လုင်းသႅင်ႁၢၼ် ၽူႈၵွၼ်းဢိူင်ႇ ၵုင်းသႃႇသီႇပေႃႉ ၺႃးယိုဝ်းတၢႆ ၼႆႉ ၽူႈတႅၼ်းသၽႃး ၸႄႈဝဵင်း သီႇပေႃႉ ၼၢင်းမွၼ်းမွၼ်းပဝ်း ၵၢဝ်ႇယွၼ်းဝႃႈ ႁႂ်ႈလုင်းသႅင်ႁၢၼ်ပဵၼ်ၵေႃႉလိုၼ်းသုတ်း ဢၼ်ပဵၼ်တႆးသေ လႆႈတၢႆယွၼ်ႉ ၸုမ်းသိုၵ်းတႆး ၼၼ်ႉ ဝႃႈၼႆ။
ဝၼ်းတီႈ 23/1/2021 ၼႆႉ ၼၢင်းမွၼ်းမွၼ်းပဝ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ဢိၵ်ႇပႃႇတီႇႁူဝ်သိူဝ် ၼႂ်းၸႄႈဝဵင်းသီႇပေႃႉၵမ်ႈၽွင်ႈ၊ သင်ၶၸဝ်ႈ လႄႈ ၸုမ်းဝူင်းမႅတ်ႉတႃႇ ၵႂႃႇႁႃ ဢဝ်တူဝ်တၢႆ ၸုတ်ႇၽဝ် လူႇတၢၼ်းယၢတ်ႇၼမ်ႉပၼ် ႁႂ်ႈလုင်းသႅင်ႁၢၼ် ၽူႈၵွၼ်းဢိူင်ႇၵုင်းသႃႇ သီႇပေႃႉ၊ ၽူႈၶဝ်ႈၸုမ်းဝူင်းမႅတ်ႉတႃႇ သီႇပေႃႉ ၵေႃႉဢၼ်ၺႃးယိုဝ်းတၢႆၼၼ်ႉ ႁႂ်ႈၵႂႃႇႁွတ်ႈတီႈၵတ်းယဵၼ်။
ၼၢင်းမွၼ်းမွၼ်းပဝ်း ဢွၵ်ႇသဵင်ႁႆႈသေ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ၶႂ်ႈႁႂ်ႈၽူႈယႂ်ႇၵူၼ်းလူင်ၶဝ် ဢွၼ်ၵၼ် ထတ်းသၢင်တူၺ်းၶိုၼ်း ပေႃႇလသီႇၶဝ်၊ ၸုမ်းယိပ်းၵွင်ႈၵၢင်ႇတၢင်းမူတ်း တင်း သဵင်ႈ ဢမ်ႇၸႂ်ႈဝႃႈၸုမ်းလဵဝ် ၸွမ်းၼႃႈတီႈၼႆႉ ယႃႇႁႂ်ႈၵူၼ်းမိူင်း ပေႃးလႆႈပဵၼ်ၸၢၵ်ႇယွၼ်ႉ မၼ်းထႅင်ႈ ၊ ႁႂ်ႈသုတ်းယဝ်ႉတီႈ လုင်းႁဵင် လုင်းသႅင်ႁၢၼ်ၼႆႉၵေႃႉလဵဝ်ၵူၺ်း၊ ပေႃးမီးပၼ်ႁႃမႃးၵေႃႈ ႁႂ်ႈဢွၼ် ႁွင်ႉ ပေႃႈမႄႈၵူၼ်းမိူင်းဢိၵ်ႇပႃးၽူႈ တႅၼ်းၽွင်းႁႂ်ႈပေႃး ႁူမ်ႈႁူႉ ႁူမ်ႈငိၼ်းၸွမ်း ၸွင်ႇမၼ်းသၢင်ႇထုၵ်ႇ ဢမ်ႇသၢင်ႇထုၵ်ႇႁႄယဝ်ႉ ၸင်ႈၵွႆႈႁဵတ်း” – ဝႃႈၼႆ။
လုင်းသႅင်ႁၢၼ် ၼႆႉ ႁၢႆဢွၵ်ႇႁိူၼ်းၵႂႃႇၸဵမ်မိူဝ်ႈဝၼ်းတီႈ 7/1/2021 ၊ လႆႈလူႉတၢႆၵႂႃႇဝၼ်းၼၼ်ႉၵမ်းလဵဝ်။ ၽူႈၶၢၼ်ပၢၵ်ႇပႃႇတီႇ မႂ်ႇသုင်ၸိုင်ႈတႆးဝႃႈ လႆႈႁႅၼ်းသွမ်း ယွမ်းၼွမ်းတၢင်းၽိတ်း တီႈသင်ၶၸဝ်ႈသေ ႁူမ်ႈလူႇႁူမ်ႈတၢၼ်း ပၼ်ၸွမ်း ၼႂ်းဝၼ်းတီႈ 22/1/2021 ၼၼ်ႉယဝ်ႉၼႆ ၸဝ်ႈႁၢၼ်ၽူင်းႁၢၼ် လၢတ်ႈၼႄႇ ၼင်ႇၼႆ။
