တပ်ႉသိုၵ်းၸိုင်ႈတႆး RCSS တင်း သိုၵ်းမၢၼ်ႈ ပဵၼ်ပၢင်တိုၵ်းၵၼ် ၼႂ်းၸႄႈဝဵင်းမိူင်းပၼ်ႇ  သွင်ဝၼ်းထပ်း ၵၼ်  ၵူၼ်းမိူင်းတူၵ်းၸႂ်ၵူဝ်ႁႄ။

မိူဝ်ႈၼႆႉ ဝၼ်းတီႈ 1/2/2021 ယၢမ်းၵၢင်ၼႂ် 7:50 ထိုင် 8:00 မူင်း သိုၵ်းမၢၼ်ႈ တပ်ႉ ၶလယ 99 ႁႅင်းၵူၼ်း 35 ၵေႃႉ ပဵၼ်ပၢင် တိုၵ်းၵၼ်တင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်း ၸိုင်ႈတႆး RCSS/SSA ဢဵၼ်ႁႅင်းမွၵ်ႈ 10 ၵေႃႉ တီႈၸဵင်ႇၸၢၼ်း ဝၼ်းဢွၵ်ႇ ဝၢၼ်ႈၼွင်လိူဝ်ႇ (ယၢၼ်မွၵ်ႈ 1 ၵီႇလူဝ်ႇၶိုင်ႈ) ၼႂ်းၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်း ၸၢၼ်း ။

ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈဝႃႈ – “မိူဝ်ႈၼႆႉ ပဵၼ်ပၢင်တိုၵ်းၵၼ် ၸဵမ်ၸဝ်ႉ သိုၵ်းမၢၼ်ႈဢဵၼ်ႁႅင်း 35 ၵေႃႉ သိုၵ်းႁဝ်းသမ်ႉ ဢဵၼ်ႁႅင်းမွၵ်ႈ 10 ၵေႃႉ ယိုဝ်းၵၼ်တီႈၸဵင်ႇၸၢၼ်းဝၼ်းဢွၵ်ႇၼွင်လိူဝ်ႇ။ တီႈပၢင်တိုၵ်းၼၼ်ႉ ၾၢႆႇ ႁဝ်းၶႃႈ ဢမ်ႇမီးလွင်ႈလူႉသုမ်းသင်။ ၾၢႆႇသိုၵ်းမၢၼ်ႈတႄႉ တိုၵ်ႉၵူတ်ႇထတ်းဝႆႉယူႇ ၶဝ်ထွႆပၢႆႈၵႂႃႇတၢင်းႁွင်ႇ ဢွင်ႈတီႈ ပဵၼ်ပၢင်တိုၵ်းၼၼ်ႉယဝ်ႉ”- ဝႃႈၼႆ။

မိူဝ်ႈဝႃး ဝၼ်းတီႈ 31/1/2021 ယၢမ်းႁူဝ်ၶမ်ႈ 5:45 မူင်းၼၼ်ႉၵေႃႈ သိုၵ်းမၢၼ်ႈ ၶလယ 99 လၢင်းၶိူဝ်း ၽႃႇၺႃးၵၼ်ၼႂ်းၵႄႈ ၼွင်လိူဝ်ႇလႄႈ မႆႉပူၵ်ႇ ႁိမ်းလွႆမူၼ်းလႄႈ ၶူင်ႈလႅင်ၼၼ်ႉ လႆႈပဵၼ်ပၢင်တိုၵ်းၵၼ်ႁိုင် 5 မိၼိတ်ႉ ၸဝ်ႈႁၢၼ် ၶမ်း ၸၢမ်ႇ  လၢတ်ႈ။

တီႈႁွင်ႈၵၢၼ်ပိုၼ်ၽၢဝ်ႇ RCSS တႆးလွတ်ႈလႅဝ်း ၵေႃႈဢွၵ်ႇဝႆႉဝႃႈ  သိုၵ်းမၢၼ်ႈ ၶလယ 99 ဢဝ်ႁႅင်းသိုၵ်း တင်းၼမ် ၶဝ်ႈတူင်ႉၼိုင် ၼႂ်းၼႃႈလိၼ် တပ်ႉသိုၵ်းၸိုင်ႈတႆး RCSS/SSA လူၺ်ႈဢမ်ႇပွင်ႇလႅင်းၸူး လုမ်းၵပ်းသၢၼ် RCSS ယွၼ်ႉၼၼ် သွင်ၾၢႆႇၽႃႇၺႃးၵၼ်သေ ပိုတ်းယိုဝ်းၵၼ်ၵမ်းၼိုင်ႈ ၼႆယဝ်ႉ။

မိူဝ်ႈဝၼ်းတီႈ 25/1/2021 သိုၵ်းမၢၼ်ႈ ၶမယ 575 ႁႅင်းၵူၼ်း မွၵ်ႈ 60 ၵေႃႉ ၶိုၼ်ႈယိုဝ်း တပ်ႉသိုၵ်းၸိုင်ႈတႆး RCSS တီႈႁိမ်း ဝၢၼ်ႈမိူင်းႁွင်း ဢိူင်ႇၼမ်ႉတိုင်း ၸႄႈဝဵင်းမိူင်းပၼ်ႇ၊ ၼႂ်းပၢင်တိုၵ်းၼၼ်ႉ သိုၵ်းမၢၼ်ႈ လူႉတၢႆ 3 ၵေႃႉ မၢတ်ႇၸဵပ်းႁၢဝ်ႈႁႅင်း 4 ၵေႃႉ ၼႂ်းႁွင်ႈၵၢၼ်ပိုၼ်ၽၢဝ်ႇ RCSS ဢွၵ်ႇဝႆႉၼင်ႇၼႆ။

ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ပဵၼ်ၸုမ်းၵိုတ်းတိုၵ်း ပတ်းပိုၼ်ႉတူဝ်ႈမိူင်း NCA ဝႆႉ ၸုမ်း ၼိုင်ႈ။ ၼႂ်းၸုမ်းယိပ်းၵွင်ႈၵၢင်ႇ 10 ၸုမ်း လူင်းလၢႆးမိုဝ်း NCA ၼႆႉ သိုၵ်းမၢၼ်ႈပိုတ်ႇပၢင်တိုၵ်းၸူး သိုၵ်း RCSS တင်း KNU ၼမ်လိူဝ်တီႈသုတ်း ၼႆယဝ်ႉ။