ၾၢႆႇၽွင်းငမ်းၵဵင်းတုင် ယိုတ်းတီႈလိၼ်ၵူၼ်းဝၢၼ်ႈယဝ်ႉသၢႆႈတႅၼ်းပၼ်ၶိုၼ်းၼိုင်ႈၵေႃႉ 80 ထတ်းၵူၼ်းဝၢၼ်ႈဢမ်ႇၽွမ်ႉ

ၾၢႆႇၽွင်းငမ်းဝဵင်းၵဵင်းတုင် ယိုတ်းတီႈလိၼ်ၵူၼ်းဝၢၼ်ႈ 50 ဢေႊၶိူဝ်ႊပၢႆ၊ ၵူၼ်းမိူင်းတုၵ်းယွၼ်း ၶိုၼ်းလႄႈ ၾၢႆႇၽွင်းငမ်းဢၢၼ်းသၢႆႈတႅၼ်းပၼ်ၶိုၼ်း ၸဝ်ႈသူၼ်ၼိုင်ႈၵေႃႉ 80 ထတ်းပၼ်ႇမူၼ်း ၊ ၸဝ်ႈသူၼ်ဢမ်ႇၽွမ်ႉ။

ဢၼ်ၾၢႆႇၽွင်းငမ်း ၵဵင်းတုင် ယိုတ်းၵႂႃႇၼၼ်ႉပဵၼ် တီႈလိၼ်ၵူၼ်းဝၢၼ်ႈၼွင်ငိုၼ်း တႃႇ 55 ဢေႊၶိူဝ်ႊ  ဢၢၼ်းတေဢဝ်ၵေႃႇသၢင်ႈႁဵတ်းႁူင်းၵၢၼ် (စက်မှုဇုန်)  ။

မိူဝ်ႈဝၼ်းတီႈ 6/1/2021 ၼၼ်ႉ ၽူႈၵွၼ်းၸႄႈတွၼ်ႈ ၽူႈၵွၼ်းဢိူင်ႇလႄႈ ၵူၼ်းဝၢၼ်ႈၼွင်ငိုၼ်း 23 ၵေႃႉ ၼႂ်းဢိူင်ႇၵၢတ်ႇၾႃႉ ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း  ဢုပ်ႇဢူဝ်းငူပ်ႉငီႉၵၼ်သေ ၾၢႆႇလူင်ပွင်ၸိုင်ႈဝႃႈ တေပၼ်ၶိုၼ်း တီႈလိၼ်ၼၼ်ႉ ၼိုင်ႈၵေႃႉလႂ် 80 ထတ်းပၼ်ႇမူၼ်းၵူၺ်းဝႃႈၼႆ။ လွင်ႈၼႆႉ  ၵူၼ်းဝၢၼ်ႈဢမ်ႇၽွမ်ႉၸွမ်း လႄႈၵၢၼ်ဢုပ်ႇဢူဝ်းၵေႃႈဢမ်ႇၸၢင်ႈတူၵ်းလူင်း ၵၼ်  ။

ၸၢႆးၵႅဝ်ႈ ၽူႈၼမ်းၼႂ်း ပႃႇတီႇႁူဝ်သိူဝ် ၸႄႈဝဵင်းၵဵင်းတုင် SNLD လၢတ်ႈဝႃႈ -“ၽူႈၵွၼ်းၸႄႈဝဵင်း ပူႇၵႄႇဝၢၼ်ႈ ယဝ်ႉၵေႃႈ ၽူႈၵွၼ်းဢိူင်ႇ ႁွင်ႉၵူၼ်းဝၢၼ်ႈ 23 ၵေႃႉ ဢၼ်ပဵၼ်ၸဝ်ႈၶွင်တီႈလိၼ် 55 ဢေႊၶိူဝ်ႊၼၼ်ႉ မႃးဢုပ်ႇဢူဝ်းငူပ်ႉငီႉၵၼ် ၶဝ် ဝႃႈတေပၼ် ၼိုင်ႈၵေႃႉလႂ် 80 ပေႇပၼ်ႇမူၼ်းၵူၺ်း လွင်ႈၼႆႉ ႁဝ်းၶႃႈ တိုၼ်းဝႃႈ ဢမ်ႇၽွမ်ႉၸွမ်းၶႃႈ”- ဝႃႈၼႆ။

 ၾၢႆႇၸဝ်ႈၼႃႈတီႈလၢတ်ႈဝႃႈ ပၼ်ၶိုၼ်း  ၼိုင်ႈၵေႃႉလႂ် 80 ထတ်းၼႆႉ သင်ဝႃႈ ၵူၼ်းဝၢၼ်ႈ ဢမ်ႇဢဝ်ၵေႃႈလူဝ်ႇ ၶပ်းၶိုင်သေလွင်ႈသေလၢႆးယဝ်ႉ ယင်းပၢႆလၢတ်ႈထႅင်ႈၼင်ႇၼႆ- ၼႆၵူၼ်းဝၢၼ်ႈၵေႃႉၼိုင်ႈလၢတ်ႈ။   

