သဵၼ်ႈတၢင်းၶဝ်ႈဢွၵ်ႇဝဵင်း ၼႂ်းမိူင်းတႆး လၢႆတီႈလႄႈ ၸွမ်းလႅၼ်လိၼ် သိုၵ်းမၢၼ်ႈ ပိၵ်ႉဢိုတ်း ဢမ်ႇပၼ်ၶဝ်ႈဢွၵ်ႇၵႂႃႇမႃး ။
မိူဝ်ႈၼႆႉ ဝၼ်းတီႈ 1/2/2021 ယၢမ်းၵၢင်ၼႂ်ၸဝ်ႉမွၵ်ႈ 5 မူင်းၶိုင်ႈ သိုၵ်းမၢၼ်ႈ ဢဝ်တီႈယူႇဝႆႉ ၸွမ်းတၢင်းၶဝ်ႈဢွၵ်ႇဝဵင်း ၼႂ်း မိူင်းတႆး ပဵၼ်လၢႆတီႈ ႁၢမ်ႈၵူၼ်းမိူင်း ၶဝ်ႈဢွၵ်ႇၵႂႃႇမႃး မိူၼ်ၼင်ႇၼႂ်းၸႄႈဝဵင်းမူႇၸေႊ၊ လႃႈသဵဝ်ႈ၊ တူၼ်ႈတီးလႄႈ တႃႈၶီႈ လဵၵ်း ၸဵမ်ၸိူဝ်းၼႆႉ။
ၵူၼ်းမူႇၸေႊ လၢတ်ႈဝႃႈ – “မိူဝ်ႈၼႆႉ ယၢမ်းၵၢင်ၼႂ် 5 မူင်းၶိုင်ႈ တီႈၶူဝ်ပၢင်ႇၶမ်းတႄႉ သိုၵ်းမၢၼ်ႈ ပိၵ်ႉတၢင်းပႅတ်ႈ ဢမ်ႇ ပၼ်ၵူၼ်းၶဝ်ႈဢွၵ်ႇၵႂႃႇမႃး၊ ၾူၼ်းၵေႃႈတိတ်းတေႃႇၵၼ်တိုၼ်း ဢမ်ႇလႆႈၶႃႈ။ လႆႈၸႂ်ႉ WiFi ဢဝ်ၵူၺ်းဢေႃႈ၊ ယဝ်ႉ ၵေႃႈ လၢႆးၾူၼ်းတၢင်းမိူင်းၶႄႇၵေႃႈ ဢမ်ႇလႆႈၶႃႈ”- ဝႃႈၼႆ။
လိူဝ်ၼၼ်ႉ မိူၼ်ၼင်ႇ တၢင်းလႅၼ်လိၼ်တႆး – ထႆး တီႈၶူဝ်မိုတ်ႈၵိုဝ်းမၢႆ 2 သဵၼ်ႈတၢင်းတေႃႉၶူဝ်းၵုၼ်ႇၶဝ်ႈဢွၵ်ႇမိူင်းတႆး – မိူင်းထႆး တီႈတႃႈၶီႈလဵၵ်းၵေႃႈ ထုၵ်ႇပိၵ်ႉဢိုတ်းမိူၼ်ၵၼ် ။
ၵူၼ်းတႃႈၶီႈလဵၵ်း လၢတ်ႈဝႃႈ – “ယၢမ်းလဵဝ် ၼႂ်းၸႄႈဝဵင်းတႃႈၶီႈလဵၵ်းၼႆႉ ၶႂ်ႈဝႃႈ သုၵ်ႉသၵ်ႉဝႆႉၶႃႈဢေႃႈ။ ပဵၼ်သိုၵ်းမၢၼ်ႈၵႂႃႇမူတ်း။ တူင်ႉၼိုင် ဢဝ်တီႈယူႇဝႆႉ ၸွမ်းၼႂ်းဝဵင်း ။ ၵူၼ်းမိူင်းၵမ်ႈၼမ် ဢမ်ႇႁတ်း ဢွၵ်ႇႁိူၼ်း ။ ၶူဝ်မၢႆ 2 