ၵူၼ်းပၢႆႈၽေးသိုၵ်း တီႈၵျွၵ်ႉမႄးမီးႁဵင်ပၢႆ ပႆႇၸၢင်ႈပွၵ်ႈႁိူၼ်း

ၵူၼ်းပၢႆႈၽေးသိုၵ်း တီႈၵျွၵ်ႉမႄး ႁူဝ်ၵူၼ်း 1,000 ပၢႆ ထိုင်ယၢမ်းလဵဝ် ပႆႇၸၢင်ႈပွၵ်ႈႁိူၼ်းယေး   ၸုမ်းယိပ်းၵွင်ႈၵၢင်ႇၼင်ႇၵၼ် ၶဵင်ႈၶႅင်ၵၢၼ်သိုၵ်းတေႃႇၵၼ်ယူႇ ဝႃႈၼႆ။

တႄႇဢဝ် ၵၢင်လိူၼ်ၾႅပ်ႊၿိဝ်ႊရီႊ 2021 ၼႆႉမႃး ၸုမ်းဢူၺ်းလီပွတ်းႁွင်ႇ TNLA, SSPP တင်း RCSS ပဵၼ်ပၢင်တိုၵ်းၵၼ် ႁၢဝ်ႈႁႅင်း တၢင်းပွတ်းဢိူင်ႇတေႃႉသၢင်ႇ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ ၵူၼ်းမိူင်းပိုၼ်ႉတီႈ ႁူဝ်ၵူၼ်း 1,000 ပၢႆ လႆႈ ဢွၼ်ၵၼ်ပၢႆႈသွၼ်ႈတီႈဝတ်ႉၵၢင်ႉၵၢင်၊ ပၢင်ၸၢမ်လႄႈ တေႃႉသၢင်ႇ ၸိူဝ်းၼႆႉ ထိုင်ယၢမ်းလဵဝ် ပႆႇၸၢင်ႈပွၵ်ႈႁိူၼ်းယေး။

လုင်းၸၢႆးၵူး ၸုမ်းၼမ်ႉၶူင်း ၶႅၵ်ႇလီပၢင်ၸႃႉတႆး ဝဵင်းၵျွၵ်ႉမႄး လၢတ်ႈဝႃႈ -“တီႈၵျွၵ်ႉမႄး ႁဝ်းၶႃႈၼႆႉ တင်းမူတ်းၵူၼ်းပၢႆႈ ၽေးသိုၵ်း တေမီး 1,000 ပၢႆ။ မီး 3 တီႈ။ လွင်ႈၵိၼ်းၸႂ် ယၢပ်ႇၽိုတ်ႇတႄႉ တီႈပၢင်ၸၢမ် တင်းၵၢင်ႉၵၢင်တႄႉ ၵႃးမဵဝ်းႁိုဝ်ၵေႃႈၵႂႃႇမႃးလႆႈ တီႈတေႃႉသၢင်ႇၼၼ်ႉတႄႉ လိူဝ်သေ ၵႃးၽူဝ်းဝီးဝႃႇ၊ ၵႃးလၢႆႉထရႅၵ်ႉ ၵႃး ဢွၼ်ႇၸိူဝ်းၼႆႉၵူၺ်းၵႂႃႇမႃးလႆႈ ယွၼ်ႉပဵၼ်တၢင်းလွႆ၊ သဵၼ်ႈတၢၼ်းၵႅပ်ႈ၊ လွႆၸၼ်း။ ယွၼ်ႉၼၼ် လွင်ႈၶဝ်ႈၼမ်ႉတၢင်း ၵိၼ် တေႁွတ်ႈၽႅဝ်ၵူၼ်းပၢႆႈၽေးႁဝ်းၶႃႈသမ်ႉ ၶႂ်ႈယၢပ်ႇၽိုတ်ႇဝႆႉ ဢိတ်းၼိုင်ႈ”- ဝႃႈၼႆ။

