ၵူၼ်းမိူင်း မူႇၸေႊ မွၵ်ႈသႅၼ် ဢွၵ်ႇၼႄၵၢင်ၸႂ်သၢၼ်ၶတ်း သိုၵ်းမၢၼ်ႈယိုတ်းဢႃႇၼႃႇ ထုၵ်ႇပလိၵ်ႈ/ယေး ပိၵ်ႉဢိုတ်း သဵၼ်ႈတႃႈသၢႆတၢင်းပႅတ်ႈ 3 – 4 တီႈ ဝႃႈၼႆ။

မိူဝ်ႈၼႆႉ ဝၼ်းတီႈ 9/2/2021 ယၢမ်းၵၢင်ၼႂ် 8 မူင်း ၵူၼ်းမိူင်းမူႇၸေႊ ဢိၵ်ႇပႃး ႁွင်ႈၵၢၼ်ပၢႆးပၺ်ၺႃလႄႈ ႁွင်ႈၵၢၼ်ၾၢႆႇ ပႃႇမႆႉ ႁူမ်ႈၵၼ်ပႆတၢင်း ဢွၵ်ႇၼႄၵၢင်ၸႂ်သၢၼ်ၶတ်း တေႃႇသိုၵ်းမၢၼ်ႈယိုတ်းဢႃႇၼႃႇ ။ ၺႃးပလိၵ်ႈ/ယေး ပိၵ်ႉ ဢိုတ်းပႅတ်ႈသဵၼ်ႈတၢင်း တီႈပွၵ်ႉႁွင်ႇ၊ ႁူဝ်ၵၢတ်ႇ၊ တၢင်းၽႄၵမ်ႉၵေႃႇ ၸိူဝ်းၼႆႉ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႈႁူၺ်ႈလီႈ မူႇၸေႊ လၢတ်ႈဝႃႈ – “မိူဝ်ႈၼႆႉ ပလိၵ်ႈ ဢိုတ်းပႅတ်ႈသဵၼ်ႈတၢင်း ၵူၼ်းဢွၵ်ႇ ၼႄၵၢင်ၸႂ် တင်းမူတ်း မီး 4 တီႈ။ ဢွၼ်တၢင်း တေပဵၼ်တီႈပၢင်ႁိူဝ်းမိၼ် ၶဝ်ဢမ်ႇၶႂ်ႈပၼ်ၵူၼ်းၶွၼ်ႈတုမ်ၵၼ်၊ လိူဝ်ၼၼ်ႉ တီႈပွၵ်ႉႁွင်ႇတီႈၼိုင်ႈ၊ တီႈႁူဝ်ၵၢတ်ႇတီႈၼိုင်ႈလႄႈ တီႈတၢင်းၽႄၵၼ်ႉၵေႃႇ တီႈၼိုင်ႈၶႃႈ”- ဝႃႈၼႆ။

လွင်ႈပိၵ်ႉဢိုတ်းသဵၼ်ႈတႃႈသၢႆတၢင်း ၵူၼ်းမိူင်းၼႄၵၢင်ၸႂ် တီႈမူႇၸေႊၼႆႉ ပလိၵ်ႈတႄႇႁဵတ်း မိူဝ်ႈၼႆႉၵူၺ်း ။ မိူဝ်းဝႃးတႄႉ ဢမ်ႇပိၵ်ႉဢိုတ်း ဝႃႈၼႆ။

“တီႈပွၵ်ႉႁွင်ႇၼၼ်ႉတႄႉ ယူႇတီႈၵူၼ်းမိူင်းၼႄၵၢင်ၸႂ် တင်းပလိၵ်ႈငူပ်ႉငီႉၵၼ် ႁိုင်မွၵ်ႈ 15 မိၼိတ်ႉၼႆႉသေ ပလိၵ်ႈၶဝ် ၸင်ႇပိုတ်ႇပၼ်ၵႂႃႇၶႃႈ။ ပၢင်ၼႄၵၢင်ၸႂ်မိူဝ်ႈၼႆႉ ဢဵၼ်ႁႅင်းၵူၼ်းတိူဝ်းၼမ်လိူဝ်မႃးထႅင်ႈ မိူဝ်ႈဝႃးၶႃႈဢေႃႈ ႁူဝ်ၵူၼ်း ၶႂ်ႈၸမ် သႅၼ်ယဝ်ႉ ”- ၽူႈၶဝ်ႈႁူမ်ႈဢွၵ်ႇၼႄၵၢင်ၸႂ် တီႈမူႇၸေႊ ၵေႃႉၼိုင်ႈလၢတ်ႈၼင်ႇၼႆ။

ၼႂ်းပၢင်ၼႄၵၢင်ၸႂ် မိူဝ်ႈၼႆႉ ပႃးၶူးသွၼ်/မေႃသွၼ်ၼႂ်းႁူင်းႁဵၼ်း လူင်ပွင်ၸိုင်ႈလႄႈ ၾၢႆႇပႃႇမႆႉ ၸိူဝ်းၼႆႉ ၶဝ်ႈႁူမ်ႈၼမ် ၼႆယဝ်ႉ။

