ၵူၼ်းႁေႃႈၵႃးၵေႃႉၼိုင်ႈလႄႈ ပေႃႈမႄႈမၼ်းၸၢႆး ဢၼ်ယူႇ ပွၵ်ႉၼိူဝ် ဝဵင်းၼမ်ႉၶမ်း ၸႄႈတွၼ်ႈမူႇၸေႊၼၼ်ႉ တိတ်းၸပ်းတၢင်းပဵၼ်ၶူဝ်ႊဝိတ်ႉ 19 လႄႈ ပိၵ်ႉႁပ်းႁိူၼ်းယေးၶဝ်ပေႃႈမႄႈလုၵ်ႈသေ ႁၢမ်ႈၵူၼ်းႁိမ်းႁွမ်းၵႂႃႇမႃးၶဝ်ႈဢွၵ်ႇ။

ၵူၼ်းႁေႃႈၵႃးၵေႃႉၼိုင်ႈ ၵူတ်ႇထတ်းႁူပ်ႉႁၼ်တၢင်းပဵၼ်ၶူဝ်ႊဝိတ်ႉ 19 တီႈ ၵဵတ်ႉၵူတ်ႇထတ်းတၢင်းပဵၼ်ၶူဝ်ႊဝိတ်ႉ 19 တီႈဝဵင်းၼွင်ၶဵဝ်၊ ၶွမ်ႊမတီႊ ၾၢႆႇၵုမ်းၵမ်ယူတ်းယႃၵႅတ်ႇၵင်ႈၶူဝ်ႊဝိတ်ႉ 19 ၶႆႈငိူၼ်ႈ ၵူၼ်းၵွင်ႉၵၢႆႇ ၵဵဝ်ႇၵပ်းမၼ်းၸၢႆး၊ ၵူတ်ႇထတ်း ပေႃႈမႄႈမၼ်းၸၢႆး ဢၼ်မီးယူႇတီႈႁိူၼ်း ပွၵ်ႉၼိူဝ်ဝဵင်းၼမ်ႉၶမ်း။ ထတ်းႁၼ်ဝႃႈ ပေႃႈမႄႈ မၼ်းၸၢႆး ၵေႃႈ ၸပ်းၶူဝ်ႊဝိတ်ႉ 19 ယဝ်ႉလႄႈ ဢဝ်သူင်ႇယူတ်းယႃတူဝ်ဝႆႉယူႇတီႈ ႁူင်းယႃလူင်ဝဵင်းၼမ်ႉၶမ်း။ 

ၸၢႆးၸၢမ်ႇမူဝ်း ၸုမ်းၶႂၢႆၶႃပႄလႅင် ၼမ်ႉၶမ်း လၢတ်ႈဝႃႈ – “ယၢမ်းလဵဝ် ႁဝ်းၶႃႈ တိုၵ်ႉၵူတ်ႇထတ်း ၵူၼ်း ၸိူဝ်းၶဝ်ႈဢွၵ်ႇၵႂႃႇမႃး ယူႇၸမ်ၵူၼ်းပဵၼ် ၼၼ်ႉယဝ်ႉၶႃႈ။ တေႃႈလဵဝ်တႄႉ တီႈႁိူၼ်းၵူၼ်းပဵၼ် ပွၵ်ႉၼိူဝ်ၼၼ်ႉ လႆႈပိၵ်ႉ ဢိုတ်းဝႆႉ ၸူဝ်ႈၶၢဝ်းဢေႃႈ။ ဢမ်ႇၸႂ်ႈပိၵ်ႉဢိုတ်းတင်းပွၵ်ႉၶႃႈ”- ဝႃႈၼႆ။

ၵေႃႉပဵၼ်ၸဝ်ႈၵႃး ဢၼ်ၵူတ်ႇထတ်းႁၼ်ၸိူဝ်ႉမႅင်းၶူဝ်ႊဝိတ်ႉ 19 မိူဝ်ႈဝၼ်းတီႈ 13/12/2020 ၼၼ်ႉ တေႃႈလဵဝ် ယူတ်းယႃ ဝႆႉယူႇတီႈႁူင်းယႃ ဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး၊ ပေႃႈမႄႈမၼ်းၸၢႆးတႄႉ ၶဝ်ႈႁူင်းယႃၼမ်ႉၶမ်း မိူဝ်ႈဝၼ်းတီႈ 15/12/2020 ။

“မိူဝ်ႈလဵဝ် တီႈၼမ်ႉၶမ်းႁဝ်းၶႃႈၼႆႉ မီးလွင်ႈမႆႈၸႂ်ၼမ်ႁႅင်းဝႆႉၶႃႈဢေႃႈ ၵူၼ်းမိူင်း ဢၼ်ၶဝ်ႈဢွၵ်ႇ တုမ်ႉတိူဝ်ႉယူႇၸမ် ၵူၼ်း ပဵၼ်ၼၼ်ႉ ၶႂ်ႈဝႃႈ မီးႁိမ်း 50 ပၢႆၼႆႉယဝ်ႉ ၼႆၶႃႈဝႃႇ၊ ႁဝ်းၶႃႈတႄႉ ၵူဝ် ပိၵ်ႉၵၢတ်ႇ ႁၢမ်ႈဢမ်ႇပၼ်ၶၢႆ ၸိူဝ်းၼႆႉၵူၺ်းယဝ်ႉ၊ ယွၼ်ႉလူဝ်ႇႁႃၸဝ်ႉၵိၼ်ၶမ်ႈ ဢေႃႈ” – ၼႆ ပႃႈၼၢင်းဢႆႇ ဝဵင်းၼမ်ႉၶမ်းလၢတ်ႈ။

ၶူးမေႃယႃလူင် Dr. ၸၢႆးလႃႉတိၼ်ႇ ဝဵင်းၼမ်ႉၶမ်း ပိုၼ်ၽၢဝ်ႇတီႈ ၾဵတ်ႉပုၶ်သုၼ်ႇတူဝ် မၼ်းၸၢႆးဝႃႈ ၵူၼ်းဢၼ်ၶဝ်ႈဢွၵ်ႇ ယူႇၸမ် မႅၼ်ႈ ၸဝ်ႈၵႃးဢၼ်ၵူတ်ႇႁၼ်တၢင်းပဵၼ်ၶူဝ်ႊဝိတ်ႉ တီႈဝဵင်းၼွင်ၶဵဝ်ၼၼ်ႉ တင်းမူတ်း မီး 13 ၵေႃႉ။ ၵူၼ်းၵွင်ႉၵဵဝ်ႇ မႅၼ်ႈ ပေႃႈမႄႈမၼ်းၸၢႆးသမ်ႉ မီး 34 ၵေႃႉ – ဝႃႈၼႆ။

ၼႂ်းၸႄႈဝဵင်းၼမ်ႉၶမ်းၼႆႉ ၵူတ်ႇထတ်းႁၼ် ၵူၼ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်းမီး 5 ၵေႃႉ။ တႃႇ 2 ၵေႃႉတႄႉ လႆႈၶႂၢင်ႉလူင်းႁူင်းယႃယဝ်ႉ။ ဝၼ်းမိူဝ်ႈၼႆႉ ၼႂ်းမိူင်းတႆး ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်းမီးၵႂႃႇ 730 ၵေႃႉ၊ လူႉတၢႆ 3 ၵေႃႉလႄႈ ယႃၶႅၼ်း 567 ၵေႃႉ ။