သိုၵ်းလူင်ပွင်ၸိုင်ႈမၢၼ်ႈ တင်း TNLA ပဵၼ်ပၢင်တိုၵ်းၵၼ် ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၼႂ်းလိူၼ် ၼႆႉၵူၺ်း ဢမ်ႇယွမ်း 4 ပွၵ်ႈ ဝႃႈၼႆ။
ဝၼ်းတီႈ 19/1/2021 ယၢမ်းႁူဝ်ၶမ်ႈမွၵ်ႈ 4 မူင်းၶိုင်ႈ သိုၵ်းလူင်ပွင်ၸိုင်ႈမၢၼ်ႈတင်း TNLA ပဵၼ်ပၢင်တိုၵ်းၵၼ် တီႈႁိမ်းဝၢၼ်ႈတႃႈယၢဝ် ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ။
ႁွင်ႈၵၢၼ် TNLA ပိုၼ်ၽၢဝ်ႇဝႆႉဝႃႈ – “ယွၼ်ႉသိုၵ်းမၢၼ်ႈ လုၵ်ႉတၢင်းဝၢၼ်ႈပၢင်ႁုင်းသေ လူင်းၸွမ်းသဵၼ်ႈတၢင်းၵႃး ၶဝ်ႈတူင်ႉၼိုင်ၼႂ်းပိုၼ်ႉတီႈသိုၵ်းတဢၢင်း ယူႇသဝ်းဝႆႉတၢင်းဝၢၼ်ႈတႃႈယၢဝ်လႄႈ လႆႈပဵၼ်ပၢင်တိုၵ်းၵၼ်။ ၼႂ်းလိူၼ်ၵျႅၼ်ႊၼိဝ်ႊရီႊ 2021 ၼႆႉမႃး သိုၵ်းမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ် 4 ပွၵ်ႈယဝ်ႉ”- ဝႃႈၼႆ။
ၵူၺ်းၵႃႈဝၼ်းတီႈ 18 ပူၼ်ႉမႃးၼႆႉ ယူႇတီႈတပ်ႉသိုၵ်း TNLA ယင်းတိုၵ်ႉပိုၼ်ၽၢဝ်ႇဝႃႈ ႁၢင်ႈႁႅၼ်းတူဝ်ႈတၼ်းတႃႇ တေဢုပ်ႇဢူဝ်းၵၼ် တင်း တပ်ႉသိုၵ်းလူင်ပွင်ၸိုင်ႈမၢၼ်ႈလႄႈ RCSS ဝႃႈၼႆယူႇ။
ၵဵဝ်ႇၵပ်းလွင်ႈၼႆႉ ၸၢႆးမွင်ႇ ၵူၼ်းမိူင်းယေႃလၢတ်ႈဝႃႈ – “မိူဝ်ႈႁဝ်းၶႃႈလဵၵ်ႉတႄႉ ထုင်ႉတႃယၢဝ်ၼႆႉ မီးသိုၵ်းတႆး ၸုမ်း ၸဝ်ႈၵၼ်ႇၼ ၶဝ်တူင်ႉၼိုင်ၵႂႃႇမႃး။ သိုၵ်းလွႆတႄႉတိုၵ်ႉမႃးၼႂ်း 5-6 ပီၼႆႉၵူၺ်း ။ ႁိမ်းႁွမ်းတႃယၢဝ် မိူင်းယၢင်း ၸိူဝ်းၼႆႉၵေႃႈ ဢမ်ႇမီးဝၢၼ်ႈၵူၼ်းလွႆသေဝၢၼ်ႈ” – ဝႃႈၼႆ။
ၾၢႆႇၼိုင်ႈၵေႃႈသိုၵ်းလွႆ TNLA ၼႆႉ တင်းၸုမ်းဢူၺ်းလီ 3 ၸုမ်းသေ ပိုၼ်ၽၢဝ်ႇၵိုတ်းတိုၵ်း ၾၢႆႇလဵဝ် ဝႆႉ တႃႇၶၢဝ်းတၢင်း 2 လိူၼ် တႄႇဢဝ် ဝၼ်းတီႈ 1/1/2021 တေႃႇထိုင် ဝၼ်းတီႈ 28/2/2021 ၼႆယဝ်ႉ။