“မိူဝ်ႈဝႃးၼႆႉ သြႃႇမၶဝ် မႃးၶဝ်ႈႁူမ်ႈၼႄၵၢင်ၸႂ် တေမီးမွၵ်ႈ 50 ၼႆႉၵူၺ်း မိူဝ်ႈၼႆႉ ၶႂ်ႈဝႃႈ မႃးၵူႈႁူင်းႁဵၼ်းယဝ်ႉ။ ယဝ်ႉၵေႃႈ ၾၢႆႇပႃႇမႆႉၶဝ်ၵေႃႈ ၼုင်ႈၶူဝ်းၾၢႆႇပႃႇမႆႉၶဝ်သေ မႃးၶဝ်ႈႁူမ်ႈတင်းၼမ် ပႃးၵႃးမႃးၸွမ်း။ ၸုမ်းပၼ်ႇလူတ်ႇထိပ်ႇ၊ ၸုမ်းႁေႃႈ လူတ်ႉၶိူင်ႈ ၸိူဝ်းၼႆႉၵေႃႈ မႃးၶဝ်ႈႁူမ်ႈတင်းၼမ်ၶႃႈ”- ၽူႈၶဝ်ႈႁူမ်ႈၼႄၵၢင်ၸႂ်  သိုပ်ႇလၢတ်ႈၼႄၼင်ႇၼႆ။

ဝၢႆးသေ ပၢင်ၼႄၵၢင်ၸႂ်တီႈမူႇၸေႊၼႆႉ ယဝ်ႉၵႂႃႇလီငၢမ်းယဝ်ႉ မီးၶၢဝ်ႇဢွၵ်ႇမႃးဝႃႈ သိုၵ်းမၢၼ်ႈ ႁွင်ႉမေႃသွၼ် လႄႈ ၾၢႆႇ ပႃႇမႆႉၵမ်ႈၽွင်ႈၵႂႃႇ ၼႂ်းတပ်ႉသိုၵ်းမၢၼ်ႈ ဝႃႈၼႆ။

ၸၢႆးႁိၼ်လဵၵ်း သိုပ်ႇလၢတ်ႈဝႃႈ – “ဝၢႆးပၢင်ၼႄၵၢင်ၸႂ်ယဝ်ႉၵႂႃႇၼႆႉ လႆႈငိၼ်းၶၢဝ်ႇဝႃႈ ၸုမ်းမေႃသွၼ်ၵမ်ႈၽွင်ႈတင်း ၾၢႆႇပႃႇ မႆႉၵမ်ႈၽွင်ႈ ထုၵ်ႇသိုၵ်းမၢၼ်ႈႁွင်ႉၵႂႃႇၼႂ်းတပ်ႉၼႆၶႃႈ။ ယဝ်ႉၵေႃႈ ဢူးတွင်းထုၼ်းၶဝ် ဢူးသၢၼ်းသၢၼ်းထူၺ်းလႄႈ ၸၢႆး ထုၼ်းၵူဝ်ႇၵူဝ်ႇ ၸိူဝ်းၼႆႉ ထုၵ်ႇတီႉဝႆႉၼႆၶႃႈ ၶေႃႈမုလ်းဢၼ်ၼႆႉတႄႉ ႁဝ်းၶႃႈ ပႆႇယိုၼ်ယၼ်ၶႃႈ လႆႈငိၼ်းဝႆႉၸိူင်ႉၼႆၶႃႈ”- ဝႃႈၼႆ။

ၼွၵ်ႈလိူဝ်ၼၼ်ႉ တီႈသိုဝ်ႇၶၢဝ်ႇ Tachileik News Agency ၵေႃႈ ဢွၵ်ႇမႃး မိူဝ်ႈၼႆႉ ဝၼ်းတီႈ 9 ယၢမ်းၵၢင်ၼႂ် ပလိၵ်ႈ/ယေး ၶဝ်ႈတီႉၺွပ်းဢဝ် ၽူႈဢွၼ်ႁူဝ်သၢၼ်ၶတ်း သိုၵ်းမၢၼ်ႈယိုတ်းဢမ်းၼၢတ်ႈ ၼႂ်းမိူင်းတႆး 4 ၵေႃႉ။ ဢူးတိၼ်ႇသူၺ်ႇ ႁူဝ်ပဝ်ႈ ၸုမ်းၸွႆႈထႅမ်တူင်ႇဝူင်းၵူၼ်း မိၵ်ႉသိၵ်ႉမ တင်း ဢူးၵျေႃႇမိၼ်ႉ ၽူႈၶဝ်ႈၸုမ်း NLD ၸႄႈဝဵင်းတႃႈၶီႈလဵၵ်း၊ မၶျေႃး ၸႄႈဝဵင်း ၵဵင်းတုင်လႄႈ ၵူဝ်ႇမိၼ်ႉထေး ၵူၼ်းတူၵ်းၶွၵ်ႈ ၵၢၼ်မိူင်းၵဝ်ႇ ၸိုင်ႈတႆးပွတ်းၸၢၼ်း ၼႆယဝ်ႉ။