သိုၵ်းလူင်ပွင်ၸိုင်ႈမၢၼ်ႈ ၶိုၼ်ႈလေႃႇယိုဝ်း သိုၵ်းတႆး SSPP လႄႈ ၸုမ်းဢူၺ်းလီ တီႈဢိူင်ႇမိူင်းပေႃႈ ၸႄႈဝဵင်းမူႇၸေႊ ႁၢဝ်ႈႁႅင်း ဝႃႈၼႆ။

မိူဝ်ႈဝၼ်းတီႈ 19/12/2020 ယၢမ်းႁူဝ်ၶမ်ႈ 5:50 မူင်းၼၼ်ႉ သိုၵ်းလူင်ပွင်ၸိုင်ႈမၢၼ်ႈ တပ်ႉၶလယ 79 ပႃႈတႂ်ႈတပ်ႉမ 99 ၶိုၼ်ႈယိုဝ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ဢၼ်ပၵ်းဝႆႉတီႈလွႆၵွင်းတုၺ် ႁၢင်ႇၵႆဝၢၼ်ႈမိူင်းပေႃႈ  မွၵ်ႈ 2 ၸူဝ်ႈမူင်း ၼႂ်းဢိူင်ႇမိူင်းပေႃႈ ဝဵင်းပၢင်ႇသၢႆး ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၼႆယဝ်ႉ။

ၵူၼ်းပိုၼ်ႉတီႈ မိူင်းပေႃႈ လၢတ်ႈဝႃႈ – “သိုၵ်းမၢၼ်ႈတင်း သိုၵ်းတႆး SSPP လႆႈပဵၼ် ပၢင်တိုၵ်းၵၼ်ႁၢဝ်ႈႁႅင်းၶႃႈဢေႃႈ။ လႆႈ ငိၼ်းဝႃႈ သိုၵ်းမၢၼ်ႈၶိုၼ်းထွႆထွၼ်သေ သဵင်ၵွင်ႈၸင်ႇယဵၼ်ၼႆၶႃႈ”- ဝႃႈၼႆ။

ဢွင်ႈတီႈဢၼ်ပဵၼ်ပၢင်တိုၵ်းၵၼ်ၼၼ်ႉ ပဵၼ်တီႈလွႆၵွင်းတုၺ်။ တီႈၼၼ်ႈသမ်ႉ မီးဝႆႉသိုၵ်းတႆး SSPP ၊ သိုၵ်းၵူဝ်းၵၢင်ႉ MNDAA လႄႈ သိုၵ်းရၶႅင်ႇ AA ၸိူဝ်းၼႆႉသမ်ႉ ပၵ်းသဝ်းယူႇဝႆႉ  ။

ဢိင်ၼိူဝ် လွင်ႈၼႆႉ ယူႇတီႈၽူႈတွႆႇႁွၵ်ႈ ၶတ်းၸႂ်တိတ်းတေႃႇ ၸဝ်ႈႁၢၼ် တၢၼ်းဢွင်ႇ လၢႆလၢႆၵမ်းၵေႃႈ ဢမ်ႇႁပ်ႉသၢႆ  ။

 ႁွင်ႈၵၢၼ်ၾၢႆႇ ပိုၼ်ၽၢဝ်ႇ SSPP တႄႉ ဢွၵ်ႇဝႆႉဝႃႈ – “သိုၵ်းမၢၼ်ႈတပ်ႉၶလယ 79 လုၵ်ႉတၢင်းၼွင်ၶမ်းၵႂႃႇတၢင်းပဵင်းဢွႆႈ သေ ၶိုၼ်ႈလေႃႇတိုၵ်းတပ်ႉပၢင်သဝ်း ၸုမ်းဢူၺ်းလီ 3 ၸုမ်းဢၼ်ပၵ်းသဝ်းဝႆႉ ၼိူဝ်လွႆၵွင်းတုၺ်ၼၼ်ႉ သွင်ၾၢႆႇလႆႈပဵၼ် ပၢင်တိုၵ်းၵၼ် တေႃႇထိုင်ယၢမ်းႁူဝ်ၶမ်ႈ 8:15 မူင်း သဵင်ၵွင်ႈၸင်ႇယဵၼ်။ ၽွင်းသွင်ၾၢႆႇ ပဵၼ်ပၢင်တိုၵ်းၵၼ်ၼၼ်ႉ သိုၵ်း မၢၼ်ႈ လုၵ်ႉတီႈၵွင်းတပ်ႉ 105 လၵ်း ဢဝ်ၶိူင်ႈလူင် 120 ယိုဝ်းၸွႆႈၵႂႃႇတၢင်းပၢင်တိုၵ်းၼၼ်ႉ ဢမ်ႇယွမ်း 12 လုၵ်ႈ။ ၵူၺ်း ၵႃႈ ဢမ်ႇမီးလွင်ႈတုမ်ႉတိူဝ်ႉၽႂ်”- ဝႃႈၼႆ။

မိူဝ်ႈလိူၼ်ဢေႃႊၵတ်ႊသ် ပူၼ်ႉမႃးၼၼ်ႉ သိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်း လေႃႇတိုၵ်း တီႈလွႆၵွင်းတုၺ်ၼႆႉမႃးယဝ်ႉ ၵမ်းၼိုင်ႈၾၢႆႇပွင်ႇၶၢဝ်ႇ SSPP ဢွၵ်ႇဝႆႉၼင်ႇၼႆ။  

ထႅင်ႈၾၢႆႇၼိုင်ႈၵေႃႈ ယူႇတီႈတပ်ႉသိုၵ်းမၢၼ်ႈလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇ  ၵိုတ်းတိုၵ်းၾၢႆႇလဵဝ်ဝႆႉတေႃႇထိုင် ပီ 2020 ၼႆႉသဵင်ႈသေတႃႉ    လိူၼ်ၼူဝ်ႊဝႅမ်ႊၿိူဝ်ႊ  လႄႈ လိူၼ်တီႊသႅမ်ႊပိူဝ်ႊမႃး ႁႅၼ်းသိုၵ်း လေႃႇတိုၵ်း ၸုမ်းယိပ်းၵွင်ႈၵၢင်ႇ  ႁၢဝ်ႈႁႅင်း။     မိူဝ်ႈႁူဝ်လိူၼ်ၻီႊသႅမ်ႊၿိူဝ်ႊ ၼႆႉမႃးၵေႃႈႁႅၼ်းသိုၵ်းလေႃႇတိုၵ်း TNLA တၢင်းပွတ်းၼမ်ႉတူႈၼႆႉမႃးဢမ်ႇယွမ်း 2 ပွၵ်ႈ  ယဝ်ႉ- ဝႃႈၼႆ။