ၸုမ်းလူင်ပွင်ၸိုင်ႈမိူင်းတႆး ဢၼ်ထုၵ်ႇသိုၵ်းမၢၼ်ႈ ႁွင်ႉၵုမ်း/ ၵၵ်းတူဝ် ဝႆႉတီႈတပ်ႉတိူင်း ယပၶတူၼ်ႈတီး ဝၼ်းယိုတ်းဢမ်းၼၢတ်ႈဝၢၼ်ႈမိူင်းၼၼ်ႉ     မိူဝ်ႈၼႆႉယၢမ်းၵၢင်ဝၼ်း ၶိုၼ်းပွႆႇပၼ်ၶိုၼ်းၵူႈၵေႃႉယဝ်ႉ ။

မိူဝ်ႈဝႃး ဝၼ်းတီႈ 1/2/2021 ယၢမ်းၵၢင်ၼႂ်ၸဝ်ႉ သိုၵ်းမၢၼ်ႈ  ႁွင်ႉၵုမ်း/ ၵၵ်းတူဝ် ၸွမ်ၽွင်းလူင်ၸိုင်ႈတႆးဢိၵ်ႇ ၽွင်းလူင် ၸုမ်းလူင်ပွင်ၸိုင်ႈမိူင်းတႆးၵႂႃႇၵုမ်းၵၵ်းတူဝ်ဝႆႉတီႈ   တပ်ႉတိူင်းသိုၵ်းယပၶ  တူၼ်ႈတီး ၸိုင်ႈတႆး ပွတ်းၸၢၼ်း။  ဝၢႆးလင် ၵုမ်းၵၵ်းတူဝ်ဝႆႉဝၼ်းၼိုင်ႈယဝ်ႉ မိူဝ်ႈၼႆႉယၢမ်းၵၢင်ၼႂ် တႄႇပွႆႇတူဝ် ၽွင်းလူင်မႃးၵမ်းဢိတ်းဢိတ်း ထိုင်ယၢမ်းဝၢႆးဝၼ်း ပွႆႇပႃးတူဝ် ၸွမ်ၽွင်းလူင်ၸိုင်ႈတႆး တွၵ်ႊတိူဝ်ႊလိၼ်းထုတ်ႉ ယဝ်ႉဝႃႈၼႆ။

“ယၢမ်းဝၢႆးဝၼ်းၼႆႉ ၶဝ်ပွႆႇပၼ်မူတ်းယဝ်ႉ။ ပႃးတင်းတူဝ်ၸွမ်ၽွင်းလူင် ၸႄႈမိူင်းတႆး ၻွၵ်ႊတိူဝ်ႊလိၼ်းထုတ်ႉ၊ ၽွင်းလူင်ၾၢႆႇငိုၼ်းတွင်းလႄႈ ပၢႆးမၢၵ်ႈ မီး ဢူးသူဝ်းၺုၼ်ႉလုၼ်ႇလႄႈ ၽွင်းလူင် ၾၢႆႇၾႆးၾႃႉ ၸၢႆးသၢမ်တိပ်ႉလူင် ၸိူဝ်း ၼႆႉပွႆႇပၼ်ၶိုၼ်းမူတ်းယဝ်ႉ” – ၽူႈတူင်ႉၼိုင် ၼႂ်း ၵၢၼ်မိူင်း တီႈတူၼ်ႈတီး လၢတ်ႈၼႄၼင်ႇၼႆ။

မိူဝ်ႈဝႃး ယၢမ်းၵၢင်ၶမ်ႈသမ်ႉ ပွႆႇပၼ်တူဝ်ၽွင်းလူင် ၾၢႆႇလိူမ်ႈလႆႇ ၸႄႈမိူင်းတႆး ၸၢႆးသူမ်ၶျၢႆး တင်း  ၽွင်းလူင်ၾၢႆႇ ၾိင်ႈတိုၼ်းပဵၼ်လႄႈသိင်ႇဝႅတ်ႉလွမ်ႉ ၻွၵ်ႊတိူဝ်ႊၺီႇၺီႇဢွင်ႇ  ၶဝ် လႆႈႁူႉၼင်ႇၼႆ။  

ယၢမ်းလဵဝ် ဢႃႇၼႃႇလူင်ပွင်ၸိုင်ႈမိူင်းႁူမ်ႈတုမ်တင်းမူတ်းၼႆႉ ပဵၼ်သိုၵ်းမၢၼ်ႈ   ယိပ်းၵမ်ဝႆႉ တင်းမူတ်း ။  

တႃႇႁႂ်ႈပွႆႇပၼ်ပၼ်ပႃးတူဝ် တေႃႇဢွင်ႇသၢၼ်းၸူႉၵျီႇလႄႈ ၸွမ်ၸိုင်ႈ ဢူးဝိၼ်းမျိၼ်ႉ ၶဝ်ၼႆသေ ၵူၼ်းမိူင်းႁူမ်ႈတုမ် ဢၼ်ႁွတ်ႈထိုင်ၼွၵ်ႈမိူင်းလၢႆလၢႆမိူင်း မိူၼ်ၼင်ႇမိူင်းထႆး မိူင်းၵျပၼ်ႊ မိူင်းဢေႃႊသတေႊလျႃႊ ၸိူဝ်းၼႆႉ ဢွၼ်ၵၼ်တုၵ်းယွၼ်းၼႄၵၢင်ၸႂ်ၼႃႈလုမ်းတၢင်မၢၼ်ႈ ဢၼ်ပၵ်းလုမ်းဝႆႉတီႈမိူင်းၽႂ်မၼ်း။

ၼႂ်းမိူင်းႁူမ်ႈတုမ်တႄႉ သိုၵ်းမၢၼ်ႈဢဝ်ႁႅင်းသိုၵ်း  ၶဝ်ႈဢဝ်တီႈယူႇဝႆႉၼႂ်းဝဵင်းယႂ်ႇဝဵင်းလူင်၊ မိူဝ်ႈၼႆႉဝၼ်းတီႈ 2/2/2021 ယၢမ်းၵၢင်ဝၼ်းယင်းဢဝ်ရူတ်ႉၵႃးတၢင်ႇသိုၵ်းလူင်းၵၢင်ဝဵင်းတူၼ်ႈတီး၊ ႁေႃႈၶိူင်ႈမိၼ်မႅင်းမီႈပၼ်ႇၼိူဝ်ဝဵင်းလႄႈ ၵူၼ်းမိူင်းတူၵ်းၸႂ်ယုပ်းၽၢၼ်ႈ  ဢမ်ႇႁတ်းဢွၵ်ႇႁိူၼ်း။