“ မၼ်းမႃးထွၵ်ႈၶၢမ်ႇပၼ် ၵူၼ်းသိုၵ်း တၢင်ႇၸုမ်း 2 ၵေႃႉ၊ ဝႃႈပဵၼ်လၢၼ်မၼ်းဝႃႇ။ ၵူၼ်းႁဝ်းၶႃႈသမ်ႉဝႃႈ ႁႂ်ႈလႆႈမိူဝ်းဢုပ်ႇၵၼ်တီႈငဝ်ႈငုၼ်း။ မၼ်းၵေႃႈမႃးၸွမ်းဢေႃႈ။ မၼ်းဢမ်ႇယုမ်ႇတူဝ်မၼ်းယူဝ်ႉ ထိုင်ၵၢင် တၢင်း ၽွင်းႁူဝ်ၶမ်ႈလပ်းသိင်ႇ သမ်ႉယွၼ်းၵိုတ်းဢွၵ်ႇၼွၵ်ႈႁေလႅၼ်ႈ ပၢႆႈလႄႈ ၺႃးၾၢႆႇႁူမ်ႇလူမ်ႈ ယိုဝ်း ၼၼ်ႉၶႃႈၼႃႇ။ ၸွမ်းၼင်ႇပေႃႇလသီႇတပ်ႉသိုၵ်းမီးၼၼ်ႉ တေလႆႈယိုဝ်းလွၵ်ႇသေတီႉၶိုၼ်း။ သမ်ႉၵႂႃႇၸပ်း တီႈယမ် မၼ်းသေလႆႈတၢႆၵႂႃႇ။ ဢၼ်လႆႈႁဵတ်းမႅၼ်ႈၼႆႉ ႁဝ်းၶႃႈၵေႃႈယွမ်းၼွမ်းၶႃႈဢေႃႈ၊ ၵၼ်ႇတေႃးသင်ၶၸဝ်ႈသေ ႁႅၼ်းလူႇ ႁႅၼ်းတၢၼ်းပၼ် မိူဝ်ႈဝၼ်းထိ 22 ၼၼ်ႉဢေႃႈ” – ၸဝ်ႈႁၢၼ် ၽူင်းႁၢၼ်လၢတ်ႈ ၼင်ႇၼႆ။
ၵဵဝ်ႇၵပ်းလွင်ႈၼႆႉသေ လုၵ်ႈယိင်း လုင်းသႅင်ႁၢၼ် ၵေႃႉဢၼ်ယူႇတီႈဝဵင်းတႃႈၶီႈလဵၵ်းၼၼ်ႉ လၢတ်ႈဝႃႈ တပ်ႉသိုၵ်း SSPP/SSA ၼႄး လုင်းသႅၼ်ႁၢၼ် ပဵၼ်ၵူၼ်း RCSS/SSA သေ တီႉၺွပ်းဝႃႈၼႆ။
ၼၢင်းမူဝ်သႅင်လႅင်း ၵေႃႉပဵၼ်လုၵ်ႈယိင်း လုင်းသႅင်ႁၢၼ်လၢတ်ႈဝႃႈ – “ၶဝ်ၼႄးဝႃႈ ဢူႈႁဝ်းပဵၼ်ၵူၼ်း RCSS ၼႆသေမႃးတီႉၺွပ်းၵႂႃႇႁႄႈ ဢဝ်ၵႂႃႇႁႅမ်တၢႆၶႃႈဢေႃႈ။ ၵႄႈလိတ်ႈပၼ်ႁႃတေႃႇပေႃးထိုင်တၢႆ ၼႆႉတႄႉ မၼ်းတူၵ်းတႅမ်ႇ တႄႉယဝ်ႉ”- ဝႃႈၼႆ။
ၸဝ်ႈႁၢၼ်ၽူင်းႁၢၼ်တႄႉလၢတ်ႈဝႃႈ လုင်းသႅင်ႁၢၼ်ၼႆႉ ဢမ်ႇၸႂ်ႈၵူၼ်း သိုၵ်း RCSS/SSA ပဵၼ်ၵူၼ်း ႁၢပ်ႇၵၢၼ်ၼႂ်း SSPP/SSA ႁပ်ႉဝႆႉၸၼ်ႉ ၽူႈၵွၼ်းဢိူင်ႇ ဢမ်ႇၸႂ်ႈလုင်းႁဵင် – ဝႃႈၼႆ။
လုင်းသႅင်ႁၢၼ်ၼႆႉ ပဵၼ်ၽူႈၵွၼ်းဢိူင်ႇ ၵုင်းသႃႇ။ ၸုမ်းလႂ်ၶဝ်ႈဝၢၼ်ႈမႃးၵေႃႈလႆႈၸွႆႈထႅမ်ႈ။ မၼ်းၸၢႆးၼႆႉ တႄႇၼႃႈႁိူၼ်းသွင်ပၢၼ်။ မီးလုၵ်ႈယိင်း 2 ၵေႃႉတင်းမေးၵေႃႉငဝ်ႈ(ဢမ်ႇယူႇၸွမ်းဝႆႉသေၵေႃႉ) ။ ဢၼ်ယူႇၵိုၵ်းဝႆႉ တေႃႇမိူဝ်ႈၺႃး ယိုဝ်းတၢႆ ၼႆႉတေႉ ပဵၼ်မေးၵေႃႉတႄႇ ၼႃႈႁိူၼ်းၵိုၵ်း ၵမ်းထီႉသွင် ၼႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