ၵူၼ်းပၢႆႈၽေးသိုၵ်း တီႈၸႄႈဝဵင်းၵျွၵ်ႉမႄးၼႆႉ တီႈၵၢင်ႉၵၢင် ႁူဝ်ၵူၼ်းတေမီး 407 ၵေႃႉ၊ တီႈပၢင်ၸၢမ် 400 ပၢႆလႄႈ တီႈ တေႃႉသၢင်ႇ 347 ၵေႃႉ။ ၵူၼ်းမိူင်းဢၼ်ပၢႆႈမႃးသမ်ႉ ပဵၼ်ၵူၼ်းဝၢၼ်ႈၵွင်းလွင်းဝွင်း၊ တွင်ႇပလူဝ်ႉ၊ မၢၼ်ႈမႂ်ႇ၊ ၸႃႇပူဝ်ႉ၊ ၶူဝ် ဢုၼ်၊ တေႃႉသၢင်ႇလႄႈ ပႃႇၶႃး ၸိူဝ်းၼႆႉ။

လိူဝ်ၼၼ်ႉ တီႈၸႄႈဝဵင်းၼမ်ႉတူႈၵေႃႈ ၵူၼ်းပၢႆႈၽေးသိုၵ်း တိုၵ်ႉၵိုတ်းဝႆႉထႅင်ႈ 300 ပၢႆ ပႆႇၸၢင်ႈပွၵ်းႁိူၼ်းယေးမိူၼ်ၵၼ် ဝႃႈၼႆ။

ၽူႈၸွႆႇထႅမ် ၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈဝႃႈ – “တီႈမၢၼ်ႈၸၢမ် တင်း သွင်တီႈ ၵမ်မထၢၼ်း တင်း ၵျွင်းႁွင်ႇ တေမီးႁူဝ်ၵူၼ်း 100 ပၢႆ။ တီႈပူပ်ႉပႃႇရူင်ႇသမ်ႉ တေမီး 200 ပၢႆၼႆႉ။ ၵူၼ်းပၢႆႈၽေး တီႈမၢၼ်ႈၸၢမ်တႄႉ ပေႃးၵၢင်ဝၼ်းသမ်ႉ ပွၵ်ႈမိူဝ်းႁဵတ်းၵၢၼ်ၽႂ်မၼ်းသေ ပေႃးၵၢင်ၶမ်ႈၵေႃႈ မႃးၼွၼ်းတီႈဝတ်ႉ ၵၼ်။ ပၢင်တိုၵ်းတႄႉ ပဵၼ်ၵၼ်ၵူႈဝၼ်းၶႃႈဢေႃႈ။ ၸုမ်းဢူၺ်းလီ တင်း RCSS ”- ဝႃႈၼႆ။

ၵူၼ်းပၢႆႈၽေးသိုၵ်း ဢၼ်ပၢႆႈမႃးတီႈမၢၼ်ႈၸၢမ် ဝတ်ႉၵမ်မထၢၼ်းသမ်ႉ တေပဵၼ် ၵူၼ်းဝၢၼ်ႈၼႃးႁၢၼ်း၊ ၼႃးၵေး။ တီႈၵျွင်းႁွင်ႇသမ်ႉ တေပဵၼ် ၵူၼ်းဝၢၼ်ႈၼႃးၵႅင်း၊ ပဵင်းလူင်၊ ၵုၼ်ၵျွင်း၊ ၼမ်ႉပၢႆ ၸိူဝ်းၼႆႉ။

တီႈဝတ်ႉပူပ်ႉပႃႇရူင်ႇသမ်ႉ တေပဵၼ်ၵူၼ်းဝၢၼ်ႈဝႃႈ၊ ၼမ်ႉတွင်ႇၵုင်း၊ ဝၢၼ်ႈလွႆဝဵင်း ဢိၵ်ႇထႅင်ႈလၢႆဝၢၼ်ႈ ၸိူဝ်းၼႆႉ။

တီႈၸႄႈဝဵင်းသီႇပေႃႉၵေႃႈ မိူၼ်ၵၼ် တေႃႇထိုင်ယၢမ်းလဵဝ်ၵူၼ်းပၢႆႈၽေးသိုၵ်း ႁူဝ်ၵူၼ်းၼပ်ႉပၢၵ်ႇ ပႆႇၸၢင်ႈ ပွၵ်ႈႁိူၼ်းယေးၵၼ် ၼႆယဝ်ႉ။