တီႈတူၼ်ႈတီး တႄႇသမ်းယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ပၼ်ၸုမ်းၾၢႆႇမေႃယႃ ၽူႈၸွႆႈမေႃယႃ တႃႇႁူဝ်ၵူၼ်းႁဵင်ပၢႆ။
မိူဝ်ႈၼႆႉ ဝၼ်းတီႈ 28/1/2021 ယၢမ်းၵၢင်ၼႂ် 9 မူင်း တီႈႁူင်းယႃလူင် ၸဝ်ႈၸၢမ်ႇထုၼ်း တင်း ႁူင်းယႃလူင်မႄႈလႄႈလုၵ်ႈ ဢွၼ်ႇ ၼႂ်းၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း တႄႇသမ်းယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ပၼ် ၽူႈႁၢပ်ႇၵၢၼ် ၾၢႆႇပၢႆး ယူႇလီၵႂႃႇ ၼႆယဝ်ႉ။
Dr. တူႇသႃႇၶျိတ်ႉတိၼ်ႇ ၽူႈၵွၼ်းႁွင်ႈၵၢၼ်ၾၢႆႇယူတ်းယႃပၢႆးယူႇလီ ၵူၼ်းမိူင်း ၸႄႈ မိူင်းတႆး လၢတ်ႈဝႃႈ – “တႄႇမိူဝ်ႈၼႆႉ ၵႂႃႈ တီႈဝဵင်းတူၼ်ႈတီးတႄႉ တႄႇသမ်းယႃ ႁႄႉ ၵင်ႈၶူဝ်ႊဝိတ်ႉ 19 ပၼ်မေႃယႃလႄႈ ၽူႈၸွႆႇမေႃယႃၵႂႃႇ တီႈႁူင်းယႃလူင် ၸဝ်ႈၸၢမ်ႇ ထုၼ်းတႄႉ တေမီးသဵၼ်ႈမၢႆ 600 ပၢႆ။ တီႈႁူင်းယႃ မႄႈလႄႈလုၵ်ႈဢွၼ်ႇတႄႉ တေ မီးႁူဝ်ၵူၼ်း 300 ပၢႆ”- ဝႃႈ ၼႆ။
ယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼႆႉ ႁွတ်ႈထိုင်မိူင်းတႆး မိူဝ်ႈဝၼ်းတီႈ 27/1/2021 မိူဝ်ႈဝႃး ၼႆႉ တႃႇ 564 တဝ်ႈ။ ၼိုင်ႈ တဝ်ႈသမ်းပၼ်လႆႈ 10 ၵေႃႉ၊ ၼိုင်ႈၵေႃႉလႂ် တေလႆႈသမ်း 2 ပွၵ်ႈ ဝႃႈၼႆ။
“ယႃႁႄႈၵင်ႈတၢင်းပဵၼ်ၶူဝ်ႊဝိတ်ႉ 19 ၼႆႉ သင်ပဵၼ်မႄႈမၼ်း/ ပုမ်ယႂ်ႇ၊ မႄႈလဵင်ႉၼူမ်း လုၵ်ႈဢွၼ်ႇ၊ ၵူၼ်းႁႅင်းဢေႇလႄႈ ဢႃ ယုဢမ်ႇတဵမ် 18 ပီ ၸိူဝ်းၼႆႉ ပႆႇထုၵ်ႇလီသမ်း” – ၼႆ Dr. တူႇသႃႇၶျိတ်ႉတိၼ်ႇ သိုပ်ႇလၢတ်ႈၼႄၼင်ႇၼႆ။
ယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼႆႉ မိူင်းၵြႃးဢိၼ်ႊတီႊယိူဝ်ႊ တွၼ်ႈပၼ်မိူင်းယူႇႁိမ်းၵိၼ်ၸမ်ၶဝ် လၢႆလၢႆမိူင်း၊ တွၼ်ႈတႃႇ ၵူၼ်းမိူင်းမၢၼ်ႈၵေႃႈ ပွၵ်ႈဢွၼ်တၢင်းသုတ်း လႆႈႁပ်ႉ 1.5 လၢၼ်ႉလွတ်ႇ တေၵုမ်ႇတႃႇႁူဝ်ၵူၼ်း 7 သႅၼ်ပၢႆ ။ ယွၼ်ႉ ၼိုင်ႈၵေႃႉလႂ် တေလႆႈသမ်း 2 ပွၵ်ႈ။ ယႃႈယႃ ၵႅတ်ႇၵင်ႈၶူဝ်ႊဝိတ်ႉၼႆႉ ၼႂ်းႁူဝ်လိူၼ်တေမႃးၵေႃႈ တေထိုင်မႃးထႅင်ႈ ၵမ်းတီႈသွင်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