပ်ႈ။ လဵင်ႉပႃးၶဝ်ႈထႅင်ႈ။ တီႈမိူင်းတူၼ်ၵေႃႈ ၵူၼ်းၵႂႃႇၼႄၵၢင်ၸႂ် ၼိုင်ႈၵေႃႉ လႆႈငိုၼ်း 5,000 ၵျၢပ်ႈ မၢင်ၸိူဝ်းလႆႈ 20,000 ၵျၢပ်ႈ( ဝၢၼ်ႈၼိုင်ႈလႄႈ ဝၢၼ်ႈၼိုင်ႈဢမ်ႇမိူၼ်ၵၼ်)။ တီႈမိူင်းၽျၢၵ်ႈသမ်ႉ ၼိုင်ႈၵေႃႉလႂ်လႆႈငိုၼ်း 6,000 ၵျၢပ်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