ၼၼ်ႉၵေႃႈ ၶဝ်ဢိုတ်းပႅတ်ႈယဝ်ႉ ဢမ်ႇပၼ် ၶူဝ်းၵုၼ်ႇၶဝ်ႈဢွၵ်ႇၵႂႃႇမႃးယဝ်ႉ။ ၼွၵ်ႈလိူဝ်ၼၼ်ႉ တီႈလၢၼ်ႇမၢၵ်ႇယၢင်း ၼႂ်းၵႄႈ တႃႈၶီႈလဵၵ်း – ၵဵင်းတုင် ၼၼ်ႉၵေႃႈ ပိၵ်ႉယဝ်ႉၶႃႈ”- ဝႃႈၼႆ။
လိူဝ်ၼၼ်ႉ မိူၼ်ၼင်ႇ ဝဵင်းလႃႈသဵဝ်ႈ – တူၼ်ႈတီး -လွႆလႅမ်- ပၢင်လူင်-လၢႆးၶႃႈ -ၵေးသီး-မိူင်းသူႈ ၸိူဝ်းၼၼ်ႉၵေႃႈ ဢဝ်တီႈယူႇဝႆႉၼွၵ်ႈဝဵင်းၼႂ်းဝဵင်း ။ မၢင်တီႈၵေႃႈဢမ်ႇပၼ်ၵႂႃႇမႃးၶဝ်ႈဢွၵ်ႇ မၢင်တီႈၵေႃႈ ၵူၼ်းဝၢၼ်ႈၵူၼ်းသူၼ် ၵႂႃႇသူၼ်ၵႂႃႇႁိူၵ်ႈၶဝ်ႈဢွၵ်ႇတႄႉလႆႈယူႇ ဝႃႈၼႆ။
ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီႈ လၢတ်ႈဝႃႈ – “လွင်ႈပိၵ်ႉဢိုတ်းတၢင်းၶဝ်ႈဢွၵ်ႇဝဵင်းၼႆႉ ၶႂ်ႈဝႃႈ ပိၵ်ႉဢိုတ်းၵူႈၸႄႈ ဝဵင်းၵူႈတီႈၶႃႈယူဝ်ႉ။ ယၢမ်းလဵဝ် လၢႆးၾူၼ်း ၼႂ်းမိူင်းၼႆႉ သိုပ်ႇဢမ်ႇလႆႈသေဢၼ်ၶႃႈ”- ဝႃႈၼႆ။
မိူဝ်ႈၼႆႉ ယၢမ်းၵၢင်ၼႂ်ၸဝ်ႉ သိုၵ်းမၢၼ်ႈ ၶဝ်ႈတီႉၺွပ်း ၽူႈၼမ်းၸုမ်း ပႃႇတီႇ ၼူၵ်ႉယုင်း NLD ဝႆႉ။ ၼႂ်းၼၼ်ႉ ပႃးၸွမ်ၸိုင်ႈ ဢူးဝိၼ်းမိၼ်ႉ တင်း ၽူႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းသူႉၵျီႇ ။ ၸွမ်ၽွင်းလူင်ၸႄႊမိူင်ႊလႄႈတိူင်း ၵမ်ႈၽွင်ႈ ၊ ႁူဝ်ပဝ်ႈပႃႇတီႇၸႄႈဝဵင်းၸိူဝ်းၼႆႉၵေႃႈပႃး ၊ ၽူႈတႅမ်ႈ လိၵ်ႈလႄႈၽူႈႁဵတ်းၵၢၼ်ပၢႆးမွၼ်း ၸိူဝ်းၵမ်ႉထႅမ်ပႃႇတီႇၼူၵ်ႉယုင်း NLD ၵေႃႈၺႃးတီႉၺွပ်းၵုမ်းၶင်ဝႆႉ။
