ဝၼ်းတီႈ 27/1/2021 ပူၼ်ႉမႃး ၸုမ်း Shan State Ethnic Youth Federation ဢၼ်မီးၵူၼ်းၼုမ်ႇ 30 ၸုမ်း ၶဝ်ႈပႃးဝႆႉၼၼ်ႉတုၵ်းယွၼ်း လူင်ပွင်ၸိုင်ႈ ႁႂ်ႈၵိုတ်းၶူင်းၵၢၼ်လူင် တူင်ႇဝူင်းဝၢၼ်ႈဢိူင်ႇၵၼ်းယဵၼ်ႁုၼ်ႈမုၼ်း ဢၼ်တေၸႂ်ႉ ၸၢႆႇငိုၼ်း 225 လၢၼ်ႉတေႃႇလႃႇ (ဢၼ်ဢဝ်မႃးတီႈ ယေးငိုၼ်းလုမ်ႈၾႃႉ) ၼၼ်ႉဝႆႉၵမ်းၼိုင်ႈဝႃႈၼႆ။

 ၶူင်းၵၢၼ်လူင်ဢၼ်လူင်ပွင်ၸိုင်ႈတေႁဵတ်းၼၼ်ႉပဵၼ် ၶူင်းၵၢၼ်ၵေႃႇသၢင်ႈယုၵ်ႉမုၼ်းဝၢၼ်ႈဢိူင်ႇပဵၼ်ၸၼ်ႉဝဵင်း၊ ၶူင်းၵၢၼ်လွင်ႈၽုၵ်ႇသွမ်ႈ ၸိူဝ်းၼႆႉ။

ၶူင်းၵၢၼ်ၼႆႉၵွၼ်ႇၼႃႈၼႆႉ လူင်ပွင်ၸိုင်ႈဢၢင်ႈၶိုင်တၢင်းမိူင်းယၢင်း၊ ယၢင်းလႅင်လႄႈမွၼ်း။ ၵူၺ်းၵႃႈ ၸုမ်းယိပ်းၵွင်ႈၵၢင်ႇပိုၼ်ႉတီႈ ဢမ်ႇၽွမ်ႉၸွမ်းလႄႈ ၸင်ႇလႆႈၶၢႆႉၶူင်းၵၢၼ်ၼႆႉမႃးႁဵတ်းၼႂ်းမိူင်းတႆး။ ယၢမ်းလဵဝ် လူင်ပွင်ၸိုင်ႈၶိုင်လွင်ႈလိၵ်ႈၵိၼ်ၵႅၼ်ႇတင်းၶွမ်ႊပၼီႊ ယဝ်ႉယႃႇ 90% ယဝ်ႉသေ တိုၵ်ႉတေဢၢၼ်းလူင်းပိုၼ်ႉတီႈဢုပ်ႇၵုမ်တင်းၸုမ်းယိပ်းၵွင်ႈၵၢင်ႇၼႂ်းပိုၼ်ႉတီႈယူႇၼႆ ၶုၼ်ႇဢူး ႁူဝ်ပဝ်ႈၸုမ်းၵူၼ်းၼုမ်ႇပဢူဝ်းလၢတ်ႈ။