ၵဵဝ်ႇၵပ်းလွင်ႈၼႆႉ ၽူႈတွႆႇႁွၵ်ႈၵပ်းသိုပ်ႇတွင်ႈထၢမ်တီႈ ၽူႈၵွၼ်းဢိူင်ႇဝၢၼ်ႈတၢတ်ႇၾႃႉ လုင်းလၢၼ်ႇတၢၼ်း လၢတ်ႈဝႃႈ- တလဵဝ်တႄႉၵူၼ်းဝၢၼ်ႈဢမ်ႇၽွမ်ႉၸွမ်းၶဝ်လႄႈ ၶဝ်ၵေႃႈယဵၼ်ဝႆႉယူႇဢေႃႈ ။ ပႆႇၸၢင်ႈႁဵတ်းႁိုဝ်ထႅင်ႈၶႃႈ- ဝႃႈၼႆ။

တီႈလိၼ်ၼႆႉ ပဵၼ်ၶွင်ၵူၼ်းဝၢၼ်ႈၼွင်ငိုၼ်း ၽုၵ်ႇသွမ်ႈႁႃၵိၼ်လဵင်ႉတွင်ႉမႃးပီယၢဝ်းၶၢဝ်းႁိုင်။  မိူဝ်ႈပီ 1996 ၼၼ်ႉ ထုၵ်ႇသိုၵ်းလူင်ပွင်ၸိုင်ႈမၢၼ်ႈ တိူင်းသိုၵ်းသၢမ်ၸဵင်ႇ ၵဵင်းတုင်  ယိုတ်းဢဝ်ၵမ်းၼိုင်ႈယဝ်ႉလႄႈ ႁဵတ်းႁႂ်ႈၵူၼ်းဝၢၼ်ႈႁူပ်ႉထူပ်းလွင်ႈ ယၢပ်ႇၽိုတ်ႇ မႃးႁၢဝ်ႈႁႅင်း  ။  ၵူၼ်းဝၢၼ်ႈ လႆႈဢွၼ်ၵၼ် တႅမ်ႈလိၵ်ႈတုၵ်းယွၼ်းမႃးလၢႆလၢႆၵမ်း ထိုင်မႃး ပီ 2016 ၼၼ်ႉ ၸင်ႇမွပ်ႇပၼ် ၶိုၼ်းၵူၼ်းမိူင်း ။ ၵူၺ်းၵႃႈ ဝႂ်တီႈလိၼ် ၽိုၼ်မိူၼ် 7 (ပုံစံ ၇ ) ၼၼ်ႉ လုမ်းၽူႈၵွၼ်းၸႄႈဝဵင်း ယိုတ်း ဝႆႉ ဝႃႈၼႆ။

ၵူၼ်းဝၢၼ်ႈၼွင်ငိုၼ်း ၵေႃႉၼိုင်ႈ လၢတ်ႈဝႃႈ – “ၼႂ်းၵူၼ်း 23 ၵေႃႉၼႆႉ မၢင်ၵေႃႉ မီးလုၵ်ႈ ပဵၼ် 8 ၵေႃႉၶႃႈဢေႃႈ။ သင်ဝႃႈ လူဝ်ႇႁဵတ်းႁႃၵိၼ် သေၸိူဝ်ႉသေလွင်ႈၼႆ ႁဝ်းၶႃႈၸႂ်ယႂ်ႇတီႈလိၼ်ၼႆႉၵူၺ်းၶႃႈယဝ်ႉ။ သင်ဝႃႈ ဢမ်ႇမီးတီႈလိၼ်ၼႆႉ ဢမ်ႇ ၸၢင်ႈႁဵတ်းၵၢၼ်သင်ၶႃႈယဝ်ႉ။ ဢမ်ႇမီးတၢင်းမုင်ႈမွင်းသင်ၶႃႈယဝ်ႉ”- ဝႃႈၼႆ။

 မိူဝ်ႈဝၼ်းတီႈ 13/12/2020 ၼၼ်ႉၵေႃႈ လူင်ပွင်ၸိုင်ႈမၢၼ်ႈ မႃးတႅၵ်ႈမႃးယိုတ်းတီႈလိၼ်လႄႈ   ယူႇတီႈၽူႈၵွၼ်းဢိူင်ႇ တင်းၵူၼ်းဝၢၼ်ႈ ႁူမ်ႈၵၼ်သေ သၢၼ်ၶတ်းမႃးယဝ်ႉၵမ်းၼိုင်ႈ   ။ တီႈလိၼ် 55 ဢေႊၶိူဝ်ႊ ဢၼ်လူင်ပွင်ၸိုင်ႈၶိုင်ယိုတ်းယူႇတိၵ်းတိၵ်းၼႆႉပဵၼ်တီႈလိၼ်ၵူၼ်းဝၢၼ်ႈၼွင်ငိုၼ်း 23 လင်ႁိူၼ်း။ ပဵၼ်တီႈလိၼ် ဢၼ်ၵူၼ်းဝၢၼ်ႈၽုၵ်ႇသွမ်ႈႁဵတ်းၵၢၼ်ႁႃၵိၼ်လဵင်ႉတွင်ႉမႃးၸဵမ်ပၢၼ်ပူႇမွၼ်ႇလႄႈ ဢမ်ႇၽွမ်ႉပၼ်တူၵ်းၼႂ်းမိုဝ်းၽႂ်လႃးလႃး ၵူၼ်းဝၢၼ်ႈတႄႉလၢတ်ႈၼင်ႇၼႆ။