ၸုမ်းၾၢႆႇပၢႆးယူႇလီမေႃယႃ ၸိုင်ႈတႆးပွတ်းဢွၵ်ႇၶူင်း တႄႇသမ်းယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ပွၵ်ႈႁႅၵ်ႈပၼ် တႃႇႁူဝ်ၵူၼ်း 1,600 ပၢႆ ဝႃႈၼႆ။

မိူဝ်ႈၼႆႉ ဝၼ်းတီႈ 27/1/2021 တီႈႁူင်းယႃလူင်ၸႄႈဝဵင်းၵဵင်းတုင် တင်း တႃႈၶီႈလဵၵ်း တႄႇသမ်းယႃႁႄႉၵင်ႈတၢင်းပဵၼ်ၶူဝ်ႊ ဝိတ်ႉ 19 ပၼ်ၸုမ်းၾၢႆႇပၢႆးယူႇလီ တႃႇၵူၼ်း 1,652 ၵေႃႉ ။

Dr လိၼ်းထုတ်ႉဢူး ၵႅမ်ႈၽူႈၸီႉသင်ႇၾၢႆႇပၢႆးယူႇလီၵူၼ်းမိူင်း ၸိုင်ႈတႆးပွတ်းဢွၵ်ႇ ၶူင်း လၢတ်ႈဝႃႈ – “ယႃႁႄႉၵင်ႈတၢင်း ပဵၼ်ၶူဝ်ႊဝိတ်ႉ 19 တႃႇ 1,652 ၵေႃႉတႄႉ ႁွတ်ႈ ၽႅဝ်မႃးတၢင်းပွတ်းဢွၵ်ႇယဝ်ႉ ပဵၼ်ၸုပ်ႈထီႉၼိုင်ႈ။ တႄႇမိူဝ်ႈၼႆႉၵႂႃႇ တေ သမ်းပၼ် ၾၢႆႇပၢႆးယူႇလီမေႃယႃ တၢင်းၵဵင်းတုင်လႄႈ တႃႈၶီႈလဵၵ်း  ”- ဝႃႈၼႆ။

ဢၼ်လႆႈသမ်းယႃႈယႃ 1,652 ၵေႃႉၼႆႉပဵၼ်ၶႃႈႁၢပ်ႇၵၢၼ်ၶုၼ်ၾၢႆႇပၢႆးယူႇလီ ၼႂ်းမိူင်းတႆးပွတ်းဢွၵ်ႇ ၶူင်း 11 ၸႄႈဝဵင်း ၼႂ်းၼၼ်ႉ ပႃးၸႄႈဝဵင်းမိူင်းလႃး ၼႃႈလိၼ်ၶိုၵ်ႉတွၼ်းမၢႆ 4 ။

ယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼႆႉ လႆႈမႃးတီႈ မိူင်းၵြႃးဢိၼ်ႊတီႊယိူဝ်ႊ တႃႇ 1.5 လၢၼ်ႉမူၵ်ႇ/ တဝ်ႈ တႃႇႁူဝ်ၵူၼ်း 7 သႅၼ်ပၢႆ။ ယွၼ်ႉဝႃႈ ၼိုင်ႈၵေႃႉလႂ် တေလႆႈသမ်းသွင်ပွၵ်ႈ ၊ ၼိုင်ႈပွၵ်ႈလႄႈၼိုင်ႈပွၵ်ႈ ႁၢင်ႇၵၼ် 28 ဝၼ်း  ။

ယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 တႃႇ 1.5 လၢၼ်ႉမူၵ်ႇ/ တဝ်ႈၼႆႉ ဢွၼ်တၢင်းသုတ်း တေသမ်းပၼ် ၸုမ်းၾၢႆႇပၢႆးယူႇလီ မေႃယႃ လႄႈ ၽူႈၸွႆႈမေႃယႃ ယဝ်ႉၵေႃႈ ၸုမ်းလူင်ပွင်ၸိုင်ႈ ၸိူဝ်းၼႆႉ။

ယၢမ်းလဵဝ် ၼႂ်းမိူင်းႁူမ်ႈတုမ်ပတ်းပိုၼ်ႉ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19  မီးၵႂႃႇ 138,368 ၵေႃႉ၊ ယႃ ၶႅၼ်း 122,781 ၵေႃႉလႄႈ လူႉတၢႆ 3,082 ၵေႃႉ ႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ဢွၵ်ႇဝႆႉၼင်ႇၼႆ။