ပၢင်ၼႄ ၵၢင်ၸႂ် တီႈဝဵင်းၶူဝ်လမ် ဝၼ်းမိူဝ်ႈၼႆႉ ၵူၼ်းၶဝ်ႈႁူမ်ႈ ဢွၼ်ႁူဝ် တူင်ႉၼိုင် သၢၼ်ၶတ်း သိုၵ်းမၢၼ်ႈ ယိုတ်းမိူင်း ၺႃးတီႉၵႂႃႇ 3 ၵေႃႉ။
“သိုၵ်းမၢၼ်ႈတႄႉ သႂ်ႇၶူဝ်း ၵူၼ်းၽၵ်းၵႃႇသေမႃးၸွမ်းၶဝ် ဢၼ်မႃး တဵၵ်းႁွင်ႉၶဝ်ၵႂႃႇ သမ်ႉပဵၼ် ပလိၵ်ႈမၢၼ်ႈ ၶဝ်ႈထၢမ်ၸွမ်းပွၵ်ႉ ၸုမ်းၵူၼ်းၼႄၵၢင်ၸႂ် ၸိူဝ်းၼၼ်ႉ ၽႂ်ပဵၼ်ၽူႈဢွၼ်ႁူဝ်ၼႆသေ မႃးတီႉၵႂႃႇဢေႃႈ”- ၼႆ ၵူၼ်းဝဵင်းၶူဝ်လမ် ၵေႃႉၼိုင်ႈလၢတ်ႈ။
ဢၼ်ၺႃးတီႉၼၼ်ႉ (1) ၵူဝ်ႇတၢၼ်ႇၶျွင်း ပွၵ်ႉ 1 ၊ (2) ၵူဝ်ၵလႃး ပွၵ်ႉၼိုင်ႈ တင်း (3) ၶူးမေႃယႃ တွၵ်ႊတိူဝ်ႊ ၸေႃးပျီႇၸူဝ်း ႁူင်းယႃလူင်ၵူၼ်းမိူင်း ဝဵင်းၶူဝ်လမ်။
ၵူၼ်းမိူင်းၶူဝ်လမ် ၼႄၵၢင်ၸႂ် မိူဝ်ႈၼႆႉ ပဵၼ်ဝၼ်းႁႅၵ်ႈ၊ တႄႇ ၼႄၵၢင်ၸႂ် တီႈ ႁူင်းႁဵၼ်း ၸၼ်ႉသုင် ပႆတၢင်း တေႃႇ ပေႃးႁွတ်ႈ ၵၢတ်ႇလူင် ဝဵင်းၶူဝ်လမ်။ ၵူၼ်းႁူမ်ႈၼႄ ၵၢင်ၸႂ် 200 ပၢႆ၊ ၾၢႆႇယူႇလီ၊ ၾၢႆႇပၢႆးပၺ်ႇၺႃႇ ၶႃႈႁၢပ်ႇၵၢၼ်ၶုၼ်ၵမ်ႈၽွင်ႈ ၶဝ်ႈႁူမ်ႈၸွမ်း။
တီႈဝဵင်းၼမ်ႉၸၢင်ၵေႃႈ ၸၢဝ်းမၢၼ်ႈ ယူႇပွၵ်ႉ 2 ၸိုဝ်ႈႁွင်ႉ ဢူးၵူဝ်ႇထူၺ်း ၼၼ်ႉၵေႃႈ ၺႃးတီႉ ၸုမ်းသိုၵ်းမၢၼ်ႈ တီႉၺွပ်းၵႂႃႇ ၼင်ႇၵဝ်ႇ။