“ၶဝ်တေဢၢင်ႈဝႃႈ ႁဵတ်းလွင်ႈႁုၼ်ႈမုၼ်းမႂ်ႇသုင်ပိုၼ်ႉတီႈၼႆသေ  တေၸၢင်ႈမီးမႃးပၼ်ႁႃ ယိုတ်းတီႈလိၼ်ၵူၼ်းမိူင်းလၢႆ၊ ၶုတ်းၶူဝ်းပူၺ်ႈႁိၼ်ႁႄႈ၊ ယႃႉပႃႇထိူၼ်ႇမူၺ်ႉ၊ ယႃႉၾိင်ႈယူႇသဝ်းၵူၼ်းပိုၼ်ႉတီႈ၊ ပူၼ်ႉပႅၼ်သုၼ်ႇလႆႈၵူၼ်း၊ လိုပ်ႈႁေႃႈၶၢႆႉပၢႆႈဝၢၼ်ႈဢိူင်ႇပိုၼ်ႉတီႈၸဝ်ႈၵဝ်ႇၸိူဝ်းၼႆႉသေ  ၸၢဝ်းၶိူဝ်းၼႂ်းမိူင်းတႆးႁဝ်းၶႃႈတေလႆႈတုၵ်ႉၶ ယၢပ်ႇၽိုတ်ႇ။ ဢၼ်တေမၢၵ်ႈမီးလီပဵၼ်သမ်ႉပဵၼ်ၵူၼ်းမူႇဢွၼ်ႇၸုမ်းဢွၼ်ႇၼၼ်ႉၵူၺ်း။  ၶူင်းၵၢၼ်ၼႆႉဢမ်ႇၸႂ်ႈ ဢဝ်ၵၢင်ၸႂ်ၸၢဝ်းၶိူဝ်းၼႂ်းပိုၼ်ႉတီႈသေယဝ်ႉပဵၼ်ၽႅၼ်ၵၢၼ်ဢၼ်လူင်ပွင်ၸိုင်ႈတမ်းဝႆႉၵမ်းလဵဝ်။  ၵွပ်ႈၼႆႁဝ်းၶႃႈတေႁူမ်ႈၵၼ်တင်းၸုမ်းတူင်ႇဝူင်းၵူၼ်းၼႂ်းပိုၼ်ႉတီႈသေ တေသၢၼ်ၶတ်းဢၼ်ၶဝ်တိုၵ်ႉၶိုင်တေဢုပ်ႇၸုမ်းယိပ်းၵွင်ႈၵၢင်ႇၼႂ်းပိုၼ်ႉတီႈၼႆႉၵႂႃႇ ” – ၶုၼ်ႇဢူးလၢတ်ႈတီႈၶၢဝ်ႇ  ယၼ်ႇၵုင်ႇၶိတ်ႉတိတ်ႉမီႊတီႊယႃႊၼင်ႇၼႆ။

 ၸုမ်း Shan State Ethnic Youth Federation ၼႆႉ မီးဝႆႉၸုမ်းၵူၼ်းၼုမ်ႇၼႂ်းမိူင်းတႆး ဢၼ်ပဵၼ်ၵူၼ်းၼုမ်ႇတႆး၊ လႃးႁူႇ၊ ဢၶႃႇ၊ ၼွင်၊ ဝႃႉ၊ ၵဝ်ႈၵၢင်ႉ၊ တွင်ႇလိူဝ်း၊ ၵယၢၼ်း၊ ၶၢင်၊ ပဢူဝ်း၊ တဢၢင်းလႄႈ ထၼု ၸိူဝ်းၼႆႉ။

 ငဝ်းလၢႆးၵၢၼ်မိူင်းယၢမ်းလဵဝ် တိုၵ်ႉသုၵ်ႉသၵ်ႉယူႇ၊ ပႆႇၵႄႈၶႆပၼ်ႁႃၵၢၼ်မိူင်းလႆႈသင်၊  သင်ဝႃႈ ႁဵတ်းၶူင်းၵၢၼ်ယေးငိုၼ်းလုမ်ႈၾႃႉၼႆႉၵႂႃႇၸိုင်  မၢႆမီႈတီႈလိၼ်လႄႈ မၢႆမီႈၶုတ်းႁႄႈၶုတ်းၶမ်း ၸိူဝ်းၼႆႉၵေႃႈ တေဢမ်ႇၵႅတ်ႇၵင်ႈပၼ်ၵူၼ်းပိုၼ်ႉတီႈလႆႈ။ ၵွပ်ႈၼႆ ၸူဝ်ႈပႆႇၵႄႈလိတ်ပၼ်ႁႃၵၢၼ်မိူင်းယဝ်ႉၼႆႉ  တေတုၵ်းယွၼ်းႁႂ်ႈၶူင်းၵၢၼ်လူင်ၼႆႉၵိုတ်းဝႆႉႁႂ်ႈလႆႈ ၸုမ်းၵူၼ်းၼုမ်ႇ Shan State Ethnic Youth Federation တႄႉလၢတ်ႈၼင်ႇၼႆ။