ၽူႈၸၢႆး ဢႃယု 45 ပီ ၾၢႆႇၵူတ်ႇထတ်းၵူၼ်းၶဝ်ႈမိူင်းၵေႃႉၼိုင်ႈ တိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 သေ လႆႈလူႉတၢႆ ၵႂႃႇတီႈႁူင်းယႃ ဝဵင်းမူႇ ၸေႊ ၸိုင်ႈတႆးပွတ်းႁွင်ႇ။
ဝၼ်းတီႈ 22/1/2021 ယၢမ်းၵၢင်ၶမ်ႈ မွၵ်ႈ 6 မူင်းၼၼ်ႉ ၽူႈၸၢႆး ဢႃယု 45 ပီ ၵေႃႉၼိုင်ႈ တိတ်းၸပ်းၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ19 သေ လႆႈလူႉသဵင်ႈၵႂႃႇ တီႈႁူင်းယႃ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ ယွၼ်ႉမၼ်းၸၢႆး မီးတၢင်းပဵၼ်ယဵဝ်ႈ ဝၢၼ်၊ လိူတ်ႈဝၢၼ်လႄႈ တၢင်းပဵၼ်ႁူဝ်ၸႂ် ၸိူဝ်းၼႆႉဝႆႉ ၼႆယဝ်ႉ။
ၻွၵ်ႊတိူဝ်ႊ ႁၢၼ်ႇၼၢႆႇသူဝ်း ၽူႈၵွၼ်းႁူင်းယႃ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ လႆႈလူႉတၢႆ မိူဝ်ႈဝၼ်း တီႈ 22 ယၢမ်းႁူဝ်ၶမ်ႈ မွၵ်ႈ 6 မူင်း။ ထိုင်မႃး ယၢမ်း 7 မူင်းၶိုင်ႈ လႆႈၽဝ်ၶၢပ်ႈတူဝ်တၢႆမၼ်းၸၢႆးၵႂႃႇယဝ်ႉ။ မၼ်းၸၢႆးမီး တၢင်းပဵၼ် ယဵဝ်ႈဝၢၼ်၊ လိူတ်ႈဝၢၼ်လႄႈ တၢင်းပဵၼ်ႁူဝ်ၸႂ် ၸိူဝ်းၼႆႉ ယွၼ်ႉၼၼ် ႁႅင်းၵမ်ႉတူဝ်ဢေႇ”- ဝႃႈၼႆ။
ၽူႈၸၢႆး ဢႃယု 45 ပီ ဢၼ်လႆႈလူႉသဵင်ႈတၢႆၵႂႃႇၼၼ်ႉ ပဵၼ်ၽူႈႁၢပ်ႇၵၢၼ်ၾၢႆႇႁွင်ႈၵၢၼ်ၵူတ်ႇထတ်းၵူၼ်းၶဝ်ႈ/ ဢွၵ်ႇမိူင်း (လဝက) ၵေႃႉၼိုင်ႈ ၼႆယဝ်ႉ။
ယၢမ်းလဵဝ် တီႈႁူင်းယႃမူႇၸေႊ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 သေ တိုၵ်ႉယူတ်းယႃတူဝ်ဝႆႉ တင်းမူတ်းမီး 10 ၵေႃႉ ၼႆယဝ်ႉ။
တေႃႇထိုင်ဝၼ်းမိူဝ်ႈၼႆႉ ၼႂ်းမိူင်းတႆး ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 သေ လူႉတၢႆၵႂႃႇ မီး 4 ၵေႃႉယဝ်ႉ။ ၼႂ်းၼၼ်ႉ ပွတ်း ၸၢၼ်း 1 ၵေႃႉလႄႈ ပွတ်းႁွင်ႇ 3 ၵေႃႉ ။
