ပၢင်ၶဝ်ႈဝၢတ်ႈ/ တိုဝ်းၵမ် သင်ၶၸဝ်ႈ ၸိုင်ႈတႆးပွတ်းဢွၵ်ႇၶူင်း ပွၵ်ႈၵမ်း 71 ၼႆႉ ဢမ်ႇပဵၼ်ၸတ်းႁဵတ်းယဝ်ႉ ယွၼ်ႉတၢင်း ပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်း ဝႃႈၼႆ။

ပေႃးထိုင်မႃး လိူၼ်ၵမ်မႂ်ႇ 5 ၶမ်ႈ ထိုင် လိူၼ်မူၼ်းၼႆ သင်ၶၾၢႆႇတႆး ၼႂ်းၸႄႈတွၼ်ႈၵဵင်းတုင် ၸိုင်ႈတႆး ပွတ်းဢွၵ်ႇၶူင်း တေ ဢွၼ်ၵၼ်ၸတ်းႁဵတ်းပၢင်ၶဝ်ႈဝၢတ်ႈတိုဝ်းၵမ်ၵၼ်မႃးၵူႈပီ။ ထိုင်မႃးပီၼႆႉ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈ ႁႅင်းသေ သင်ၶၸဝ်ႈလႄႈတၵ်ႉၵႃႇ ၽွမ်ႉၵၼ်ယုၵ်ႉလိူၵ်ႈ ဢမ်ႇပဵၼ်ၸတ်းႁဵတ်း။ ပၢင်ၶဝ်ႈတိုဝ်းၵမ် ပွၵ်ႈၵမ်း 71 ၼႆႉ တူၵ်းပုၼ်ႈၽွၼ်း ဝတ်ႉဝၢၼ်ႈ ငႅၼ်း ဢိူင်ႇၵၢတ်ႇတဝ်ႇ ၸႄႈဝဵင်းၵဵင်းတုင် ၼႆယဝ်ႉ။

ၸဝ်ႈၶူးၵုလိသ ၾၢႆႇယိပ်းငိုၼ်း လုမ်းသင်ႇၶႃႇၸိုင်းတႆး ပွတ်းဢွၵ်ႇၶူင်း လၢတ်ႈတီႈ ၽူႈတွႆႇႁွၵ်ႈဝႃႈ -“ပီၼႆႉ ပၢင်ၶဝ်ႈဝၢတ်ႈ တိုဝ်းၵမ်တႄႉ ဢမ်ႇပဵၼ်ၸတ်းယဝ်ႉ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆႉသေ လႆႈၵိုတ်းယၢင်ႉဝႆႉဢိူဝ်ႈ”- ဝႃႈၼႆ။

လိူဝ်ၼၼ်ႉ သင်ၶၸဝ်ႈၾၢႆႇၵိူင်းတႆးၶိုၼ်/ ယူၼ်းၵေႃႈ မိူၼ်ၵၼ် ဢမ်ႇလႆႈၸတ်းႁဵတ်းပၢင်ၶဝ်ႈတိုဝ်းၵမ် ယွၼ်ႉတၢင်းပဵၼ် ၶူဝ်ႊဝိတ်ႉ 19 ၼႆႉ ဝႃႈၼႆ။

တူႉယီႈ ၽူႈၼင်ႈဝတ်ႉၵဵင်းငၢမ်း ဝဵင်းၵဵင်းတုင် လၢတ်ႈဝႃႈ – “ယွၼ်ႉတၢင်းပဵၼ် ၶူဝ်ႊဝိတ်ႉ 19 ၼႆႉယဝ်ႉ ပီၼႆႉ ဢဝ်ဢမ်ႇ ပဵၼ် လႆႈၸတ်းႁဵတ်း ပၢင်ၶဝ်ႈဝၢတ်ႈတိုဝ်းၵမ်။ ပေႃးႁဵတ်းၵေႃႈ ၵူၼ်းသမ်ႉတေၵိုၼ်းၶွၼ်ႈၼမ်ၼၼ်ႉလႄႈ ၵူဝ်တၢင်းပဵၼ်တိတ်း ၸပ်းၵၼ်ၼၼ်ႉယဝ်ႉ”- ဝႃႈၼႆ။

ပီၵၢႆ ပၢင်ၶဝ်ႈဝၢတ်ႈ သင်ၶၸဝ်ႈ ၸိုင်ႈတႆးပွတ်းဢွၵ်ႇၶူင်း ပွၵ်ႈၵမ်း 70 တႄႉ သင်ၶ တၵ်ႉၵႃႇႁူမ်ႈၵၼ်ၸတ်းႁဵတ်းတီႈၵျွင်းၵမ်မထၢၼ်း ၸွမ်ၸႅင်ႈ ၸႄႈဝဵင်းၵဵင်းတုင် ။ ၸတ်းႁဵတ်းၼႂ်းဝၼ်းတီႈ 30/12/2019 ထိုင် 10/1/2020 ။ မီးသင်ၶၸဝ်ႈ ၶဝ်ႈ ႁူမ်ႈတိုဝ်းၵမ် 100 တူၼ်ပၢႆ။

ၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်းၼႆႉ တေၸတ်းႁဵတ်းပၢင်ၶဝ်ႈဝၢတ်ႈ/ တိုဝ်းၵမ် သင်ၶၸဝ်ႈ ၼိုင်ႈပီလႂ်ၼိုင်ႈ ပွၵ်ႈ။ ၼိုင်ႈပွၵ်ႈလႂ် တေၸတ်းႁဵတ်း 3 ဢွင်ႈတီႈ ။ ၼႂ်း 3 ဢွင်ႈတီႈၼၼ်ႉ တႃႇ 2 တီႈဢွင်ႈတီႈ ပဵၼ်သင်ၶၸဝ်ႈၾၢႆႇၵိူင်း တႆးၶိုၼ်/ ယူၼ်း။ တႃႇ 1 ဢွင်ႈတီႈသမ်ႉ ပဵၼ်သင်ၶၸဝ်ႈ ၾၢႆႇၵိူင်းတႆး ၼႆယဝ်ႉ။